Sukta 94

94.1

14 arbudah kadraveyah sarpah, gravanah, jagati, 5, 7, 14 trishtup

प्रैते व॑दन्तु॒ प्र व॒यं व॑दाम॒ ग्राव॑भ्यो॒ वाचं॑ वदता॒ वद॑द्भ्यः ।
यद॑द्रयः पर्वताः सा॒कमा॒शव॒ः श्लोकं॒ घोषं॒ भर॒थेन्द्रा॑य सो॒मिन॑ः ॥१॥

Praite vadantu pra vayam vadama gravabhyo vacham vadata vadadbhyah
Yadadrayah parvatah sakamashavah shlokam ghosham bharathendraya sominah

94.2

ए॒ते व॑दन्ति श॒तव॑त्स॒हस्र॑वद॒भि क्र॑न्दन्ति॒ हरि॑तेभिरा॒सभि॑ः ।
वि॒ष्ट्वी ग्रावा॑णः सु॒कृत॑ः सुकृ॒त्यया॒ होतु॑श्चि॒त्पूर्वे॑ हवि॒रद्य॑माशत ॥२॥

Ete vadanti shatavatsahasravadabhi krandanti haritebhirasabhih
Vishtvi gravanah sukritah sukrityaya hotushchitpurve haviradyamashata

94.3

ए॒ते व॑द॒न्त्यवि॑दन्न॒ना मधु॒ न्यू॑ङ्खयन्ते॒ अधि॑ प॒क्व आमि॑षि ।
वृ॒क्षस्य॒ शाखा॑मरु॒णस्य॒ बप्स॑त॒स्ते सूभ॑र्वा वृष॒भाः प्रेम॑राविषुः ॥३॥

Ete vadantyavidannana madhu nyunkhayante adhi pakva amishi
Vrikshasya shakhamarunasya bapsataste subharva vrishabhah premaravishuh

94.4

बृ॒हद्व॑दन्ति मदि॒रेण॑ म॒न्दिनेन्द्रं॒ क्रोश॑न्तोऽविदन्न॒ना मधु॑ ।
सं॒रभ्या॒ धीरा॒ः स्वसृ॑भिरनर्तिषुराघो॒षय॑न्तः पृथि॒वीमु॑प॒ब्दिभि॑ः ॥४॥

Brihadvadanti madirena mandinendram kroshantovidannana madhu
Sanrabhya dhirah svasribhiranartishuraghoshayantah prithivimupabdibhih

94.5

सु॒प॒र्णा वाच॑मक्र॒तोप॒ द्यव्या॑ख॒रे कृष्णा॑ इषि॒रा अ॑नर्तिषुः ।
न्य१ङ्नि य॒न्त्युप॑रस्य निष्कृ॒तं पु॒रू रेतो॑ दधिरे सूर्य॒श्वित॑ः ॥५॥

Suparna vachamakratopa dyavyakhare krishna ishira anartishuh
Nya1nni yantyuparasya nishkritam puru reto dadhire suryashvitah

94.6

उ॒ग्रा इ॑व प्र॒वह॑न्तः स॒माय॑मुः सा॒कं यु॒क्ता वृष॑णो॒ बिभ्र॑तो॒ धुर॑ः ।
यच्छ्व॒सन्तो॑ जग्रसा॒ना अरा॑विषुः शृ॒ण्व ए॑षां प्रो॒थथो॒ अर्व॑तामिव ॥६॥

Ugra iva pravahantah samayamuh sakam yukta vrishano bibhrato dhurah
Yachchhvasanto jagrasana aravishuh shrinva esham prothatho arvatamiva

94.7

दशा॑वनिभ्यो॒ दश॑कक्ष्येभ्यो॒ दश॑योक्त्रेभ्यो॒ दश॑योजनेभ्यः ।
दशा॑भीशुभ्यो अर्चता॒जरे॑भ्यो॒ दश॒ धुरो॒ दश॑ यु॒क्ता वह॑द्भ्यः ॥७॥

Dashavanibhyo dashakakshyebhyo dashayoktrebhyo dashayojanebhyah
Dashabhishubhyo archatajarebhyo dasha dhuro dasha yukta vahadbhyah

94.8

ते अद्र॑यो॒ दश॑यन्त्रास आ॒शव॒स्तेषा॑मा॒धानं॒ पर्ये॑ति हर्य॒तम् ।
त ऊ॑ सु॒तस्य॑ सो॒म्यस्यान्ध॑सों॒ऽशोः पी॒यूषं॑ प्रथ॒मस्य॑ भेजिरे ॥८॥

Te adrayo dashayantrasa ashavasteshamadhanam paryeti haryatam
Ta u sutasya somyasyandhasonshoh piyusham prathamasya bhejire

94.9

ते सो॒मादो॒ हरी॒ इन्द्र॑स्य निंसतें॒ऽशुं दु॒हन्तो॒ अध्या॑सते॒ गवि॑ ।
तेभि॑र्दु॒ग्धं प॑पि॒वान्त्सो॒म्यं मध्विन्द्रो॑ वर्धते॒ प्रथ॑ते वृषा॒यते॑ ॥९॥

Te somado hari indrasya ninsatenshum duhanto adhyasate gavi
Tebhirdugdham papivantsomyam madhvindro vardhate prathate vrishayate

94.10

वृषा॑ वो अं॒शुर्न किला॑ रिषाथ॒नेळा॑वन्त॒ः सद॒मित्स्थ॒नाशि॑ताः ।
रै॒व॒त्येव॒ मह॑सा॒ चार॑वः स्थन॒ यस्य॑ ग्रावाणो॒ अजु॑षध्वमध्व॒रम् ॥१०॥

Vrisha vo anshurna kila rishathanelavantah sadamitsthanashitah
Raivatyeva mahasa charavah sthana yasya gravano ajushadhvamadhvaram

94.11

तृ॒दि॒ला अतृ॑दिलासो॒ अद्र॑योऽश्रम॒णा अशृ॑थिता॒ अमृ॑त्यवः ।
अ॒ना॒तु॒रा अ॒जरा॒ः स्थाम॑विष्णवः सुपी॒वसो॒ अतृ॑षिता॒ अतृ॑ष्णजः ॥११॥

Tridila atridilaso adrayoshramana ashrithita amrityavah
Anatura ajarah sthamavishnavah supivaso atrishita atrishnajah

94.12

ध्रु॒वा ए॒व व॑ः पि॒तरो॑ यु॒गेयु॑गे॒ क्षेम॑कामास॒ः सद॑सो॒ न यु॑ञ्जते ।
अ॒जु॒र्यासो॑ हरि॒षाचो॑ ह॒रिद्र॑व॒ आ द्यां रवे॑ण पृथि॒वीम॑शुश्रवुः ॥१२॥

Dhruva eva vah pitaro yugeyuge kshemakamasah sadaso na yunjate
Ajuryaso harishacho haridrava a dyam ravena prithivimashushravuh

94.13

तदिद्व॑द॒न्त्यद्र॑यो वि॒मोच॑ने॒ याम॑न्नञ्ज॒स्पा इ॑व॒ घेदु॑प॒ब्दिभि॑ः ।
वप॑न्तो॒ बीज॑मिव धान्या॒कृत॑ः पृ॒ञ्चन्ति॒ सोमं॒ न मि॑नन्ति॒ बप्स॑तः ॥१३॥

Tadidvadantyadrayo vimochane yamannanjaspa iva ghedupabdibhih
Vapanto bijamiva dhanyakritah princhanti somam na minanti bapsatah

94.14

सु॒ते अ॑ध्व॒रे अधि॒ वाच॑मक्र॒ता ऽऽक्री॒ळयो॒ न मा॒तरं॑ तु॒दन्त॑ः ।
वि षू मु॑ञ्चा सुषु॒वुषो॑ मनी॒षां वि व॑र्तन्ता॒मद्र॑य॒श्चाय॑मानाः ॥१४॥

Sute adhvare adhi vachamakrata krilayo na mataram tudantah
Vi shu muncha sushuvusho manisham vi vartantamadrayashchayamanah