Sukta 78

78.1

8 syumarashmirbhargavah, marutah, trishtup, 2, 5-7 jagati

विप्रा॑सो॒ न मन्म॑भिः स्वा॒ध्यो॑ देवा॒व्यो॒३ न य॒ज्ञैः स्वप्न॑सः ।
राजा॑नो॒ न चि॒त्राः सु॑सं॒दृश॑ः क्षिती॒नां न मर्या॑ अरे॒पस॑ः ॥१॥

Vipraso na manmabhih svadhyo devavyo3 na yagyaih svapnasah
Rajano na chitrah susandrishah kshitinam na marya arepasah

अ॒ग्निर्न ये भ्राज॑सा रु॒क्मव॑क्षसो॒ वाता॑सो॒ न स्व॒युज॑ः स॒द्यऊ॑तयः ।
प्र॒ज्ञा॒तारो॒ न ज्येष्ठा॑ः सुनी॒तय॑ः सु॒शर्मा॑णो॒ न सोमा॑ ऋ॒तं य॒ते ॥२॥

Agnirna ye bhrajasa rukmavakshaso vataso na svayujah sadyautayah
Pragyataro na jyeshthah sunitayah susharmano na soma ritam yate

वाता॑सो॒ न ये धुन॑यो जिग॒त्नवो॑ऽग्नी॒नां न जि॒ह्वा वि॑रो॒किण॑ः ।
वर्म॑ण्वन्तो॒ न यो॒धाः शिमी॑वन्तः पितॄ॒णां न शंसा॑ः सुरा॒तय॑ः ॥३॥

Vataso na ye dhunayo jigatnavogninam na jihva virokinah
Varmanvanto na yodhah shimivantah pitrinam na shansah suratayah

रथा॑नां॒ न ये॒१राः सना॑भयो जिगी॒वांसो॒ न शूरा॑ अ॒भिद्य॑वः ।
व॒रे॒यवो॒ न मर्या॑ घृत॒प्रुषो॑ऽभिस्व॒र्तारो॑ अ॒र्कं न सु॒ष्टुभ॑ः ॥४॥

Rathanam na ye1rah sanabhayo jigivanso na shura abhidyavah
Vareyavo na marya ghritaprushobhisvartaro arkam na sushtubhah

अश्वा॑सो॒ न ये ज्येष्ठा॑स आ॒शवो॑ दिधि॒षवो॒ न र॒थ्य॑ः सु॒दान॑वः ।
आपो॒ न नि॒म्नैरु॒दभि॑र्जिग॒त्नवो॑ वि॒श्वरू॑पा॒ अङ्गि॑रसो॒ न साम॑भिः ॥५॥

Ashvaso na ye jyeshthasa ashavo didhishavo na rathyah sudanavah
Apo na nimnairudabhirjigatnavo vishvarupa angiraso na samabhih

ग्रावा॑णो॒ न सू॒रय॒ः सिन्धु॑मातर आदर्दि॒रासो॒ अद्र॑यो॒ न वि॒श्वहा॑ ।
शि॒शूला॒ न क्री॒ळय॑ः सुमा॒तरो॑ महाग्रा॒मो न याम॑न्नु॒त त्वि॒षा ॥६॥

Gravano na surayah sindhumatara adardiraso adrayo na vishvaha
Shishula na krilayah sumataro mahagramo na yamannuta tvisha

उ॒षसां॒ न के॒तवो॑ऽध्वर॒श्रिय॑ः शुभं॒यवो॒ नाञ्जिभि॒र्व्य॑श्वितन् ।
सिन्ध॑वो॒ न य॒यियो॒ भ्राज॑दृष्टयः परा॒वतो॒ न योज॑नानि ममिरे ॥७॥

Ushasam na ketavodhvarashriyah shubhanyavo nanjibhirvyashvitan
Sindhavo na yayiyo bhrajadrishtayah paravato na yojanani mamire

सु॒भा॒गान्नो॑ देवाः कृणुता सु॒रत्ना॑न॒स्मान्त्स्तो॒तॄन्म॑रुतो वावृधा॒नाः ।
अधि॑ स्तो॒त्रस्य॑ स॒ख्यस्य॑ गात स॒नाद्धि वो॑ रत्न॒धेया॑नि॒ सन्ति॑ ॥८॥

Subhaganno devah krinuta suratnanasmantstotrinmaruto vavridhanah
Adhi stotrasya sakhyasya gata sanaddhi vo ratnadheyani santi