Sukta 95

95.1

18 ailah pururavah, urvashi devata, 2, 4-5, 7, 11, 13, 15-16, 18, urvashi rishika, pururava devata, trishtup

ह॒ये जाये॒ मन॑सा॒ तिष्ठ॑ घोरे॒ वचां॑सि मि॒श्रा कृ॑णवावहै॒ नु ।
न नौ॒ मन्त्रा॒ अनु॑दितास ए॒ते मय॑स्कर॒न्पर॑तरे च॒नाह॑न् ॥१॥

Haye jaye manasa tishtha ghore vachansi mishra krinavavahai nu
Na nau mantra anuditasa ete mayaskaranparatare chanahan

95.2

किमे॒ता वा॒चा कृ॑णवा॒ तवा॒हं प्राक्र॑मिषमु॒षसा॑मग्रि॒येव॑ ।
पुरू॑रव॒ः पुन॒रस्तं॒ परे॑हि दुराप॒ना वात॑ इवा॒हम॑स्मि ॥२॥

Kimeta vacha krinava tavaham prakramishamushasamagriyeva
Pururavah punarastam parehi durapana vata ivahamasmi

95.3

इषु॒र्न श्रि॒य इ॑षु॒धेर॑स॒ना गो॒षाः श॑त॒सा न रंहि॑ः ।
अ॒वीरे॒ क्रतौ॒ वि द॑विद्युत॒न्नोरा॒ न मा॒युं चि॑तयन्त॒ धुन॑यः ॥३॥

Ishurna shriya ishudherasana goshah shatasa na ranhih
Avire kratau vi davidyutannora na mayum chitayanta dhunayah

95.4

सा वसु॒ दध॑ती॒ श्वशु॑राय॒ वय॒ उषो॒ यदि॒ वष्ट्यन्ति॑गृहात् ।
अस्तं॑ ननक्षे॒ यस्मि॑ञ्चा॒कन्दिवा॒ नक्तं॑ श्नथि॒ता वै॑त॒सेन॑ ॥४॥

Sa vasu dadhati shvashuraya vaya usho yadi vashtyantigrihat
Astam nanakshe yasminchakandiva naktam shnathita vaitasena

95.5

त्रिः स्म॒ माह्न॑ः श्नथयो वैत॒सेनो॒त स्म॒ मेऽव्य॑त्यै पृणासि ।
पुरू॑र॒वोऽनु॑ ते॒ केत॑मायं॒ राजा॑ मे वीर त॒न्व१स्तदा॑सीः ॥५॥

Trih sma mahnah shnathayo vaitasenota sma mevyatyai prinasi
Pururavonu te ketamayam raja me vira tanva1stadasih

95.6

या सु॑जू॒र्णिः श्रेणि॑ः सु॒म्नआ॑पिर्ह्र॒देच॑क्षु॒र्न ग्र॒न्थिनी॑ चर॒ण्युः ।
ता अ॒ञ्जयो॑ऽरु॒णयो॒ न स॑स्रुः श्रि॒ये गावो॒ न धे॒नवो॑ऽनवन्त ॥६॥

Ya sujurnih shrenih sumnaapirhradechakshurna granthini charanyuh
Ta anjayorunayo na sasruh shriye gavo na dhenavonavanta

95.7

सम॑स्मि॒ञ्जाय॑मान आसत॒ ग्ना उ॒तेम॑वर्धन्न॒द्य१ः स्वगू॑र्ताः ।
म॒हे यत्त्वा॑ पुरूरवो॒ रणा॒याऽव॑र्धयन्दस्यु॒हत्या॑य दे॒वाः ॥७॥

Samasminjayamana asata gna utemavardhannadya1h svagurtah
Mahe yattva pururavo ranayavardhayandasyuhatyaya devah

95.8

सचा॒ यदा॑सु॒ जह॑ती॒ष्वत्क॒ममा॑नुषीषु॒ मानु॑षो नि॒षेवे॑ । अप॑ स्म॒ मत्त॒रस॑न्ती॒ न भु॒ज्युस्ता अ॑त्रसन्रथ॒स्पृशो॒ नाश्वा॑ः ॥८॥

Sacha yadasu jahatishvatkamamanushishu manusho nisheve, apa sma mattarasanti na bhujyusta atrasanrathasprisho nashvah

95.9

यदा॑सु॒ मर्तो॑ अ॒मृता॑सु नि॒स्पृक्सं क्षो॒णीभि॒ः क्रतु॑भि॒र्न पृ॒ङ्क्ते ।
ता आ॒तयो॒ न त॒न्व॑ः शुम्भत॒ स्वा अश्वा॑सो॒ न क्री॒ळयो॒ दन्द॑शानाः ॥९॥

Yadasu marto amritasu nispriksam kshonibhih kratubhirna prinkte
Ta atayo na tanvah shumbhata sva ashvaso na krilayo dandashanah

95.10

वि॒द्युन्न या पत॑न्ती॒ दवि॑द्यो॒द्भर॑न्ती मे॒ अप्या॒ काम्या॑नि ।
जनि॑ष्टो अ॒पो नर्य॒ः सुजा॑त॒ः प्रोर्वशी॑ तिरत दी॒र्घमायु॑ः ॥१०॥

Vidyunna ya patanti davidyodbharanti me apya kamyani
Janishto apo naryah sujatah prorvashi tirata dirghamayuh

95.11

ज॒ज्ञि॒ष इ॒त्था गो॒पीथ्या॑य॒ हि द॒धाथ॒ तत्पु॑रूरवो म॒ ओज॑ः ।
अशा॑सं त्वा वि॒दुषी॒ सस्मि॒न्नह॒न्न म॒ आशृ॑णो॒ः किम॒भुग्व॑दासि ॥११॥

Jagyisha ittha gopithyaya hi dadhatha tatpururavo ma ojah
Ashasam tva vidushi sasminnahanna ma ashrinoh kimabhugvadasi

95.12

क॒दा सू॒नुः पि॒तरं॑ जा॒त इ॑च्छाच्च॒क्रन्नाश्रु॑ वर्तयद्विजा॒नन् ।
को दम्प॑ती॒ सम॑नसा॒ वि यू॑यो॒दध॒ यद॒ग्निः श्वशु॑रेषु॒ दीद॑यत् ॥१२॥

Kada sunuh pitaram jata ichchhachchakrannashru vartayadvijanan
Ko dampati samanasa vi yuyodadha yadagnih shvashureshu didayat

95.13

प्रति॑ ब्रवाणि व॒र्तय॑ते॒ अश्रु॑ च॒क्रन्न क्र॑न्ददा॒ध्ये॑ शि॒वायै॑ ।
प्र तत्ते॑ हिनवा॒ यत्ते॑ अ॒स्मे परे॒ह्यस्तं॑ न॒हि मू॑र॒ माप॑ः ॥१३॥

Prati bravani vartayate ashru chakranna krandadadhye shivayai
Pra tatte hinava yatte asme parehyastam nahi mura mapah

95.14

सु॒दे॒वो अ॒द्य प्र॒पते॒दना॑वृत्परा॒वतं॑ पर॒मां गन्त॒वा उ॑ ।
अधा॒ शयी॑त॒ निॠ॑तेरु॒पस्थेऽधै॑नं॒ वृका॑ रभ॒सासो॑ अ॒द्युः ॥१४॥

Sudevo adya prapatedanavritparavatam paramam gantava u
Adha shayita niriterupasthedhainam vrika rabhasaso adyuh

95.15

पुरू॑रवो॒ मा मृ॑था॒ मा प्र प॑प्तो॒ मा त्वा॒ वृका॑सो॒ अशि॑वास उ क्षन् ।
न वै स्त्रैणा॑नि स॒ख्यानि॑ सन्ति सालावृ॒काणां॒ हृद॑यान्ये॒ता ॥१५॥

Pururavo ma mritha ma pra papto ma tva vrikaso ashivasa u kshan
Na vai strainani sakhyani santi salavrikanam hridayanyeta

95.16

यद्विरू॒पाच॑रं॒ मर्त्ये॒ष्वव॑सं॒ रात्री॑ः श॒रद॒श्चत॑स्रः ।
घृ॒तस्य॑ स्तो॒कं स॒कृदह्न॑ आश्नां॒ तादे॒वेदं ता॑तृपा॒णा च॑रामि ॥१६॥

Yadvirupacharam martyeshvavasam ratrih sharadashchatasrah
Ghritasya stokam sakridahna ashnam tadevedam tatripana charami

95.17

अ॒न्त॒रि॒क्ष॒प्रां रज॑सो वि॒मानी॒मुप॑ शिक्षाम्यु॒र्वशीं॒ वसि॑ष्ठः ।
उप॑ त्वा रा॒तिः सु॑कृ॒तस्य॒ तिष्ठा॒न्नि व॑र्तस्व॒ हृद॑यं तप्यते मे ॥१७॥

Antarikshapram rajaso vimanimupa shikshamyurvashim vasishthah
Upa tva ratih sukritasya tishthanni vartasva hridayam tapyate me

95.18

इति॑ त्वा दे॒वा इ॒म आ॑हुरैळ॒ यथे॑मे॒तद्भव॑सि मृ॒त्युब॑न्धुः ।
प्र॒जा ते॑ दे॒वान्ह॒विषा॑ यजाति स्व॒र्ग उ॒ त्वमपि॑ मादयासे ॥१८॥

Iti tva deva ima ahuraila yathemetadbhavasi mrityubandhuh
Praja te devanhavisha yajati svarga u tvamapi madayase