সূক্ত 28

28.1

১১ কূর্মো গার্ত্সমদো, গৃত্সমদো বা। বরুণঃ (১০ দুঃস্বপ্ননাশিনীঃ)। ত্রিষ্টুপ্।

ইদং কবেরাদিত্যস্য স্বরাজো বিশ্বানি সান্ত্যভ্যস্তু মহ্না ।
অতি যো মন্দ্রো যজথায় দেবঃ সুকীর্তিং ভিক্ষে বরুণস্য ভূরেঃ ॥১॥

28.2

তব ব্রতে সুভগাসঃ স্যাম স্বাধ্যো বরুণ তুষ্টুবাংসঃ ।
উপায়ন উষসাং গোমতীনামগ্নয়ো ন জরমাণা অনু দ্যূন্ ॥২॥

28.3

তব স্যাম পুরুবীরস্য শর্মন্নুরুশংসস্য বরুণ প্রণেতঃ ।
যূয়ং নঃ পুত্রা অদিতেরদব্ধা অভি ক্ষমধ্বং যুজ্যায় দেবাঃ ॥৩॥

28.4

প্র সীমাদিত্যো অসৃজদ্বিধর্তাঁ ঋতং সিন্ধবো বরুণস্য যন্তি ।
ন শ্রাম্যন্তি ন বি মুচন্ত্যেতে বয়ো ন পপ্তূ রঘুয়া পরিজ্মন্ ॥৪॥

28.5

বি মচ্ছ্রথায় রশনামিবাগ ঋধ্যাম তে বরুণ খামৃতস্য ।
মা তন্তুশ্ছেদি বয়তো ধিয়ং মে মা মাত্রা শার্যপসঃ পুর ঋতোঃ ॥৫॥

28.6

অপো সু ম্যক্ষ বরুণ ভিয়সং মত্সম্রালৃতাবোঽনু মা গৃভায় ।
দামেব বত্সাদ্ বি মুমুগ্ধ্যংহো নহি ত্বদারে নিমিষশ্চনেশে ॥৬॥

28.7

মা নো বধৈর্বরুণ যে ত ইষ্টাবেনঃ কৃণ্বন্তমসুর ভ্রীণন্তি ।
মা জ্যোতিষঃ প্রবসথানি গন্ম বি ষূ মৃধঃ শিশ্রথো জীবসে নঃ ॥৭॥

28.8

নমঃ পুরা তে বরুণোত নূনমুতাপরং তুবিজাত ব্রবাম ।
ত্বে হি কং পর্বতে ন শ্রিতান্যপ্রচ্যুতানি দূলভ ব্রতানি ॥৮॥

28.9

পর ঋণা সাবীরধ মত্কৃতানি মাহং রাজন্নন্যকৃতেন ভোজম্ ।
অব্যুষ্টা ইন্নু ভূয়সীরুষাস আ নো জীবান্ বরুণ তাসু শাধি ॥৯॥

28.10

যো মে রাজন্ যুজ্যো বা সখা বা স্বপ্নে ভয়ং ভীরবে মহ্যমাহ ।
স্তেনো বা যো দিপ্সতি নো বৃকো বা ত্বং তস্মাদ্ বরুণ পাহ্যস্মান্ ॥১০॥

28.11

মাহং মঘোনো বরুণ প্রিয়স্য ভূরিদাব্ন আ বিদং শূনমাপেঃ ।
মা রায়ো রাজন্ ত্সুয়মাদব স্থাং বৃহদ্ বদেম বিদথে সুবীরাঃ ॥১১॥