Sukta 77

77.1

8 syumarashmirbhargavah, marutah, trishtup, 5 jagati

अ॒भ्र॒प्रुषो॒ न वा॒चा प्रु॑षा॒ वसु॑ ह॒विष्म॑न्तो॒ न य॒ज्ञा वि॑जा॒नुष॑ः ।
सु॒मारु॑तं॒ न ब्र॒ह्माण॑म॒र्हसे॑ ग॒णम॑स्तोष्येषां॒ न शो॒भसे॑ ॥१॥

Abhraprusho na vacha prusha vasu havishmanto na yagya vijanushah
Sumarutam na brahmanamarhase ganamastoshyesham na shobhase

77.2

श्रि॒ये मर्या॑सो अ॒ञ्जीँर॑कृण्वत सु॒मारु॑तं॒ न पू॒र्वीरति॒ क्षप॑ः ।
दि॒वस्पु॒त्रास॒ एता॒ न ये॑तिर आदि॒त्यास॒स्ते अ॒क्रा न वा॑वृधुः ॥२॥

Shriye maryaso anjinrakrinvata sumarutam na purvirati kshapah
Divasputrasa eta na yetira adityasaste akra na vavridhuh

77.3

प्र ये दि॒वः पृ॑थि॒व्या न ब॒र्हणा॒ त्मना॑ रिरि॒च्रे अ॒भ्रान्न सूर्य॑ः ।
पाज॑स्वन्तो॒ न वी॒राः प॑न॒स्यवो॑ रि॒शाद॑सो॒ न मर्या॑ अ॒भिद्य॑वः ॥३॥

Pra ye divah prithivya na barhana tmana ririchre abhranna suryah
Pajasvanto na virah panasyavo rishadaso na marya abhidyavah

77.4

यु॒ष्माकं॑ बु॒ध्ने अ॒पां न याम॑नि विथु॒र्यति॒ न म॒ही श्र॑थ॒र्यति॑ ।
वि॒श्वप्सु॑र्य॒ज्ञो अ॒र्वाग॒यं सु व॒ः प्रय॑स्वन्तो॒ न स॒त्राच॒ आ ग॑त ॥४॥

Yushmakam budhne apam na yamani vithuryati na mahi shratharyati
Vishvapsuryagyo arvagayam su vah prayasvanto na satracha a gata

77.5

यू॒यं धू॒र्षु प्र॒युजो॒ न र॒श्मिभि॒र्ज्योति॑ष्मन्तो॒ न भा॒सा व्यु॑ष्टिषु ।
श्ये॒नासो॒ न स्वय॑शसो रि॒शाद॑सः प्र॒वासो॒ न प्रसि॑तासः परि॒प्रुष॑ः ॥५॥

Yuyam dhurshu prayujo na rashmibhirjyotishmanto na bhasa vyushtishu
Shyenaso na svayashaso rishadasah pravaso na prasitasah pariprushah

77.6

प्र यद्वह॑ध्वे मरुतः परा॒काद्यू॒यं म॒हः सं॒वर॑णस्य॒ वस्व॑ः ।
वि॒दा॒नासो॑ वसवो॒ राध्य॑स्या॒ऽऽराच्चि॒द्द्वेष॑ः सनु॒तर्यु॑योत ॥६॥

Pra yadvahadhve marutah parakadyuyam mahah sanvaranasya vasvah
Vidanaso vasavo radhyasyarachchiddveshah sanutaryuyota

77.7

य उ॒दृचि॑ य॒ज्ञे अ॑ध्वरे॒ष्ठा म॒रुद्भ्यो॒ न मानु॑षो॒ ददा॑शत् ।
रे॒वत्स वयो॑ दधते सु॒वीरं॒ स दे॒वाना॒मपि॑ गोपी॒थे अ॑स्तु ॥७॥

Ya udrichi yagye adhvareshtha marudbhyo na manusho dadashat
Revatsa vayo dadhate suviram sa devanamapi gopithe astu

77.8

ते हि य॒ज्ञेषु॑ य॒ज्ञिया॑स॒ ऊमा॑ आदि॒त्येन॒ नाम्ना॒ शम्भ॑विष्ठाः ।
ते नो॑ऽवन्तु रथ॒तूर्म॑नी॒षां म॒हश्च॒ याम॑न्नध्व॒रे च॑का॒नाः ॥८॥

Te hi yagyeshu yagyiyasa uma adityena namna shambhavishthah
Te novantu rathaturmanisham mahashcha yamannadhvare chakanah