সূক্ত 70

70.1

১১সুমিত্রো বাধ্র্যশ্বঃ। আপ্রীসূক্তং = (১ ইধ্মঃ সমিদ্ধোঽগ্নির্বা, ২ নরাশংসঃ, ৩ ইলঃ, ৪ বর্হিঃ, ৫ দেবীর্দ্বারঃ, ৬ উষাসানক্তা, ৭ দৈব্যৌ হোতারৌ প্রচেতসৌ, ৮ ত্রিস্রো দেব্যঃ সরস্বতীলাভারত্যঃ, ৯ ত্বষ্টা, ১০ বনস্পতিঃ, ১১ স্বাহাকৃতয়ঃ) । ত্রিষ্টুপ্।

ইমাং মে অগ্নে সমিধং জুষস্বেলস্পদে প্রতি হর্যা ঘৃতাচীম্ ।
বর্ষ্মন্পৃথিব্যাঃ সুদিনত্বে অহ্নামূর্ধ্বো ভব সুক্রতো দেবয়জ্যা ॥১॥

70.2

আ দেবানামগ্রয়াবেহ যাতু নরাশংসো বিশ্বরূপেভিরশ্বৈঃ ।
ঋতস্য পথা নমসা মিয়েধো দেবেভ্যো দেবতমঃ সুষূদৎ ॥২॥

70.3

শশ্বত্তমমীলতে দূত্যায় হবিষ্মন্তো মনুষ্যাসো অগ্নিম্ ।
বহিষ্ঠৈরশ্বৈঃ সুবৃতা রথেনা ঽঽদেবান্বক্ষি নি ষদেহ হোতা ॥৩॥

70.4

বি প্রথতাং দেবজুষ্টং তিরশ্চা দীর্ঘং দ্রাঘ্মা সুরভি ভূত্বস্মে ।
অহেলতা মনসা দেব বর্হিরিন্দ্রজ্যেষ্ঠাঁ উশতো যক্ষি দেবান্ ॥৪॥

70.5

দিবো বা সানু স্পৃশতা বরীয়ঃ পৃথিব্যা বা মাত্রয়া বি শ্রয়ধ্বম্ ।
উশতীর্দ্বারো মহিনা মহদ্ভির্দেবং রথং রথয়ুর্ধারয়ধ্বম্ ॥৫॥

70.6

দেবী দিবো দুহিতরা সুশিল্পে উষাসানক্তা সদতাং নি যোনৌ ।
আ বাং দেবাস উশতী উশন্ত উরৌ সীদন্তু সুভগে উপস্থে ॥৬॥

70.7

ঊর্ধ্বো গ্রাবা বৃহদগ্নিঃ সমিদ্ধঃ প্রিয়া ধামান্যদিতেরুপস্থে ।
পুরোহিতাবৃত্বিজা যজ্ঞে অস্মিন্বিদুষ্টরা দ্রবিণমা যজেথাম্ ॥৭॥

70.8

তিস্রো দেবীর্বর্হিরিদং বরীয় আ সীদত চকৃমা বঃ স্যোনম্ ।
মনুষ্বদ্যজ্ঞং সুধিতা হবীংষীলা দেবী ঘৃতপদী জুষন্ত ॥৮॥

70.9

দেব ত্বষ্টর্যদ্ধ চারুত্বমানড্যদঙ্গিরসামভবঃ সচাভূঃ ।
স দেবানাং পাথ উপ প্র বিদ্বাঁ উশন্যক্ষি দ্রবিণোদঃ সুরত্নঃ ॥৯॥

70.10

বনস্পতে রশনয়া নিয়ূয়া দেবানাং পাথ উপ বক্ষি বিদ্বান্ ।
স্বদাতি দেবঃ কৃণবদ্ধবীংষ্যবতাং দ্যাবাপৃথিবী হবং মে ॥১০॥

70.11

আগ্নে বহ বরুণমিষ্টয়ে ন ইন্দ্রং দিবো মরুতো অন্তরিক্ষাৎ ।
সীদন্তু বর্হির্বিশ্ব আ যজত্রাঃ স্বাহা দেবা অমৃতা মাদয়ন্তাম্ ॥১১॥