সূক্ত 69

69.1

১২ সুমিত্রো বাধ্র্যশ্বঃ। অগ্নিঃ। ত্রিষ্টুপ্, ১-২ জগতী।

ভদ্রা অগ্নের্বধ্র্যশ্বস্য সংদৃশো বামী প্রণীতিঃ সুরণা উপেতয়ঃ ।
যদীং সুমিত্রা বিশো অগ্র ইন্ধতে ঘৃতেনাহুতো জরতে দবিদ্যুতৎ ॥১॥

69.2

ঘৃতমগ্নের্বধ্র্যশ্বস্য বর্ধনং ঘৃতমন্নং ঘৃতম্বস্য মেদনম্ ।
ঘৃতেনাহুত উর্বিয়া বি পপ্রথে সূর্য ইব রোচতে সর্পিরাসুতিঃ ॥২॥

69.3

যত্তে মনুর্যদনীকং সুমিত্রঃ সমীধে অগ্নে তদিদং নবীয়ঃ ।
স রেবচ্ছোচ স গিরো জুষস্ব স বাজং দর্ষি স ইহ শ্রবো ধাঃ ॥৩॥

69.4

যং ত্বা পূর্বমীলিতো বধ্র্যশ্বঃ সমীধে অগ্নে স ইদং জুষস্ব ।
স নঃ স্তিপা উত ভবা তনূপা দাত্রং রক্ষস্ব যদিদং তে অস্মে ॥৪॥

69.5

ভবা দ্যুম্নী বাধ্র্যশ্বোত গোপা মা ত্বা তারীদভিমাতির্জনানাম্ ।
শূর ইব ধৃষ্ণুশ্চ্যবনঃ সুমিত্রঃ প্র নু বোচং বাধ্র্যশ্বস্য নাম ॥৫॥

69.6

সমজ্র্যা পর্বত্যা৩ বসূনি দাসা বৃত্রাণ্যার্যা জিগেথ ।
শূর ইব ধৃষ্ণুশ্চ্যবনো জনানাং ত্বমগ্নে পৃতনায়ূঁরভি ষ্যাঃ ॥৬॥

69.7

দীর্ঘতন্তুর্বৃহদুক্ষায়মগ্নিঃ সহস্রস্তরীঃ শতনীথ ঋভ্বা ।
দ্যুমান্দ্যুমত্সু নৃভির্মৃজ্যমানঃ সুমিত্রেষু দীদয়ো দেবয়ত্সু ॥৭॥

69.8

ত্বে ধেনুঃ সুদুঘা জাতবেদোঽসশ্চতেব সমনা সবর্ধুক্ ।
ত্বং নৃভির্দক্ষিণাবদ্ভিরগ্নে সুমিত্রেভিরিধ্যসে দেবয়দ্ভিঃ ॥৮॥

69.9

দেবাশ্চিত্তে অমৃতা জাতবেদো মহিমানং বাধ্র্যশ্ব প্র বোচন্ ।
যত্সম্পৃচ্ছং মানুষীর্বিশ আয়ন্ত্বং নৃভিরজয়স্ত্বাবৃধেভিঃ ॥৯॥

69.10

পিতেব পুত্রমবিভরুপস্থে ত্বামগ্নে বধ্র্যশ্বঃ সপর্যন্ ।
জুষাণো অস্য সমিধং যবিষ্ঠোত পূর্বাঁ অবনোর্ব্রাধতশ্চিৎ ॥১০॥

69.11

শশ্বদগ্নির্বধ্র্যশ্বস্য শত্রূন্নৃভির্জিগায় সুতসোমবদ্ভিঃ ।
সমনং চিদদহশ্চিত্রভানোঽব ব্রাধন্তমভিনদ্বৃধশ্চিৎ ॥১১॥

69.12

অয়মগ্নির্বধ্র্যশ্বস্য বৃত্রহা সনকাত্প্রেদ্ধো নমসোপবাক্যঃ ।
স নো অজামীঁরুত বা বিজামীনভি তিষ্ঠ শর্ধতো বাধ্র্যশ্ব ॥১২॥