সূক্ত 95

95.1

১৮ ঐলঃ পুরূরবাঃ। উর্বশী দেবতা। ২,৪-৫,৭, ১১, ১৩, ১৫-১৬,১৮, উর্বশী ঋষিকা। পুরূরবা দেবতা। ত্রিষ্টুপ্।

হয়ে জায়ে মনসা তিষ্ঠ ঘোরে বচাংসি মিশ্রা কৃণবাবহৈ নু ।
ন নৌ মন্ত্রা অনুদিতাস এতে ময়স্করন্পরতরে চনাহন্ ॥১॥

কিমেতা বাচা কৃণবা তবাহং প্রাক্রমিষমুষসামগ্রিয়েব ।
পুরূরবঃ পুনরস্তং পরেহি দুরাপনা বাত ইবাহমস্মি ॥২॥

ইষুর্ন শ্রিয় ইষুধেরসনা গোষাঃ শতসা ন রংহিঃ ।
অবীরে ক্রতৌ বি দবিদ্যুতন্নোরা ন মায়ুং চিতয়ন্ত ধুনয়ঃ ॥৩॥

সা বসু দধতী শ্বশুরায় বয় উষো যদি বষ্ট্যন্তিগৃহাৎ ।
অস্তং ননক্ষে যস্মিঞ্চাকন্দিবা নক্তং শ্নথিতা বৈতসেন ॥৪॥

ত্রিঃ স্ম মাহ্নঃ শ্নথয়ো বৈতসেনোত স্ম মেঽব্যত্যৈ পৃণাসি ।
পুরূরবোঽনু তে কেতমায়ং রাজা মে বীর তন্ব১স্তদাসীঃ ॥৫॥

যা সুজূর্ণিঃ শ্রেণিঃ সুম্নআপির্হ্রদেচক্ষুর্ন গ্রন্থিনী চরণ্যুঃ ।
তা অঞ্জয়োঽরুণয়ো ন সস্রুঃ শ্রিয়ে গাবো ন ধেনবোঽনবন্ত ॥৬॥

সমস্মিঞ্জায়মান আসত গ্না উতেমবর্ধন্নদ্য১ঃ স্বগূর্তাঃ ।
মহে যত্ত্বা পুরূরবো রণায়াঽবর্ধয়ন্দস্যুহত্যায় দেবাঃ ॥৭॥

সচা যদাসু জহতীষ্বত্কমমানুষীষু মানুষো নিষেবে । অপ স্ম মত্তরসন্তী ন ভুজ্যুস্তা অত্রসন্রথস্পৃশো নাশ্বাঃ ॥৮॥

যদাসু মর্তো অমৃতাসু নিস্পৃক্সং ক্ষোণীভিঃ ক্রতুভির্ন পৃঙ্ক্তে ।
তা আতয়ো ন তন্বঃ শুম্ভত স্বা অশ্বাসো ন ক্রীলয়ো দন্দশানাঃ ॥৯॥

বিদ্যুন্ন যা পতন্তী দবিদ্যোদ্ভরন্তী মে অপ্যা কাম্যানি ।
জনিষ্টো অপো নর্যঃ সুজাতঃ প্রোর্বশী তিরত দীর্ঘমায়ুঃ ॥১০॥

জজ্ঞিষ ইত্থা গোপীথ্যায় হি দধাথ তত্পুরূরবো ম ওজঃ ।
অশাসং ত্বা বিদুষী সস্মিন্নহন্ন ম আশৃণোঃ কিমভুগ্বদাসি ॥১১॥

কদা সূনুঃ পিতরং জাত ইচ্ছাচ্চক্রন্নাশ্রু বর্তয়দ্বিজানন্ ।
কো দম্পতী সমনসা বি যূয়োদধ যদগ্নিঃ শ্বশুরেষু দীদয়ৎ ॥১২॥

প্রতি ব্রবাণি বর্তয়তে অশ্রু চক্রন্ন ক্রন্দদাধ্যে শিবায়ৈ ।
প্র তত্তে হিনবা যত্তে অস্মে পরেহ্যস্তং নহি মূর মাপঃ ॥১৩॥

সুদেবো অদ্য প্রপতেদনাবৃত্পরাবতং পরমাং গন্তবা উ ।
অধা শয়ীত নিৠতেরুপস্থেঽধৈনং বৃকা রভসাসো অদ্যুঃ ॥১৪॥

পুরূরবো মা মৃথা মা প্র পপ্তো মা ত্বা বৃকাসো অশিবাস উ ক্ষন্ ।
ন বৈ স্ত্রৈণানি সখ্যানি সন্তি সালাবৃকাণাং হৃদয়ান্যেতা ॥১৫॥

যদ্বিরূপাচরং মর্ত্যেষ্ববসং রাত্রীঃ শরদশ্চতস্রঃ ।
ঘৃতস্য স্তোকং সকৃদহ্ন আশ্নাং তাদেবেদং তাতৃপাণা চরামি ॥১৬॥

অন্তরিক্ষপ্রাং রজসো বিমানীমুপ শিক্ষাম্যুর্বশীং বসিষ্ঠঃ ।
উপ ত্বা রাতিঃ সুকৃতস্য তিষ্ঠান্নি বর্তস্ব হৃদয়ং তপ্যতে মে ॥১৭॥

ইতি ত্বা দেবা ইম আহুরৈল যথেমেতদ্ভবসি মৃত্যুবন্ধুঃ ।
প্রজা তে দেবান্হবিষা যজাতি স্বর্গ উ ত্বমপি মাদয়াসে ॥১৮॥