সূক্ত 27

27.1

১৭ কূর্মো গার্ত্সমদো, গৃত্সমদো বা। আদিত্যাঃ । ত্রিষ্টুপ্।

ইমা গির আদিত্যেভ্যো ঘৃতস্নূঃ সনাদ্ রাজভ্যো জুহ্বা জুহোমি ।
শৃণোতু মিত্রো অর্যমা ভগো নস্তুবিজাতো বরুণো দক্ষো অংশঃ ॥১॥

ইমং স্তোমং সক্রতবো মে অদ্য মিত্রো অর্যমা বরুণো জুষন্ত ।
আদিত্যাসঃ শুচয়ো ধারপূতা অবৃজিনা অনবদ্যা অরিষ্টাঃ ॥২॥

ত আদিত্যাস উরবো গভীরা অদব্ধাসো দিপ্সন্তো ভূর্যক্ষাঃ ।
অন্তঃ পশ্যন্তি বৃজিনোত সাধু সর্বং রাজভ্যঃ পরমা চিদন্তি ॥৩॥

ধারয়ন্ত আদিত্যাসো জগৎ স্থা দেবা বিশ্বস্য ভুবনস্য গোপাঃ ।
দীর্ঘাধিয়ো রক্ষমাণা অসুর্যমৃতাবানশ্চয়মানা ঋণানি ॥৪॥

বিদ্যামাদিত্যা অবসো বো অস্য যদর্যমন্ ভয় আ চিন্ময়োভু ।
যুষ্মাকং মিত্রাবরুণা প্রণীতৌ পরি শ্বভ্রেব দুরিতানি বৃজ্যাম্ ॥৫॥

সুগো হি বো অর্যমন্মিত্র পন্থা অনৃক্ষরো বরুণ সাধুরস্তি ।
তেনাদিত্যা অধি বোচতা নো যচ্ছতা নো দুষ্পরিহন্তু শর্ম ॥৬॥

পিপর্তু নো অদিতী রাজপুত্রা ঽতি দ্বেষাংস্যর্যমা সুগেভিঃ ।
বৃহন্মিত্রস্য বরুণস্য শর্মোপ স্যাম পুরুবীরা অরিষ্টাঃ ॥৭॥

তিস্রো ভূমীর্ধারয়ন্ ত্রীঁরুত দ্যূন্ ত্রীণি ব্রতা বিদথে অন্তরেষাম্ ।
ঋতেনাদিত্যা মহি বো মহিত্বং তদর্যমন্ বরুণ মিত্র চারু ॥৮॥

ত্রী রোচনা দিব্যা ধারয়ন্ত হিরণ্যয়াঃ শুচয়ো ধারপূতাঃ ।
অস্বপ্নজো অনিমিষা অদব্ধা উরুশংসা ঋজবে মর্ত্যায় ॥৯॥

ত্বং বিশ্বেষাং বরুণাসি রাজা যে চ দেবা অসুর যে চ মর্তাঃ ।
শতং নো রাস্ব শরদো বিচক্ষে ঽশ্যামায়ূংষি সুধিতানি পূর্বা ॥১০॥

ন দক্ষিণা বি চিকিতে ন সব্যা ন প্রাচীনমাদিত্যা নোত পশ্চা ।
পাক্যা চিদ্ বসবো ধীর্যা চিদ্ যুষ্মানীতো অভয়ং জ্যোতিরশ্যাম্ ॥১১॥

যো রাজভ্য ঋতনিভ্যো দদাশ যং বর্ধয়ন্তি পুষ্টয়শ্চ নিত্যাঃ ।
স রেবান্ যাতি প্রথমো রথেন বসুদাবা বিদথেষু প্রশস্তঃ ॥১২॥

শুচিরপঃ সূয়বসা অদব্ধ উপ ক্ষেতি বৃদ্ধবয়াঃ সুবীরঃ ।
নকিষ্টং ঘ্নন্ত্যন্তিতো ন দূরাদ্ য আদিত্যানাং ভবতি প্রণীতৌ ॥১৩॥

অদিতে মিত্র বরুণোত মৃল যদ্বো বয়ং চকৃমা কচ্চিদাগঃ ।
উর্বশ্যামভয়ং জ্যোতিরিন্দ্র মা নো দীর্ঘা অভি নশন্তমিস্রাঃ ॥১৪॥

উভে অস্মৈ পীপয়তঃ সমীচী দিবো বৃষ্টিং সুভগো নাম পুষ্যন্ ।
উভা ক্ষয়াবাজয়ন্ যাতি পৃত্সূভাবর্ধৌ ভবতঃ সাধূ অস্মৈ ॥১৫॥

যা বো মায়া অভিদ্রুহে যজত্রাঃ পাশা আদিত্যা রিপবে বিচৃত্তাঃ ।
অশ্বীব তাঁ অতি যেষং রথেনারিষ্টা উরাবা শর্মন্ত্স্যাম ॥১৬॥

মাহং মঘোনো বরুণ প্রিয়স্য ভূরিদাব্ন আ বিদং শূনমাপেঃ ।
মা রায়ো রাজন্ৎ ত্সুয়মাদব স্থাং বৃহদ্ বদেম বিদথে সুবীরাঃ ॥১৭॥