Sukta 18

18.1

9 gritsamada (angirasah shaunahotrah pashchad) bhargavah shaunakah, indrah, trishtup

प्रा॒ता रथो॒ नवो॑ योजि॒ सस्नि॒श्चतु॑र्युगस्त्रिक॒शः स॒प्तर॑श्मिः ।
दशा॑रित्रो मनु॒ष्य॑ः स्व॒र्षाः स इ॒ष्टिभि॑र्म॒तिभी॒ रंह्यो॑ भूत् ॥१॥

Prata ratho navo yoji sasnishchaturyugastrikashah saptarashmih
Dasharitro manushyah svarshah sa ishtibhirmatibhi ranhyo bhut

18.2

सास्मा॒ अरं॑ प्रथ॒मं स द्वि॒तीय॑मु॒तो तृ॒तीयं॒ मनु॑ष॒ः स होता॑ ।
अ॒न्यस्या॒ गर्भ॑म॒न्य ऊ॑ जनन्त॒ सो अ॒न्येभि॑ः सचते॒ जेन्यो॒ वृषा॑ ॥२॥

Sasma aram prathamam sa dvitiyamuto tritiyam manushah sa hota
Anyasya garbhamanya u jananta so anyebhih sachate jenyo vrisha

18.3

हरी॒ नु कं॒ रथ॒ इन्द्र॑स्य योजमा॒यै सू॒क्तेन॒ वच॑सा॒ नवे॑न ।
मो षु त्वामत्र॑ ब॒हवो॒ हि विप्रा॒ नि री॑रम॒न् यज॑मानासो अ॒न्ये ॥३॥

Hari nu kam ratha indrasya yojamayai suktena vachasa navena
Mo shu tvamatra bahavo hi vipra ni riraman yajamanaso anye

18.4

आ द्वाभ्यां॒ हरि॑भ्यामिन्द्र या॒ह्या च॒तुर्भि॒रा ष॒ड्भिर्हू॒यमा॑नः ।
आष्टा॒भिर्द॒शभि॑ः सोम॒पेय॑म॒यं सु॒तः सु॑मख॒ मा मृध॑स्कः ॥४॥

A dvabhyam haribhyamindra yahya chaturbhira shadbhirhuyamanah
Ashtabhirdashabhih somapeyamayam sutah sumakha ma mridhaskah

18.5

आ विं॑श॒त्या त्रिं॒शता॑ याह्य॒र्वाङा च॑त्वारिं॒शता॒ हरि॑भिर्युजा॒नः ।
आ प॑ञ्चा॒शता॑ सु॒रथे॑भिरि॒न्द्रा ऽऽ ष॒ष्ट्या स॑प्त॒त्या सो॑म॒पेय॑म् ॥५॥

A vinshatya trinshata yahyarvanga chatvarinshata haribhiryujanah
A panchashata surathebhirindra shashtya saptatya somapeyam

18.6

आशी॒त्या न॑व॒त्या या॑ह्य॒र्वाङा श॒तेन॒ हरि॑भिरु॒ह्यमा॑नः ।
अ॒यं हि ते॑ शु॒नहो॑त्रेषु॒ सोम॒ इन्द्र॑ त्वा॒या परि॑षिक्तो॒ मदा॑य ॥६॥

Ashitya navatya yahyarvanga shatena haribhiruhyamanah
Ayam hi te shunahotreshu soma indra tvaya parishikto madaya

18.7

मम॒ ब्रह्मे॑न्द्र या॒ह्यच्छा॒ विश्वा॒ हरी॑ धु॒रि धि॑ष्वा॒ रथ॑स्य ।
पु॒रु॒त्रा हि वि॒हव्यो॑ ब॒भूथा॒स्मिञ्छू॑र॒ सव॑ने मादयस्व ॥७॥

Mama brahmendra yahyachchha vishva hari dhuri dhishva rathasya
Purutra hi vihavyo babhuthasminchhura savane madayasva

18.8

न म॒ इन्द्रे॑ण स॒ख्यं वि यो॑षद॒स्मभ्य॑मस्य॒ दक्षि॑णा दुहीत ।
उप॒ ज्येष्ठे॒ वरू॑थे॒ गभ॑स्तौ प्रा॒येप्रा॑ये जिगी॒वांस॑ः स्याम ॥८॥

Na ma indrena sakhyam vi yoshadasmabhyamasya dakshina duhita
Upa jyeshthe varuthe gabhastau prayepraye jigivansah syama

18.9

नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑ः ॥९॥

Nunam sa te prati varam jaritre duhiyadindra dakshina maghoni
Shiksha stotribhyo mati dhagbhago no brihad vadema vidathe suvirah