Sukta 14

14.1

12 gritsamada (angirasah shaunahotrah pashchad) bhargavah shaunakah, indrah, trishtup

अध्व॑र्यवो॒ भर॒तेन्द्रा॑य॒ सोम॒माम॑त्रेभिः सिञ्चता॒ मद्य॒मन्ध॑ः ।
का॒मी हि वी॒रः सद॑मस्य पी॒तिं जु॒होत॒ वृष्णे॒ तदिदे॒ष व॑ष्टि ॥१॥

Adhvaryavo bharatendraya somamamatrebhih sinchata madyamandhah
Kami hi virah sadamasya pitim juhota vrishne tadidesha vashti

अध्व॑र्यवो॒ यो अ॒पो व॑व्रि॒वांसं॑ वृ॒त्रं ज॒घाना॒शन्ये॑व वृ॒क्षम् ।
तस्मा॑ ए॒तं भ॑रत तद्व॒शायँ॑ ए॒ष इन्द्रो॑ अर्हति पी॒तिम॑स्य ॥२॥

Adhvaryavo yo apo vavrivansam vritram jaghanashanyeva vriksham
Tasma etam bharata tadvashayam esha indro arhati pitimasya

अध्व॑र्यवो॒ यो दृभी॑कं ज॒घान॒ यो गा उ॒दाज॒दप॒ हि व॒लं वः ।
तस्मा॑ ए॒तम॒न्तरि॑क्षे॒ न वात॒मिन्द्रं॒ सोमै॒रोर्णु॑त॒ जूर्न वस्त्रै॑ः ॥३॥

Adhvaryavo yo dribhikam jaghana yo ga udajadapa hi valam vah
Tasma etamantarikshe na vatamindram somairornuta jurna vastraih

अध्व॑र्यवो॒ य उर॑णं ज॒घान॒ नव॑ च॒ख्वांसं॑ नव॒तिं च॑ बा॒हून् ।
यो अर्बु॑द॒मव॑ नी॒चा ब॑बा॒धे तमिन्द्रं॒ सोम॑स्य भृ॒थे हि॑नोत ॥४॥

Adhvaryavo ya uranam jaghana nava chakhvansam navatim cha bahun
Yo arbudamava nicha babadhe tamindram somasya bhrithe hinota

अध्व॑र्यवो॒ यः स्वश्नं॑ ज॒घान॒ यः शुष्ण॑म॒शुषं॒ यो व्यं॑सम् ।
यः पिप्रुं॒ नमु॑चिं॒ यो रु॑धि॒क्रां तस्मा॒ इन्द्रा॒यान्ध॑सो जुहोत ॥५॥

Adhvaryavo yah svashnam jaghana yah shushnamashusham yo vyansam
Yah piprum namuchim yo rudhikram tasma indrayandhaso juhota

अध्व॑र्यवो॒ यः श॒तं शम्ब॑रस्य॒ पुरो॑ बि॒भेदाश्म॑नेव पू॒र्वीः ।
यो व॒र्चिन॑ः श॒तमिन्द्र॑ः स॒हस्र॑म॒पाव॑प॒द् भर॑ता॒ सोम॑मस्मै ॥६॥

Adhvaryavo yah shatam shambarasya puro bibhedashmaneva purvih
Yo varchinah shatamindrah sahasramapavapad bharata somamasmai

अध्व॑र्यवो॒ यः श॒तमा स॒हस्रं॒ भूम्या॑ उ॒पस्थेऽव॑पज्जघ॒न्वान् ।
कुत्स॑स्या॒योर॑तिथि॒ग्वस्य॑ वी॒रान् न्यावृ॑ण॒ग् भर॑ता॒ सोम॑मस्मै ॥७॥

Adhvaryavo yah shatama sahasram bhumya upasthevapajjaghanvan
Kutsasyayoratithigvasya viran nyavrinag bharata somamasmai

अध्व॑र्यवो॒ यन्न॑रः का॒मया॑ध्वे श्रु॒ष्टी वह॑न्तो नशथा॒ तदिन्द्रे॑ ।
गभ॑स्तिपूतं भरत श्रु॒तायेन्द्रा॑य॒ सोमं॑ यज्यवो जुहोत ॥८॥

Adhvaryavo yannarah kamayadhve shrushti vahanto nashatha tadindre
Gabhastiputam bharata shrutayendraya somam yajyavo juhota

अध्व॑र्यव॒ः कर्त॑ना श्रु॒ष्टिम॑स्मै॒ वने॒ निपू॑तं॒ वन॒ उन्न॑यध्वम् ।
जु॒षा॒णो हस्त्य॑म॒भि वा॑वशे व॒ इन्द्रा॑य॒ सोमं॑ मदि॒रं जु॑होत ॥९॥

Adhvaryavah kartana shrushtimasmai vane niputam vana unnayadhvam
Jushano hastyamabhi vavashe va indraya somam madiram juhota

अध्व॑र्यव॒ः पय॒सोध॒र्यथा॒ गोः सोमे॑भिरीं पृणता भो॒जमिन्द्र॑म् ।
वेदा॒हम॑स्य॒ निभृ॑तं म ए॒तद् दित्स॑न्तं॒ भूयो॑ यज॒तश्चि॑केत ॥१०॥

Adhvaryavah payasodharyatha goh somebhirim prinata bhojamindram
Vedahamasya nibhritam ma etad ditsantam bhuyo yajatashchiketa

अध्व॑र्यवो॒ यो दि॒व्यस्य॒ वस्वो॒ यः पार्थि॑वस्य॒ क्षम्य॑स्य॒ राजा॑ ।
तमूर्द॑रं॒ न पृ॑णता॒ यवे॒नेन्द्रं॒ सोमे॑भि॒स्तदपो॑ वो अस्तु ॥११॥

Adhvaryavo yo divyasya vasvo yah parthivasya kshamyasya raja
Tamurdaram na prinata yavenendram somebhistadapo vo astu

अ॒स्मभ्यं॒ तद् व॑सो दा॒नाय॒ राध॒ः सम॑र्थयस्व ब॒हु ते॑ वस॒व्य॑म् ।
इन्द्र॒ यच्चि॒त्रं श्र॑व॒स्या अनु॒ द्यून्बृ॒हद्व॑देम वि॒दथे॑ सु॒वीरा॑ः ॥१२॥

Asmabhyam tad vaso danaya radhah samarthayasva bahu te vasavyam
Indra yachchitram shravasya anu dyunbrihadvadema vidathe suvirah