সূক্ত 16

16.1

৯ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ইন্দ্রঃ। জগতী, ৯ ত্রিষ্টুপ্।

প্র বঃ সতাং জ্যেষ্ঠতমায় সুষ্টুতিমগ্নাবিব সমিধানে হবির্ভরে ।
ইন্দ্রমজুর্যং জরয়ন্তমুক্ষিতং সনাদ্ যুবানমবসে হবামহে ॥১॥

যস্মাদিন্দ্রাদ্ বৃহতঃ কিং চনেমৃতে বিশ্বান্যস্মিন্ ত্সংভৃতাধি বীর্যা ।
জঠরে সোমং তন্বী৩ সহো মহো হস্তে বজ্রং ভরতি শীর্ষণি ক্রতুম্ ॥২॥

ন ক্ষোণীভ্যাং পরিভ্বে ত ইন্দ্রিয়ং ন সমুদ্রৈঃ পর্বতৈরিন্দ্র তে রথঃ ।
ন তে বজ্রমন্বশ্নোতি কশ্চন যদাশুভিঃ পতসি যোজনা পুরু ॥৩॥

বিশ্বে হ্যস্মৈ যজতায় ধৃষ্ণবে ক্রতুং ভরন্তি বৃষভায় সশ্চতে ।
বৃষা যজস্ব হবিষা বিদুষ্টরঃ পিবেন্দ্র সোমং বৃষভেণ ভানুনা ॥৪॥

বৃষ্ণঃ কোশঃ পবতে মধ্ব ঊর্মির্বৃষভান্নায় বৃষভায় পাতবে ।
বৃষণাধ্বর্যূ বৃষভাসো অদ্রয়ো বৃষণং সোমং বৃষভায় সুষ্বতি ॥৫॥

বৃষা তে বজ্র উত তে বৃষা রথো বৃষণা হরী বৃষভাণ্যায়ুধা ।
বৃষ্ণো মদস্য বৃষভ ত্বমীশিষ ইন্দ্র সোমস্য বৃষভস্য তৃপ্ণুহি ॥৬॥

প্র তে নাবং ন সমনে বচস্যুবং ব্রহ্মণা যামি সবনেষু দাধৃষিঃ ।
কুবিন্নো অস্য বচসো নিবোধিষদিন্দ্রমুত্সং ন বসুনঃ সিচামহে ॥৭॥

পুরা সম্বাধাদভ্যা ববৃত্স্ব নো ধেনুর্ন বত্সং যবসস্য পিপ্যুষী ।
সকৃত্সু তে সুমতিভিঃ শতক্রতো সং পত্নীভির্ন বৃষণো নসীমহি ॥৮॥

নূনং সা তে প্রতি বরং জরিত্রে দুহীয়দিন্দ্র দক্ষিণা মঘোনী ।
শিক্ষা স্তোতৃভ্যো মাতি ধগ্ভগো নো বৃহদ্ বদেম বিদথে সুবীরাঃ ॥৯॥