Sukta 15

15.1

10 gritsamada (angirasah shaunahotrah pashchad) bhargavah shaunakah, indrah, trishtup

प्र घा॒ न्व॑स्य मह॒तो म॒हानि॑ स॒त्या स॒त्यस्य॒ कर॑णानि वोचम् ।
त्रिक॑द्रुकेष्वपिबत् सु॒तस्या॒स्य मदे॒ अहि॒मिन्द्रो॑ जघान ॥१॥

Pra gha nvasya mahato mahani satya satyasya karanani vocham
Trikadrukeshvapibat sutasyasya made ahimindro jaghana

अ॒वं॒शे द्याम॑स्तभायद् बृ॒हन्त॒मा रोद॑सी अपृणद॒न्तरि॑क्षम् ।
स धा॑रयत् पृथि॒वीं प॒प्रथ॑च्च॒ सोम॑स्य॒ ता मद॒ इन्द्र॑श्चकार ॥२॥

Avanshe dyamastabhayad brihantama rodasi aprinadantariksham
Sa dharayat prithivim paprathachcha somasya ta mada indrashchakara

सद्मे॑व॒ प्राचो॒ वि मि॑माय॒ मानै॒र्वज्रे॑ण॒ खान्य॑तृणन्न॒दीना॑म् ।
वृथा॑सृजत् प॒थिभि॑र्दीर्घया॒थैः सोम॑स्य॒ ता मद॒ इन्द्र॑श्चकार ॥३॥

Sadmeva pracho vi mimaya manairvajrena khanyatrinannadinam
Vrithasrijat pathibhirdirghayathaih somasya ta mada indrashchakara

स प्र॑वो॒ळहृन् प॑रि॒गत्या॑ द॒भीते॒र्विश्व॑मधा॒गायु॑धमि॒द्धे अ॒ग्नौ ।
सं गोभि॒रश्वै॑रसृज॒द् रथे॑भि॒ः सोम॑स्य॒ ता मद॒ इन्द्र॑श्चकार ॥४॥

Sa pravolahrin parigatya dabhitervishvamadhagayudhamiddhe agnau
Sam gobhirashvairasrijad rathebhih somasya ta mada indrashchakara

स ईं॑ म॒हीं धुनि॒मेतो॑ररम्णा॒त् सो अ॑स्ना॒तॄन॑पारयत् स्व॒स्ति ।
त उ॒त्स्नाय॑ र॒यिम॒भि प्र त॑स्थु॒ः सोम॑स्य॒ ता मद॒ इन्द्र॑श्चकार ॥५॥

Sa im mahim dhunimetoraramnat so asnatrinaparayat svasti
Ta utsnaya rayimabhi pra tasthuh somasya ta mada indrashchakara

सोद॑ञ्चं॒ सिन्धु॑मरिणान्महि॒त्वा वज्रे॒णान॑ उ॒षस॒ः सं पि॑पेष ।
अ॒ज॒वसो॑ ज॒विनी॑भिर्विवृ॒श्चन् त्सोम॑स्य॒ ता मद॒ इन्द्र॑श्चकार ॥६॥

Sodancham sindhumarinanmahitva vajrenana ushasah sam pipesha
Ajavaso javinibhirvivrishchan tsomasya ta mada indrashchakara

स वि॒द्वाँ अ॑पगो॒हं क॒नीना॑मा॒विर्भव॒न्नुद॑तिष्ठत् परा॒वृक् ।
प्रति॑ श्रो॒णः स्था॒द्व्य१नग॑चष्ट॒ सोम॑स्य॒ ता मद॒ इन्द्र॑श्चकार ॥७॥

Sa vidvam apagoham kaninamavirbhavannudatishthat paravrik
Prati shronah sthadvya1nagachashta somasya ta mada indrashchakara

भि॒नद् व॒लमङ्गि॑रोभिर्गृणा॒नो वि पर्व॑तस्य दृंहि॒तान्यै॑रत् ।
रि॒णग्रोधां॑सि कृ॒त्रिमा॑ण्येषां॒ सोम॑स्य॒ ता मद॒ इन्द्र॑श्चकार ॥८॥

Bhinad valamangirobhirgrinano vi parvatasya drinhitanyairat
Rinagrodhansi kritrimanyesham somasya ta mada indrashchakara

स्वप्ने॑ना॒भ्युप्या॒ चुमु॑रिं॒ धुनिं॑ च ज॒घन्थ॒ दस्युं॒ प्र द॒भीति॑मावः ।
र॒म्भी चि॒दत्र॑ विविदे॒ हिर॑ण्यं॒ सोम॑स्य॒ ता मद॒ इन्द्र॑श्चकार ॥९॥

Svapnenabhyupya chumurim dhunim cha jaghantha dasyum pra dabhitimavah
Rambhi chidatra vivide hiranyam somasya ta mada indrashchakara

नू॒नं सा ते॒ प्रति॒ वरं॑ जरि॒त्रे दु॑ही॒यदि॑न्द्र॒ दक्षि॑णा म॒घोनी॑ ।
शिक्षा॑ स्तो॒तृभ्यो॒ माति॑ ध॒ग्भगो॑ नो बृ॒हद् व॑देम वि॒दथे॑ सु॒वीरा॑ः ॥१०॥

Nunam sa te prati varam jaritre duhiyadindra dakshina maghoni
Shiksha stotribhyo mati dhagbhago no brihad vadema vidathe suvirah