সূক্ত 71

71.1

১১ বৃহস্পতিরাংগিরসঃ। জ্ঞানম্। ত্রিষ্টুপ্ ,৯ জগতী।

বৃহস্পতে প্রথমং বাচো অগ্রং যত্প্রৈরত নামধেয়ং দধানাঃ ।
যদেষাং শ্রেষ্ঠং যদরিপ্রমাসীত্প্রেণা তদেষাং নিহিতং গুহাবিঃ ॥১॥

সক্তুমিব তিতউনা পুনন্তো যত্র ধীরা মনসা বাচমক্রত ।
অত্রা সখায়ঃ সখ্যানি জানতে ভদ্রৈষাং লক্ষ্মীর্নিহিতাধি বাচি ॥২॥

যজ্ঞেন বাচঃ পদবীয়মায়ন্তামন্ববিন্দন্নৃষিষু প্রবিষ্টাম্ ।
তামাভৃত্যা ব্যদধুঃ পুরুত্রা তাং সপ্ত রেভা অভি সং নবন্তে ॥৩॥

উত ত্বঃ পশ্যন্ন দদর্শ বাচমুত ত্বঃ শৃণ্বন্ন শৃণোত্যেনাম্ ।
উতো ত্বস্মৈ তন্বং১ বি সস্রে জায়েব পত্য উশতী সুবাসাঃ ॥৪॥

উত ত্বং সখ্যে স্থিরপীতমাহুর্নৈনং হিন্বন্ত্যপি বাজিনেষু ।
অধেন্বা চরতি মায়য়ৈষ বাচং শুশ্রুবাঁ অফলামপুষ্পাম্ ॥৫॥

যস্তিত্যাজ সচিবিদং সখায়ং ন তস্য বাচ্যপি ভাগো অস্তি ।
যদীং শৃণোত্যলকং শৃণোতি নহি প্রবেদ সুকৃতস্য পন্থাম্ ॥৬॥

অক্ষণ্বন্তঃ কর্ণবন্তঃ সখায়ো মনোজবেষ্বসমা বভূবুঃ ।
আদঘ্নাস উপকক্ষাস উ ত্বে হ্রদা ইব স্নাত্বা উ ত্বে দদৃশ্রে ॥৭॥

হৃদা তষ্টেষু মনসো জবেষু যদ্ব্রাহ্মণাঃ সংয়জন্তে সখায়ঃ ।
অত্রাহ ত্বং বি জহুর্বেদ্যাভিরোহব্রহ্মাণো বি চরন্ত্যু ত্বে ॥৮॥

ইমে যে নার্বাঙ্ন পরশ্চরন্তি ন ব্রাহ্মণাসো ন সুতেকরাসঃ ।
ত এতে বাচমভিপদ্য পাপয়া সিরীস্তন্ত্রং তন্বতে অপ্রজজ্ঞয়ঃ ॥৯॥

সর্বে নন্দন্তি যশসাগতেন সভাসাহেন সখ্যা সখায়ঃ ।
কিল্বিষস্পৃত্পিতুষণির্হ্যেষামরং হিতো ভবতি বাজিনায় ॥১০॥

ঋচাং ত্বঃ পোষমাস্তে পুপুষ্বান্গায়ত্রং ত্বো গায়তি শক্বরীষু ।
ব্রহ্মা ত্বো বদতি জাতবিদ্যাং যজ্ঞস্য মাত্রাং বি মিমীত উ ত্বঃ ॥১১॥