Sukta 28

28.1

11 kurmo gartsamado, gritsamado va, varunah (10 duhsvapnanashinih), trishtup

इ॒दं क॒वेरा॑दि॒त्यस्य॑ स्व॒राजो॒ विश्वा॑नि॒ सान्त्य॒भ्य॑स्तु म॒ह्ना ।
अति॒ यो म॒न्द्रो य॒जथा॑य दे॒वः सु॑की॒र्तिं भि॑क्षे॒ वरु॑णस्य॒ भूरे॑ः ॥१॥

Idam kaveradityasya svarajo vishvani santyabhyastu mahna
Ati yo mandro yajathaya devah sukirtim bhikshe varunasya bhureh

28.2

तव॑ व्र॒ते सु॒भगा॑सः स्याम स्वा॒ध्यो॑ वरुण तुष्टु॒वांस॑ः ।
उ॒पाय॑न उ॒षसां॒ गोम॑तीनाम॒ग्नयो॒ न जर॑माणा॒ अनु॒ द्यून् ॥२॥

Tava vrate subhagasah syama svadhyo varuna tushtuvansah
Upayana ushasam gomatinamagnayo na jaramana anu dyun

28.3

तव॑ स्याम पुरु॒वीर॑स्य॒ शर्म॑न्नुरु॒शंस॑स्य वरुण प्रणेतः ।
यू॒यं न॑ः पुत्रा अदितेरदब्धा अ॒भि क्ष॑मध्वं॒ युज्या॑य देवाः ॥३॥

Tava syama puruvirasya sharmannurushansasya varuna pranetah
Yuyam nah putra aditeradabdha abhi kshamadhvam yujyaya devah

28.4

प्र सी॑मादि॒त्यो अ॑सृजद्विध॒र्ताँ ऋ॒तं सिन्ध॑वो॒ वरु॑णस्य यन्ति ।
न श्रा॑म्यन्ति॒ न वि मु॑चन्त्ये॒ते वयो॒ न प॑प्तू रघु॒या परि॑ज्मन् ॥४॥

Pra simadityo asrijadvidhartam ritam sindhavo varunasya yanti
Na shramyanti na vi muchantyete vayo na paptu raghuya parijman

28.5

वि मच्छ्र॑थाय रश॒नामि॒वाग॑ ऋ॒ध्याम॑ ते वरुण॒ खामृ॒तस्य॑ ।
मा तन्तु॑श्छेदि॒ वय॑तो॒ धियं॑ मे॒ मा मात्रा॑ शार्य॒पस॑ः पु॒र ऋ॒तोः ॥५॥

Vi machchhrathaya rashanamivaga ridhyama te varuna khamritasya
Ma tantushchhedi vayato dhiyam me ma matra sharyapasah pura ritoh

28.6

अपो॒ सु म्य॑क्ष वरुण भि॒यसं॒ मत्सम्रा॒ळृता॒वोऽनु॑ मा गृभाय ।
दामे॑व व॒त्साद् वि मु॑मु॒ग्ध्यंहो॑ न॒हि त्वदा॒रे नि॒मिष॑श्च॒नेशे॑ ॥६॥

Apo su myaksha varuna bhiyasam matsamralritavonu ma gribhaya
Dameva vatsad vi mumugdhyanho nahi tvadare nimishashchaneshe

28.7

मा नो॑ व॒धैर्व॑रुण॒ ये त॑ इ॒ष्टावेन॑ः कृ॒ण्वन्त॑मसुर भ्री॒णन्ति॑ ।
मा ज्योति॑षः प्रवस॒थानि॑ गन्म॒ वि षू मृध॑ः शिश्रथो जी॒वसे॑ नः ॥७॥

Ma no vadhairvaruna ye ta ishtavenah krinvantamasura bhrinanti
Ma jyotishah pravasathani ganma vi shu mridhah shishratho jivase nah

28.8

नम॑ः पु॒रा ते॑ वरुणो॒त नू॒नमु॒ताप॒रं तु॑विजात ब्रवाम ।
त्वे हि कं॒ पर्व॑ते॒ न श्रि॒तान्यप्र॑च्युतानि दूळभ व्र॒तानि॑ ॥८॥

Namah pura te varunota nunamutaparam tuvijata bravama
Tve hi kam parvate na shritanyaprachyutani dulabha vratani

28.9

पर॑ ऋ॒णा सा॑वी॒रध॒ मत्कृ॑तानि॒ माहं रा॑जन्न॒न्यकृ॑तेन भोजम् ।
अव्यु॑ष्टा॒ इन्नु भूय॑सीरु॒षास॒ आ नो॑ जी॒वान् व॑रुण॒ तासु॑ शाधि ॥९॥

Para rina saviradha matkritani maham rajannanyakritena bhojam
Avyushta innu bhuyasirushasa a no jivan varuna tasu shadhi

28.10

यो मे॑ राज॒न् युज्यो॑ वा॒ सखा॑ वा॒ स्वप्ने॑ भ॒यं भी॒रवे॒ मह्य॒माह॑ ।
स्ते॒नो वा॒ यो दिप्स॑ति नो॒ वृको॑ वा॒ त्वं तस्मा॑द् वरुण पाह्य॒स्मान् ॥१०॥

Yo me rajan yujyo va sakha va svapne bhayam bhirave mahyamaha
Steno va yo dipsati no vriko va tvam tasmad varuna pahyasman

28.11

माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः ।
मा रा॒यो रा॑जन् त्सु॒यमा॒दव॑ स्थां बृ॒हद् व॑देम वि॒दथे॑ सु॒वीरा॑ः ॥११॥

Maham maghono varuna priyasya bhuridavna a vidam shunamapeh
Ma rayo rajan tsuyamadava stham brihad vadema vidathe suvirah