Sukta 19

19.1

9 gritsamada (angirasah shaunahotrah pashchad) bhargavah shaunakah, indrah, trishtup

अपा॑य्य॒स्यान्ध॑सो॒ मदा॑य॒ मनी॑षिणः सुवा॒नस्य॒ प्रय॑सः ।
यस्मि॒न्निन्द्र॑ः प्र॒दिवि॑ वावृधा॒न ओको॑ द॒धे ब्र॑ह्म॒ण्यन्त॑श्च॒ नर॑ः ॥१॥

Apayyasyandhaso madaya manishinah suvanasya prayasah
Yasminnindrah pradivi vavridhana oko dadhe brahmanyantashcha narah

अ॒स्य म॑न्दा॒नो मध्वो॒ वज्र॑ह॒स्तो ऽहि॒मिन्द्रो॑ अर्णो॒वृतं॒ वि वृ॑श्चत् ।
प्र यद् वयो॒ न स्वस॑रा॒ण्यच्छा॒ प्रयां॑सि च न॒दीनां॒ चक्र॑मन्त ॥२॥

Asya mandano madhvo vajrahasto himindro arnovritam vi vrishchat
Pra yad vayo na svasaranyachchha prayansi cha nadinam chakramanta

स माहि॑न॒ इन्द्रो॒ अर्णो॑ अ॒पां प्रैर॑यदहि॒हाच्छा॑ समु॒द्रम् ।
अज॑नय॒त् सूर्यं॑ वि॒दद्गा अ॒क्तुनाह्नां॑ व॒युना॑नि साधत् ॥३॥

Sa mahina indro arno apam prairayadahihachchha samudram
Ajanayat suryam vidadga aktunahnam vayunani sadhat

सो अ॑प्र॒तीनि॒ मन॑वे पु॒रूणीन्द्रो॑ दाशद् दा॒शुषे॒ हन्ति॑ वृ॒त्रम् ।
स॒द्यो यो नृभ्यो॑ अत॒साय्यो॒ भूत्प॑स्पृधा॒नेभ्य॒ः सूर्य॑स्य सा॒तौ ॥४॥

So apratini manave purunindro dashad dashushe hanti vritram
Sadyo yo nribhyo atasayyo bhutpaspridhanebhyah suryasya satau

स सु॑न्व॒त इन्द्र॒ः सूर्य॒मा ऽऽ दे॒वो रि॑ण॒ङ्मर्त्या॑य स्त॒वान् ।
आ यद् र॒यिं गु॒हद॑वद्यमस्मै॒ भर॒दंशं॒ नैत॑शो दश॒स्यन् ॥५॥

Sa sunvata indrah suryama devo rinanmartyaya stavan
A yad rayim guhadavadyamasmai bharadansham naitasho dashasyan

स र॑न्धयत्स॒दिव॒ः सार॑थये॒ शुष्ण॑म॒शुषं॒ कुय॑वं॒ कुत्सा॑य ।
दिवो॑दासाय नव॒तिं च॒ नवेन्द्र॒ः पुरो॒ व्यै॑र॒च्छम्ब॑रस्य ॥६॥

Sa randhayatsadivah sarathaye shushnamashusham kuyavam kutsaya
Divodasaya navatim cha navendrah puro vyairachchhambarasya

ए॒वा त॑ इन्द्रो॒चथ॑महेम श्रव॒स्या न त्मना॑ वा॒जय॑न्तः ।
अ॒श्याम॒ तत् साप्त॑माशुषा॒णा न॒नमो॒ वध॒रदे॑वस्य पी॒योः ॥७॥

Eva ta indrochathamahema shravasya na tmana vajayantah
Ashyama tat saptamashushana nanamo vadharadevasya piyoh

ए॒वा ते॑ गृत्सम॒दाः शू॑र॒ मन्मा॑व॒स्यवो॒ न व॒युना॑नि तक्षुः ।
ब्र॒ह्म॒ण्यन्त॑ इन्द्र ते॒ नवी॑य॒ इष॒मूर्जं॑ सुक्षि॒तिं सु॒म्नम॑श्युः ॥८॥

Eva te gritsamadah shura manmavasyavo na vayunani takshuh
Brahmanyanta indra te naviya ishamurjam sukshitim sumnamashyuh

नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑ः ॥९॥

Nunam sa te prati varam jaritre duhiyadindra dakshina maghoni
Shiksha stotribhyo mati dhagbhago no brihad vadema vidathe suvirah