সূক্ত 19

19.1

৯ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ইন্দ্রঃ। ত্রিষ্টুপ্।

অপায্যস্যান্ধসো মদায় মনীষিণঃ সুবানস্য প্রয়সঃ ।
যস্মিন্নিন্দ্রঃ প্রদিবি বাবৃধান ওকো দধে ব্রহ্মণ্যন্তশ্চ নরঃ ॥১॥

19.2

অস্য মন্দানো মধ্বো বজ্রহস্তো ঽহিমিন্দ্রো অর্ণোবৃতং বি বৃশ্চৎ ।
প্র যদ্ বয়ো ন স্বসরাণ্যচ্ছা প্রয়াংসি চ নদীনাং চক্রমন্ত ॥২॥

19.3

স মাহিন ইন্দ্রো অর্ণো অপাং প্রৈরয়দহিহাচ্ছা সমুদ্রম্ ।
অজনয়ৎ সূর্যং বিদদ্গা অক্তুনাহ্নাং বয়ুনানি সাধৎ ॥৩॥

19.4

সো অপ্রতীনি মনবে পুরূণীন্দ্রো দাশদ্ দাশুষে হন্তি বৃত্রম্ ।
সদ্যো যো নৃভ্যো অতসায্যো ভূত্পস্পৃধানেভ্যঃ সূর্যস্য সাতৌ ॥৪॥

19.5

স সুন্বত ইন্দ্রঃ সূর্যমা ঽঽ দেবো রিণঙ্মর্ত্যায় স্তবান্ ।
আ যদ্ রয়িং গুহদবদ্যমস্মৈ ভরদংশং নৈতশো দশস্যন্ ॥৫॥

19.6

স রন্ধয়ত্সদিবঃ সারথয়ে শুষ্ণমশুষং কুয়বং কুত্সায় ।
দিবোদাসায় নবতিং চ নবেন্দ্রঃ পুরো ব্যৈরচ্ছম্বরস্য ॥৬॥

19.7

এবা ত ইন্দ্রোচথমহেম শ্রবস্যা ন ত্মনা বাজয়ন্তঃ ।
অশ্যাম তৎ সাপ্তমাশুষাণা ননমো বধরদেবস্য পীয়োঃ ॥৭॥

19.8

এবা তে গৃত্সমদাঃ শূর মন্মাবস্যবো ন বয়ুনানি তক্ষুঃ ।
ব্রহ্মণ্যন্ত ইন্দ্র তে নবীয় ইষমূর্জং সুক্ষিতিং সুম্নমশ্যুঃ ॥৮॥

19.9

নূনং সা তে প্রতি বরং জরিত্রে দুহীয়দিন্দ্র দক্ষিণা মঘোনী ।
শিক্ষা স্তোতৃভ্যো মাতি ধগ্ভগো নো বৃহদ্ বদেম বিদথে সুবীরাঃ ॥৯॥