সূক্ত 77

77.1

৮ স্যূমরশ্মির্ভার্গবঃ। মরুতঃ। ত্রিষ্টুপ্ , ৫ জগতী।

অভ্রপ্রুষো ন বাচা প্রুষা বসু হবিষ্মন্তো ন যজ্ঞা বিজানুষঃ ।
সুমারুতং ন ব্রহ্মাণমর্হসে গণমস্তোষ্যেষাং ন শোভসে ॥১॥

77.2

শ্রিয়ে মর্যাসো অঞ্জীঁরকৃণ্বত সুমারুতং ন পূর্বীরতি ক্ষপঃ ।
দিবস্পুত্রাস এতা ন যেতির আদিত্যাসস্তে অক্রা ন বাবৃধুঃ ॥২॥

77.3

প্র যে দিবঃ পৃথিব্যা ন বর্হণা ত্মনা রিরিচ্রে অভ্রান্ন সূর্যঃ ।
পাজস্বন্তো ন বীরাঃ পনস্যবো রিশাদসো ন মর্যা অভিদ্যবঃ ॥৩॥

77.4

যুষ্মাকং বুধ্নে অপাং ন যামনি বিথুর্যতি ন মহী শ্রথর্যতি ।
বিশ্বপ্সুর্যজ্ঞো অর্বাগয়ং সু বঃ প্রয়স্বন্তো ন সত্রাচ আ গত ॥৪॥

77.5

যূয়ং ধূর্ষু প্রয়ুজো ন রশ্মিভির্জ্যোতিষ্মন্তো ন ভাসা ব্যুষ্টিষু ।
শ্যেনাসো ন স্বয়শসো রিশাদসঃ প্রবাসো ন প্রসিতাসঃ পরিপ্রুষঃ ॥৫॥

77.6

প্র যদ্বহধ্বে মরুতঃ পরাকাদ্যূয়ং মহঃ সংবরণস্য বস্বঃ ।
বিদানাসো বসবো রাধ্যস্যাঽঽরাচ্চিদ্দ্বেষঃ সনুতর্যুয়োত ॥৬॥

77.7

য উদৃচি যজ্ঞে অধ্বরেষ্ঠা মরুদ্ভ্যো ন মানুষো দদাশৎ ।
রেবত্স বয়ো দধতে সুবীরং স দেবানামপি গোপীথে অস্তু ॥৭॥

77.8

তে হি যজ্ঞেষু যজ্ঞিয়াস ঊমা আদিত্যেন নাম্না শম্ভবিষ্ঠাঃ ।
তে নোঽবন্তু রথতূর্মনীষাং মহশ্চ যামন্নধ্বরে চকানাঃ ॥৮॥