Sukta 16

16.1

9 gritsamada (angirasah shaunahotrah pashchad) bhargavah shaunakah, indrah, jagati, 9 trishtup

प्र व॑ः स॒तां ज्येष्ठ॑तमाय सुष्टु॒तिम॒ग्नावि॑व समिधा॒ने ह॒विर्भ॑रे ।
इन्द्र॑मजु॒र्यं ज॒रय॑न्तमुक्षि॒तं स॒नाद् युवा॑न॒मव॑से हवामहे ॥१॥

Pra vah satam jyeshthatamaya sushtutimagnaviva samidhane havirbhare
Indramajuryam jarayantamukshitam sanad yuvanamavase havamahe

16.2

यस्मा॒दिन्द्रा॑द् बृह॒तः किं च॒नेमृ॒ते विश्वा॑न्यस्मि॒न् त्संभृ॒ताधि॑ वी॒र्या॑ ।
ज॒ठरे॒ सोमं॑ त॒न्वी॒३ सहो॒ महो॒ हस्ते॒ वज्रं॒ भर॑ति शी॒र्षणि॒ क्रतु॑म् ॥२॥

Yasmadindrad brihatah kim chanemrite vishvanyasmin tsambhritadhi virya
Jathare somam tanvi3 saho maho haste vajram bharati shirshani kratum

16.3

न क्षो॒णीभ्यां॑ परि॒भ्वे॑ त इन्द्रि॒यं न स॑मु॒द्रैः पर्व॑तैरिन्द्र ते॒ रथ॑ः ।
न ते॒ वज्र॒मन्व॑श्नोति॒ कश्च॒न यदा॒शुभि॒ः पत॑सि॒ योज॑ना पु॒रु ॥३॥

Na kshonibhyam paribhve ta indriyam na samudraih parvatairindra te rathah
Na te vajramanvashnoti kashchana yadashubhih patasi yojana puru

16.4

विश्वे॒ ह्य॑स्मै यज॒ताय॑ धृ॒ष्णवे॒ क्रतुं॒ भर॑न्ति वृष॒भाय॒ सश्च॑ते ।
वृषा॑ यजस्व ह॒विषा॑ वि॒दुष्ट॑र॒ः पिबे॑न्द्र॒ सोमं॑ वृष॒भेण॑ भा॒नुना॑ ॥४॥

Vishve hyasmai yajataya dhrishnave kratum bharanti vrishabhaya sashchate
Vrisha yajasva havisha vidushtarah pibendra somam vrishabhena bhanuna

16.5

वृष्ण॒ः कोश॑ः पवते॒ मध्व॑ ऊ॒र्मिर्वृ॑ष॒भान्ना॑य वृष॒भाय॒ पात॑वे ।
वृष॑णाध्व॒र्यू वृ॑ष॒भासो॒ अद्र॑यो॒ वृष॑णं॒ सोमं॑ वृष॒भाय॑ सुष्वति ॥५॥

Vrishnah koshah pavate madhva urmirvrishabhannaya vrishabhaya patave
Vrishanadhvaryu vrishabhaso adrayo vrishanam somam vrishabhaya sushvati

16.6

वृषा॑ ते॒ वज्र॑ उ॒त ते॒ वृषा॒ रथो॒ वृष॑णा॒ हरी॑ वृष॒भाण्यायु॑धा ।
वृष्णो॒ मद॑स्य वृषभ॒ त्वमी॑शिष॒ इन्द्र॒ सोम॑स्य वृष॒भस्य॑ तृप्णुहि ॥६॥

Vrisha te vajra uta te vrisha ratho vrishana hari vrishabhanyayudha
Vrishno madasya vrishabha tvamishisha indra somasya vrishabhasya tripnuhi

16.7

प्र ते॒ नावं॒ न सम॑ने वच॒स्युवं॒ ब्रह्म॑णा यामि॒ सव॑नेषु॒ दाधृ॑षिः ।
कु॒विन्नो॑ अ॒स्य वच॑सो नि॒बोधि॑ष॒दिन्द्र॒मुत्सं॒ न वसु॑नः सिचामहे ॥७॥

Pra te navam na samane vachasyuvam brahmana yami savaneshu dadhrishih
Kuvinno asya vachaso nibodhishadindramutsam na vasunah sichamahe

16.8

पु॒रा स॑म्बा॒धाद॒भ्या व॑वृत्स्व नो धे॒नुर्न व॒त्सं यव॑सस्य पि॒प्युषी॑ ।
स॒कृत्सु ते॑ सुम॒तिभि॑ः शतक्रतो॒ सं पत्नी॑भि॒र्न वृष॑णो नसीमहि ॥८॥

Pura sambadhadabhya vavritsva no dhenurna vatsam yavasasya pipyushi
Sakritsu te sumatibhih shatakrato sam patnibhirna vrishano nasimahi

16.9

नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑ः ॥९॥

Nunam sa te prati varam jaritre duhiyadindra dakshina maghoni
Shiksha stotribhyo mati dhagbhago no brihad vadema vidathe suvirah