সূক্ত 14

14.1

১২ গৃত্সমদ (আঙ্গিরসঃ শৌনহোত্রঃ পশ্চাদ্) ভার্গবঃ শৌনকঃ। ইন্দ্রঃ। ত্রিষ্টুপ্।

অধ্বর্যবো ভরতেন্দ্রায় সোমমামত্রেভিঃ সিঞ্চতা মদ্যমন্ধঃ ।
কামী হি বীরঃ সদমস্য পীতিং জুহোত বৃষ্ণে তদিদেষ বষ্টি ॥১॥

14.2

অধ্বর্যবো যো অপো বব্রিবাংসং বৃত্রং জঘানাশন্যেব বৃক্ষম্ ।
তস্মা এতং ভরত তদ্বশায়ঁ এষ ইন্দ্রো অর্হতি পীতিমস্য ॥২॥

14.3

অধ্বর্যবো যো দৃভীকং জঘান যো গা উদাজদপ হি বলং বঃ ।
তস্মা এতমন্তরিক্ষে ন বাতমিন্দ্রং সোমৈরোর্ণুত জূর্ন বস্ত্রৈঃ ॥৩॥

14.4

অধ্বর্যবো য উরণং জঘান নব চখ্বাংসং নবতিং চ বাহূন্ ।
যো অর্বুদমব নীচা ববাধে তমিন্দ্রং সোমস্য ভৃথে হিনোত ॥৪॥

14.5

অধ্বর্যবো যঃ স্বশ্নং জঘান যঃ শুষ্ণমশুষং যো ব্যংসম্ ।
যঃ পিপ্রুং নমুচিং যো রুধিক্রাং তস্মা ইন্দ্রায়ান্ধসো জুহোত ॥৫॥

14.6

অধ্বর্যবো যঃ শতং শম্বরস্য পুরো বিভেদাশ্মনেব পূর্বীঃ ।
যো বর্চিনঃ শতমিন্দ্রঃ সহস্রমপাবপদ্ ভরতা সোমমস্মৈ ॥৬॥

14.7

অধ্বর্যবো যঃ শতমা সহস্রং ভূম্যা উপস্থেঽবপজ্জঘন্বান্ ।
কুত্সস্যায়োরতিথিগ্বস্য বীরান্ ন্যাবৃণগ্ ভরতা সোমমস্মৈ ॥৭॥

14.8

অধ্বর্যবো যন্নরঃ কাময়াধ্বে শ্রুষ্টী বহন্তো নশথা তদিন্দ্রে ।
গভস্তিপূতং ভরত শ্রুতায়েন্দ্রায় সোমং যজ্যবো জুহোত ॥৮॥

14.9

অধ্বর্যবঃ কর্তনা শ্রুষ্টিমস্মৈ বনে নিপূতং বন উন্নয়ধ্বম্ ।
জুষাণো হস্ত্যমভি বাবশে ব ইন্দ্রায় সোমং মদিরং জুহোত ॥৯॥

14.10

অধ্বর্যবঃ পয়সোধর্যথা গোঃ সোমেভিরীং পৃণতা ভোজমিন্দ্রম্ ।
বেদাহমস্য নিভৃতং ম এতদ্ দিত্সন্তং ভূয়ো যজতশ্চিকেত ॥১০॥

14.11

অধ্বর্যবো যো দিব্যস্য বস্বো যঃ পার্থিবস্য ক্ষম্যস্য রাজা ।
তমূর্দরং ন পৃণতা যবেনেন্দ্রং সোমেভিস্তদপো বো অস্তু ॥১১॥

14.12

অস্মভ্যং তদ্ বসো দানায় রাধঃ সমর্থয়স্ব বহু তে বসব্যম্ ।
ইন্দ্র যচ্চিত্রং শ্রবস্যা অনু দ্যূন্বৃহদ্বদেম বিদথে সুবীরাঃ ॥১২॥