সূক্ত 96

96.1

১৩ বরুরাংগিরসঃ, সর্বহরির্বা ঐন্দ্রঃ। হরিঃ। জগতী, ১২-১৩ ত্রিষ্টুপ্।

প্র তে মহে বিদথে শংসিষং হরী প্র তে বন্বে বনুষো হর্যতং মদম্ ।
ঘৃতং ন যো হরিভিশ্চারু সেচত আ ত্বা বিশন্তু হরিবর্পসং গিরঃ ॥১॥

হরিং হি যোনিমভি যে সমস্বরন্হিন্বন্তো হরী দিব্যং যথা সদঃ ।
আ যং পৃণন্তি হরিভির্ন ধেনব ইন্দ্রায় শূষং হরিবন্তমর্চত ॥২॥

সো অস্য বজ্রো হরিতো য আয়সো হরির্নিকামো হরিরা গভস্ত্যোঃ ।
দ্যুম্নী সুশিপ্রো হরিমন্যুসায়ক ইন্দ্রে নি রূপা হরিতা মিমিক্ষিরে ॥৩॥

দিবি ন কেতুরধি ধায়ি হর্যতো বিব্যচদ্বজ্রো হরিতো ন রংহ্যা ।
তুদদহিং হরিশিপ্রো য আয়সঃ সহস্রশোকা অভবদ্ধরিম্ভরঃ ॥৪॥

ত্বংত্বমহর্যথা উপস্তুতঃ পূর্বেভিরিন্দ্র হরিকেশ যজ্বভিঃ ।
ত্বং হর্যসি তব বিশ্বমুক্থ্য১মসামি রাধো হরিজাত হর্যতম্ ॥৫॥

তা বজ্রিণং মন্দিনং স্তোম্যং মদ ইন্দ্রং রথে বহতো হর্যতা হরী ।
পুরূণ্যস্মৈ সবনানি হর্যত ইন্দ্রায় সোমা হরয়ো দধন্বিরে ॥৬॥

অরং কামায় হরয়ো দধন্বিরে স্থিরায় হিন্বন্হরয়ো হরী তুরা ।
অর্বদ্ভির্যো হরিভির্জোষমীয়তে সো অস্য কামং হরিবন্তমানশে ॥৭॥

হরিশ্মশারুর্হরিকেশ আয়সস্তুরস্পেয়ে যো হরিপা অবর্ধত ।
অর্বদ্ভির্যো হরিভির্বাজিনীবসুরতি বিশ্বা দুরিতা পারিষদ্ধরী ॥৮॥

স্রুবেব যস্য হরিণী বিপেততুঃ শিপ্রে বাজায় হরিণী দবিধ্বতঃ ।
প্র যত্কৃতে চমসে মর্মৃজদ্ধরী পীত্বা মদস্য হর্যতস্যান্ধসঃ ॥৯॥

উত স্ম সদ্ম হর্যতস্য পস্ত্যো৩রত্যো ন বাজং হরিবাঁ অচিক্রদৎ ।
মহী চিদ্ধি ধিষণাহর্যদোজসা বৃহদ্বয়ো দধিষে হর্যতশ্চিদা ॥১০॥

আ রোদসী হর্যমাণো মহিত্বা নব্যংনব্যং হর্যসি মন্ম নু প্রিয়ম্ ।
প্র পস্ত্যমসুর হর্যতং গোরাবিষ্কৃধি হরয়ে সূর্যায় ॥১১॥

আ ত্বা হর্যন্তং প্রয়ুজো জনানাং রথে বহন্তু হরিশিপ্রমিন্দ্র ।
পিবা যথা প্রতিভৃতস্য মধ্বো হর্যন্যজ্ঞং সধমাদে দশোণিম্ ॥১২॥

অপাঃ পূর্বেষাং হরিবঃ সুতানামথো ইদং সবনং কেবলং তে ।
মমদ্ধি সোমং মধুমন্তমিন্দ্র সত্রা বৃষঞ্জঠর আ বৃষস্ব ॥১৩॥