Sukta 96

96.1

13 barurangirasah, sarvaharirva aindrah, harih, jagati, 12-13 trishtup

प्र ते॑ म॒हे वि॒दथे॑ शंसिषं॒ हरी॒ प्र ते॑ वन्वे व॒नुषो॑ हर्य॒तं मद॑म् ।
घृ॒तं न यो हरि॑भि॒श्चारु॒ सेच॑त॒ आ त्वा॑ विशन्तु॒ हरि॑वर्पसं॒ गिर॑ः ॥१॥

Pra te mahe vidathe shansisham hari pra te vanve vanusho haryatam madam
Ghritam na yo haribhishcharu sechata a tva vishantu harivarpasam girah

96.2

हरिं॒ हि योनि॑म॒भि ये स॒मस्व॑रन्हि॒न्वन्तो॒ हरी॑ दि॒व्यं यथा॒ सद॑ः ।
आ यं पृ॒णन्ति॒ हरि॑भि॒र्न धे॒नव॒ इन्द्रा॑य शू॒षं हरि॑वन्तमर्चत ॥२॥

Harim hi yonimabhi ye samasvaranhinvanto hari divyam yatha sadah
A yam prinanti haribhirna dhenava indraya shusham harivantamarchata

96.3

सो अ॑स्य॒ वज्रो॒ हरि॑तो॒ य आ॑य॒सो हरि॒र्निका॑मो॒ हरि॒रा गभ॑स्त्योः ।
द्यु॒म्नी सु॑शि॒प्रो हरि॑मन्युसायक॒ इन्द्रे॒ नि रू॒पा हरि॑ता मिमिक्षिरे ॥३॥

So asya vajro harito ya ayaso harirnikamo harira gabhastyoh
Dyumni sushipro harimanyusayaka indre ni rupa harita mimikshire

96.4

दि॒वि न के॒तुरधि॑ धायि हर्य॒तो वि॒व्यच॒द्वज्रो॒ हरि॑तो॒ न रंह्या॑ ।
तु॒ददहिं॒ हरि॑शिप्रो॒ य आ॑य॒सः स॒हस्र॑शोका अभवद्धरिम्भ॒रः ॥४॥

Divi na keturadhi dhayi haryato vivyachadvajro harito na ranhya
Tudadahim harishipro ya ayasah sahasrashoka abhavaddharimbharah

96.5

त्वंत्व॑महर्यथा॒ उप॑स्तुत॒ः पूर्वे॑भिरिन्द्र हरिकेश॒ यज्व॑भिः ।
त्वं ह॑र्यसि॒ तव॒ विश्व॑मु॒क्थ्य१मसा॑मि॒ राधो॑ हरिजात हर्य॒तम् ॥५॥

Tvantvamaharyatha upastutah purvebhirindra harikesha yajvabhih
Tvam haryasi tava vishvamukthya1masami radho harijata haryatam

96.6

ता व॒ज्रिणं॑ म॒न्दिनं॒ स्तोम्यं॒ मद॒ इन्द्रं॒ रथे॑ वहतो हर्य॒ता हरी॑ ।
पु॒रूण्य॑स्मै॒ सव॑नानि॒ हर्य॑त॒ इन्द्रा॑य॒ सोमा॒ हर॑यो दधन्विरे ॥६॥

Ta vajrinam mandinam stomyam mada indram rathe vahato haryata hari
Purunyasmai savanani haryata indraya soma harayo dadhanvire

96.7

अरं॒ कामा॑य॒ हर॑यो दधन्विरे स्थि॒राय॑ हिन्व॒न्हर॑यो॒ हरी॑ तु॒रा ।
अर्व॑द्भि॒र्यो हरि॑भि॒र्जोष॒मीय॑ते॒ सो अ॑स्य॒ कामं॒ हरि॑वन्तमानशे ॥७॥

Aram kamaya harayo dadhanvire sthiraya hinvanharayo hari tura
Arvadbhiryo haribhirjoshamiyate so asya kamam harivantamanashe

96.8

हरि॑श्मशारु॒र्हरि॑केश आय॒सस्तु॑र॒स्पेये॒ यो ह॑रि॒पा अव॑र्धत ।
अर्व॑द्भि॒र्यो हरि॑भिर्वा॒जिनी॑वसु॒रति॒ विश्वा॑ दुरि॒ता पारि॑ष॒द्धरी॑ ॥८॥

Harishmasharurharikesha ayasasturaspeye yo haripa avardhata
Arvadbhiryo haribhirvajinivasurati vishva durita parishaddhari

96.9

स्रुवे॑व॒ यस्य॒ हरि॑णी विपे॒ततु॒ः शिप्रे॒ वाजा॑य॒ हरि॑णी॒ दवि॑ध्वतः ।
प्र यत्कृ॒ते च॑म॒से मर्मृ॑ज॒द्धरी॑ पी॒त्वा मद॑स्य हर्य॒तस्यान्ध॑सः ॥९॥

Sruveva yasya harini vipetatuh shipre vajaya harini davidhvatah
Pra yatkrite chamase marmrijaddhari pitva madasya haryatasyandhasah

96.10

उ॒त स्म॒ सद्म॑ हर्य॒तस्य॑ प॒स्त्यो॒३रत्यो॒ न वाजं॒ हरि॑वाँ अचिक्रदत् ।
म॒ही चि॒द्धि धि॒षणाह॑र्य॒दोज॑सा बृ॒हद्वयो॑ दधिषे हर्य॒तश्चि॒दा ॥१०॥

Uta sma sadma haryatasya pastyo3ratyo na vajam harivam achikradat
Mahi chiddhi dhishanaharyadojasa brihadvayo dadhishe haryatashchida

96.11

आ रोद॑सी॒ हर्य॑माणो महि॒त्वा नव्यं॑नव्यं हर्यसि॒ मन्म॒ नु प्रि॒यम् ।
प्र प॒स्त्य॑मसुर हर्य॒तं गोरा॒विष्कृ॑धि॒ हर॑ये॒ सूर्या॑य ॥११॥

A rodasi haryamano mahitva navyannavyam haryasi manma nu priyam
Pra pastyamasura haryatam goravishkridhi haraye suryaya

96.12

आ त्वा॑ ह॒र्यन्तं॑ प्र॒युजो॒ जना॑नां॒ रथे॑ वहन्तु॒ हरि॑शिप्रमिन्द्र ।
पिबा॒ यथा॒ प्रति॑भृतस्य॒ मध्वो॒ हर्य॑न्य॒ज्ञं स॑ध॒मादे॒ दशो॑णिम् ॥१२॥

A tva haryantam prayujo jananam rathe vahantu harishipramindra
Piba yatha pratibhritasya madhvo haryanyagyam sadhamade dashonim

96.13

अपा॒ः पूर्वे॑षां हरिवः सु॒ताना॒मथो॑ इ॒दं सव॑नं॒ केव॑लं ते ।
म॒म॒द्धि सोमं॒ मधु॑मन्तमिन्द्र स॒त्रा वृ॑षञ्ज॒ठर॒ आ वृ॑षस्व ॥१३॥

Apah purvesham harivah sutanamatho idam savanam kevalam te
Mamaddhi somam madhumantamindra satra vrishanjathara a vrishasva