সূক্ত 20

20.1

৯ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ইন্দ্রঃ। ত্রিষ্টুপ্, ৩ বিরাড্ রূপা।

বয়ং তে বয় ইন্দ্র বিদ্ধি ষু ণঃ প্র ভরামহে বাজয়ুর্ন রথম্ ।
বিপন্যবো দীধ্যতো মনীষা সুম্নমিয়ক্ষন্তস্ত্বাবতো নৄন্ ॥১॥

ত্বং ন ইন্দ্র ত্বাভিরূতী ত্বায়তো অভিষ্টিপাসি জনান্ ।
ত্বমিনো দাশুষো বরূতেত্থাধীরভি যো নক্ষতি ত্বা ॥২॥

স নো যুবেন্দ্রো জোহূত্রঃ সখা শিবো নরামস্তু পাতা ।
যঃ শংসন্তং যঃ শশমানমূতী পচন্তং চ স্তুবন্তং চ প্রণেষৎ ॥৩॥

তমু স্তুষ ইন্দ্রং তং গৃণীষে যস্মিন্পুরা বাবৃধুঃ শাশদুশ্চ ।
স বস্বঃ কামং পীপরদিয়ানো ব্রহ্মণ্যতো নূতনস্যায়োঃ ॥৪॥

সো অঙ্গিরসামুচথা জুজুষ্বান্ ব্রহ্মা তূতোদিন্দ্রো গাতুমিষ্ণন্ ।
মুষ্ণন্নুষসঃ সূর্যেণ স্তবানশ্নস্য চিচ্ছিশ্নথৎ পূর্ব্যাণি ॥৫॥

স হ শ্রুত ইন্দ্রো নাম দেব ঊর্ধ্বো ভুবন্মনুষে দস্মতমঃ ।
অব প্রিয়মর্শসানস্য সাহ্বাঞ্ছিরো ভরদ্ দাসস্য স্বধাবান্ ॥৬॥

স বৃত্রহেন্দ্রঃ কৃষ্ণয়োনীঃ পুরংদরো দাসীরৈরয়দ্বি ।
অজনয়ন্মনবে ক্ষামপশ্চ সত্রা শংসং যজমানস্য তূতোৎ ॥৭॥

তস্মৈ তবস্য১মনু দায়ি সত্রেন্দ্রায় দেবেভিরর্ণসাতৌ ।
প্রতি যদস্য বজ্রং বাহ্বোর্ধুর্হত্বী দস্যূন্ পুর আয়সীর্নি তারীৎ ॥৮॥

নূনং সা তে প্রতি বরং জরিত্রে দুহীয়দিন্দ্র দক্ষিণা মঘোনী ।
শিক্ষা স্তোতৃভ্যো মাতি ধগ্ভগো নো বৃহদ্ বদেম বিদথে সুবীরাঃ ॥৯॥