Sukta 17

17.1

9 gritsamada (angirasah shaunahotrah pashchad) bhargavah shaunakah, indrah, jagati, 8-9 trishtup

तद॑स्मै॒ नव्य॑मङ्गिर॒स्वद॑र्चत॒ शुष्मा॒ यद॑स्य प्र॒त्नथो॒दीर॑ते ।
विश्वा॒ यद् गो॒त्रा सह॑सा॒ परी॑वृता॒ मदे॒ सोम॑स्य दृंहि॒तान्यैर॑यत् ॥१॥

Tadasmai navyamangirasvadarchata shushma yadasya pratnathodirate
Vishva yad gotra sahasa parivrita made somasya drinhitanyairayat

17.2

स भू॑तु॒ यो ह॑ प्रथ॒माय॒ धाय॑स॒ ओजो॒ मिमा॑नो महि॒मान॒माति॑रत् ।
शूरो॒ यो यु॒त्सु त॒न्वं॑ परि॒व्यत॑ शी॒र्षणि॒ द्यां म॑हि॒ना प्रत्य॑मुञ्चत ॥२॥

Sa bhutu yo ha prathamaya dhayasa ojo mimano mahimanamatirat
Shuro yo yutsu tanvam parivyata shirshani dyam mahina pratyamunchata

17.3

अधा॑कृणोः प्रथ॒मं वी॒र्यं॑ म॒हद् यद॒स्याग्रे॒ ब्रह्म॑णा॒ शुष्म॒मैर॑यः ।
र॒थे॒ष्ठेन॒ हर्य॑श्वेन॒ विच्यु॑ता॒ः प्र जी॒रय॑ः सिस्रते स॒ध्र्य१क्पृथ॑क् ॥३॥

Adhakrinoh prathamam viryam mahad yadasyagre brahmana shushmamairayah
Ratheshthena haryashvena vichyutah pra jirayah sisrate sadhrya1kprithak

17.4

अधा॒ यो विश्वा॒ भुव॑ना॒भि म॒ज्मने॑शान॒कृत् प्रव॑या अ॒भ्यव॑र्धत ।
आद् रोद॑सी॒ ज्योति॑षा॒ वह्नि॒रात॑नो॒त् सीव्य॒न् तमां॑सि॒ दुधि॑ता॒ सम॑व्ययत् ॥४॥

Adha yo vishva bhuvanabhi majmaneshanakrit pravaya abhyavardhata
Ad rodasi jyotisha vahniratanot sivyan tamansi dudhita samavyayat

17.5

स प्रा॒चीना॒न् पर्व॑तान् दृंह॒दोज॑सा ऽधरा॒चीन॑मकृणोद॒पामप॑ः ।
अधा॑रयत् पृथि॒वीं वि॒श्वधा॑यस॒मस्त॑भ्नान्मा॒यया॒ द्याम॑व॒स्रस॑ः ॥५॥

Sa prachinan parvatan drinhadojasa dharachinamakrinodapamapah
Adharayat prithivim vishvadhayasamastabhnanmayaya dyamavasrasah

17.6

सास्मा॒ अरं॑ बा॒हुभ्यां॒ यं पि॒ताकृ॑णो॒द्विश्व॑स्मा॒दा ज॒नुषो॒ वेद॑स॒स्परि॑ ।
येना॑ पृथि॒व्यां नि क्रिविं॑ श॒यध्यै॒ वज्रे॑ण ह॒त्व्यवृ॑णक् तुवि॒ष्वणि॑ः ॥६॥

Sasma aram bahubhyam yam pitakrinodvishvasmada janusho vedasaspari
Yena prithivyam ni krivim shayadhyai vajrena hatvyavrinak tuvishvanih

17.7

अ॒मा॒जूरि॑व पि॒त्रोः सचा॑ स॒ती स॑मा॒नादा सद॑स॒स्त्वामि॑ये॒ भग॑म् ।
कृ॒धि प्र॑के॒तमुप॑ मा॒स्या भ॑र द॒द्धि भा॒गं त॒न्वो॒३ येन॑ मा॒मह॑ः ॥७॥

Amajuriva pitroh sacha sati samanada sadasastvamiye bhagam
Kridhi praketamupa masya bhara daddhi bhagam tanvo3 yena mamahah

17.8

भो॒जं त्वामि॑न्द्र व॒यं हु॑वेम द॒दिष्ट्वमि॒न्द्रापां॑सि॒ वाजा॑न् ।
अ॒वि॒ड्ढी॑न्द्र चि॒त्रया॑ न ऊ॒ती कृ॒धि वृ॑षन्निन्द्र॒ वस्य॑सो नः ॥८॥

Bhojam tvamindra vayam huvema dadishtvamindrapansi vajan
Aviddhindra chitraya na uti kridhi vrishannindra vasyaso nah

17.9

नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑ः ॥९॥

Nunam sa te prati varam jaritre duhiyadindra dakshina maghoni
Shiksha stotribhyo mati dhagbhago no brihad vadema vidathe suvirah