Sukta 71

71.1

11 brihaspatirangirasah, gyanam, trishtup, 9 jagati

बृह॑स्पते प्रथ॒मं वा॒चो अग्रं॒ यत्प्रैर॑त नाम॒धेयं॒ दधा॑नाः ।
यदे॑षां॒ श्रेष्ठं॒ यद॑रि॒प्रमासी॑त्प्रे॒णा तदे॑षां॒ निहि॑तं॒ गुहा॒विः ॥१॥

Brihaspate prathamam vacho agram yatprairata namadheyam dadhanah
Yadesham shreshtham yadaripramasitprena tadesham nihitam guhavih

71.2

सक्तु॑मिव॒ तित॑उना पु॒नन्तो॒ यत्र॒ धीरा॒ मन॑सा॒ वाच॒मक्र॑त ।
अत्रा॒ सखा॑यः स॒ख्यानि॑ जानते भ॒द्रैषां॑ ल॒क्ष्मीर्निहि॒ताधि॑ वा॒चि ॥२॥

Saktumiva titauna punanto yatra dhira manasa vachamakrata
Atra sakhayah sakhyani janate bhadraisham lakshmirnihitadhi vachi

71.3

य॒ज्ञेन॑ वा॒चः प॑द॒वीय॑माय॒न्तामन्व॑विन्द॒न्नृषि॑षु॒ प्रवि॑ष्टाम् ।
तामा॒भृत्या॒ व्य॑दधुः पुरु॒त्रा तां स॒प्त रे॒भा अ॒भि सं न॑वन्ते ॥३॥

Yagyena vachah padaviyamayantamanvavindannrishishu pravishtam
Tamabhritya vyadadhuh purutra tam sapta rebha abhi sam navante

71.4

उ॒त त्व॒ः पश्य॒न्न द॑दर्श॒ वाच॑मु॒त त्व॑ः शृ॒ण्वन्न शृ॑णोत्येनाम् ।
उ॒तो त्व॑स्मै त॒न्वं१ वि स॑स्रे जा॒येव॒ पत्य॑ उश॒ती सु॒वासा॑ः ॥४॥

Uta tvah pashyanna dadarsha vachamuta tvah shrinvanna shrinotyenam
Uto tvasmai tanvan1 vi sasre jayeva patya ushati suvasah

71.5

उ॒त त्वं॑ स॒ख्ये स्थि॒रपी॑तमाहु॒र्नैनं॑ हिन्व॒न्त्यपि॒ वाजि॑नेषु ।
अधे॑न्वा चरति मा॒ययै॒ष वाचं॑ शुश्रु॒वाँ अ॑फ॒लाम॑पु॒ष्पाम् ॥५॥

Uta tvam sakhye sthirapitamahurnainam hinvantyapi vajineshu
Adhenva charati mayayaisha vacham shushruvam aphalamapushpam

71.6

यस्ति॒त्याज॑ सचि॒विदं॒ सखा॑यं॒ न तस्य॑ वा॒च्यपि॑ भा॒गो अ॑स्ति ।
यदीं॑ शृ॒णोत्यल॑कं शृणोति न॒हि प्र॒वेद॑ सुकृ॒तस्य॒ पन्था॑म् ॥६॥

Yastityaja sachividam sakhayam na tasya vachyapi bhago asti
Yadim shrinotyalakam shrinoti nahi praveda sukritasya pantham

71.7

अ॒क्ष॒ण्वन्त॒ः कर्ण॑वन्त॒ः सखा॑यो मनोज॒वेष्वस॑मा बभूवुः ।
आ॒द॒घ्नास॑ उपक॒क्षास॑ उ त्वे ह्र॒दा इ॑व॒ स्नात्वा॑ उ त्वे ददृश्रे ॥७॥

Akshanvantah karnavantah sakhayo manojaveshvasama babhuvuh
Adaghnasa upakakshasa u tve hrada iva snatva u tve dadrishre

71.8

हृ॒दा त॒ष्टेषु॒ मन॑सो ज॒वेषु॒ यद्ब्रा॑ह्म॒णाः सं॒यज॑न्ते॒ सखा॑यः ।
अत्राह॑ त्वं॒ वि ज॑हुर्वे॒द्याभि॒रोह॑ब्रह्माणो॒ वि च॑रन्त्यु त्वे ॥८॥

Hrida tashteshu manaso javeshu yadbrahmanah sanyajante sakhayah
Atraha tvam vi jahurvedyabhirohabrahmano vi charantyu tve

71.9

इ॒मे ये नार्वाङ्न प॒रश्चर॑न्ति॒ न ब्रा॑ह्म॒णासो॒ न सु॒तेक॑रासः ।
त ए॒ते वाच॑मभि॒पद्य॑ पा॒पया॑ सि॒रीस्तन्त्रं॑ तन्वते॒ अप्र॑जज्ञयः ॥९॥

Ime ye narvanna parashcharanti na brahmanaso na sutekarasah
Ta ete vachamabhipadya papaya siristantram tanvate aprajagyayah

71.10

सर्वे॑ नन्दन्ति य॒शसाग॑तेन सभासा॒हेन॒ सख्या॒ सखा॑यः ।
कि॒ल्बि॒ष॒स्पृत्पि॑तु॒षणि॒र्ह्ये॑षा॒मरं॑ हि॒तो भव॑ति॒ वाजि॑नाय ॥१०॥

Sarve nandanti yashasagatena sabhasahena sakhya sakhayah
Kilbishaspritpitushanirhyeshamaram hito bhavati vajinaya

71.11

ऋ॒चां त्व॒ः पोष॑मास्ते पुपु॒ष्वान्गा॑य॒त्रं त्वो॑ गायति॒ शक्व॑रीषु ।
ब्र॒ह्मा त्वो॒ वद॑ति जातवि॒द्यां य॒ज्ञस्य॒ मात्रां॒ वि मि॑मीत उ त्वः ॥११॥

Richam tvah poshamaste pupushvangayatram tvo gayati shakvarishu
Brahma tvo vadati jatavidyam yagyasya matram vi mimita u tvah