Sukta 27

27.1

17 kurmo gartsamado, gritsamado va, adityah, trishtup

इ॒मा गिर॑ आदि॒त्येभ्यो॑ घृ॒तस्नू॑ः स॒नाद् राज॑भ्यो जु॒ह्वा॑ जुहोमि ।
शृ॒णोतु॑ मि॒त्रो अ॑र्य॒मा भगो॑ नस्तुविजा॒तो वरु॑णो॒ दक्षो॒ अंश॑ः ॥१॥

Ima gira adityebhyo ghritasnuh sanad rajabhyo juhva juhomi
Shrinotu mitro aryama bhago nastuvijato varuno daksho anshah

27.2

इ॒मं स्तोमं॒ सक्र॑तवो मे अ॒द्य मि॒त्रो अ॑र्य॒मा वरु॑णो जुषन्त ।
आ॒दि॒त्यास॒ः शुच॑यो॒ धार॑पूता॒ अवृ॑जिना अनव॒द्या अरि॑ष्टाः ॥२॥

Imam stomam sakratavo me adya mitro aryama varuno jushanta
Adityasah shuchayo dharaputa avrijina anavadya arishtah

27.3

त आ॑दि॒त्यास॑ उ॒रवो॑ गभी॒रा अद॑ब्धासो॒ दिप्स॑न्तो भूर्य॒क्षाः ।
अ॒न्तः प॑श्यन्ति वृजि॒नोत सा॒धु सर्वं॒ राज॑भ्यः पर॒मा चि॒दन्ति॑ ॥३॥

Ta adityasa uravo gabhira adabdhaso dipsanto bhuryakshah
Antah pashyanti vrijinota sadhu sarvam rajabhyah parama chidanti

27.4

धा॒रय॑न्त आदि॒त्यासो॒ जग॒त् स्था दे॒वा विश्व॑स्य॒ भुव॑नस्य गो॒पाः ।
दी॒र्घाधि॑यो॒ रक्ष॑माणा असु॒र्य॑मृ॒तावा॑न॒श्चय॑माना ऋ॒णानि॑ ॥४॥

Dharayanta adityaso jagat stha deva vishvasya bhuvanasya gopah
Dirghadhiyo rakshamana asuryamritavanashchayamana rinani

27.5

वि॒द्यामा॑दित्या॒ अव॑सो वो अ॒स्य यद॑र्यमन् भ॒य आ चि॑न्मयो॒भु ।
यु॒ष्माकं॑ मित्रावरुणा॒ प्रणी॑तौ॒ परि॒ श्वभ्रे॑व दुरि॒तानि॑ वृज्याम् ॥५॥

Vidyamaditya avaso vo asya yadaryaman bhaya a chinmayobhu
Yushmakam mitravaruna pranitau pari shvabhreva duritani vrijyam

27.6

सु॒गो हि वो॑ अर्यमन्मित्र॒ पन्था॑ अनृक्ष॒रो व॑रुण सा॒धुरस्ति॑ ।
तेना॑दित्या॒ अधि॑ वोचता नो॒ यच्छ॑ता नो दुष्परि॒हन्तु॒ शर्म॑ ॥६॥

Sugo hi vo aryamanmitra pantha anriksharo varuna sadhurasti
Tenaditya adhi vochata no yachchhata no dushparihantu sharma

27.7

पिप॑र्तु नो॒ अदि॑ती॒ राज॑पु॒त्रा ऽति॒ द्वेषां॑स्यर्य॒मा सु॒गेभि॑ः ।
बृ॒हन्मि॒त्रस्य॒ वरु॑णस्य॒ शर्मोप॑ स्याम पुरु॒वीरा॒ अरि॑ष्टाः ॥७॥

Pipartu no aditi rajaputra ti dveshansyaryama sugebhih
Brihanmitrasya varunasya sharmopa syama puruvira arishtah

27.8

ति॒स्रो भूमी॑र्धारय॒न् त्रीँरु॒त द्यून् त्रीणि॑ व्र॒ता वि॒दथे॑ अ॒न्तरे॑षाम् ।
ऋ॒तेना॑दित्या॒ महि॑ वो महि॒त्वं तद॑र्यमन् वरुण मित्र॒ चारु॑ ॥८॥

Tisro bhumirdharayan trinruta dyun trini vrata vidathe antaresham
Ritenaditya mahi vo mahitvam tadaryaman varuna mitra charu

27.9

त्री रो॑च॒ना दि॒व्या धा॑रयन्त हिर॒ण्यया॒ः शुच॑यो॒ धार॑पूताः ।
अस्व॑प्नजो अनिमि॒षा अद॑ब्धा उरु॒शंसा॑ ऋ॒जवे॒ मर्त्या॑य ॥९॥

Tri rochana divya dharayanta hiranyayah shuchayo dharaputah
Asvapnajo animisha adabdha urushansa rijave martyaya

27.10

त्वं विश्वे॑षां वरुणासि॒ राजा॒ ये च॑ दे॒वा अ॑सुर॒ ये च॒ मर्ता॑ः ।
श॒तं नो॑ रास्व श॒रदो॑ वि॒चक्षे॒ ऽश्यामायूं॑षि॒ सुधि॑तानि॒ पूर्वा॑ ॥१०॥

Tvam vishvesham varunasi raja ye cha deva asura ye cha martah
Shatam no rasva sharado vichakshe shyamayunshi sudhitani purva

27.11

न द॑क्षि॒णा वि चि॑किते॒ न स॒व्या न प्रा॒चीन॑मादित्या॒ नोत प॒श्चा ।
पा॒क्या॑ चिद् वसवो धी॒र्या॑ चिद् यु॒ष्मानी॑तो॒ अभ॑यं॒ ज्योति॑रश्याम् ॥११॥

Na dakshina vi chikite na savya na prachinamaditya nota pashcha
Pakya chid vasavo dhirya chid yushmanito abhayam jyotirashyam

27.12

यो राज॑भ्य ऋत॒निभ्यो॑ द॒दाश॒ यं व॒र्धय॑न्ति पु॒ष्टय॑श्च॒ नित्या॑ः ।
स रे॒वान् या॑ति प्रथ॒मो रथे॑न वसु॒दावा॑ वि॒दथे॑षु प्रश॒स्तः ॥१२॥

Yo rajabhya ritanibhyo dadasha yam vardhayanti pushtayashcha nityah
Sa revan yati prathamo rathena vasudava vidatheshu prashastah

27.13

शुचि॑र॒पः सू॒यव॑सा॒ अद॑ब्ध॒ उप॑ क्षेति वृ॒द्धव॑याः सु॒वीर॑ः ।
नकि॒ष्टं घ्न॒न्त्यन्ति॑तो॒ न दू॒राद् य आ॑दि॒त्यानां॒ भव॑ति॒ प्रणी॑तौ ॥१३॥

Shuchirapah suyavasa adabdha upa ksheti vriddhavayah suvirah
Nakishtam ghnantyantito na durad ya adityanam bhavati pranitau

27.14

अदि॑ते॒ मित्र॒ वरु॑णो॒त मृ॑ळ॒ यद्वो॑ व॒यं च॑कृ॒मा कच्चि॒दाग॑ः ।
उ॒र्व॑श्या॒मभ॑यं॒ ज्योति॑रिन्द्र॒ मा नो॑ दी॒र्घा अ॒भि न॑श॒न्तमि॑स्राः ॥१४॥

Adite mitra varunota mrila yadvo vayam chakrima kachchidagah
Urvashyamabhayam jyotirindra ma no dirgha abhi nashantamisrah

27.15

उ॒भे अ॑स्मै पीपयतः समी॒ची दि॒वो वृ॒ष्टिं सु॒भगो॒ नाम॒ पुष्य॑न् ।
उ॒भा क्षया॑वा॒जय॑न् याति पृ॒त्सूभावर्धौ॑ भवतः सा॒धू अ॑स्मै ॥१५॥

Ubhe asmai pipayatah samichi divo vrishtim subhago nama pushyan
Ubha kshayavajayan yati pritsubhavardhau bhavatah sadhu asmai

27.16

या वो॑ मा॒या अ॑भि॒द्रुहे॑ यजत्रा॒ः पाशा॑ आदित्या रि॒पवे॒ विचृ॑त्ताः ।
अ॒श्वीव॒ ताँ अति॑ येषं॒ रथे॒नारि॑ष्टा उ॒रावा शर्म॑न्त्स्याम ॥१६॥

Ya vo maya abhidruhe yajatrah pasha aditya ripave vichrittah
Ashviva tam ati yesham rathenarishta urava sharmantsyama

27.17

माहं म॒घोनो॑ वरुण प्रि॒यस्य॑ भूरि॒दाव्न॒ आ वि॑दं॒ शून॑मा॒पेः ।
मा रा॒यो रा॑जन्त् त्सु॒यमा॒दव॑ स्थां बृ॒हद् व॑देम वि॒दथे॑ सु॒वीरा॑ः ॥१७॥

Maham maghono varuna priyasya bhuridavna a vidam shunamapeh
Ma rayo rajant tsuyamadava stham brihad vadema vidathe suvirah