সূক্ত 50

50.1

৭ বৈকুণ্ঠ ইন্দ্রঃ। ইন্দ্রঃ। জগতীঃ, ৩,৪ অভিসারিণী, ৫ ত্রিষ্টুপ্।

প্র বো মহে মন্দমানায়ান্ধসোঽর্চা বিশ্বানরায় বিশ্বাভুবে ।
ইন্দ্রস্য যস্য সুমখং সহো মহি শ্রবো নৃম্ণং চ রোদসী সপর্যতঃ ॥১॥

সো চিন্নু সখ্যা নর্য ইনঃ স্তুতশ্চর্কৃত্য ইন্দ্রো মাবতে নরে ।
বিশ্বাসু ধূর্ষু বাজকৃত্যেষু সত্পতে বৃত্রে বাপ্স্ব১ভি শূর মন্দসে ॥২॥

কে তে নর ইন্দ্র যে ত ইষে যে তে সুম্নং সধন্য১মিয়ক্ষান্ ।
কে তে বাজায়াসুর্যায় হিন্বিরে কে অপ্সু স্বাসূর্বরাসু পৌংস্যে ॥৩॥

ভুবস্ত্বমিন্দ্র ব্রহ্মণা মহান্ভুবো বিশ্বেষু সবনেষু যজ্ঞিয়ঃ ।
ভুবো নৄঁশ্চ্যৌত্নো বিশ্বস্মিন্ভরে জ্যেষ্ঠশ্চ মন্ত্রো বিশ্বচর্ষণে ॥৪॥

অবা নু কং জ্যায়ান্যজ্ঞবনসো মহীং ত ওমাত্রাং কৃষ্টয়ো বিদুঃ ।
অসো নু কমজরো বর্ধাশ্চ বিশ্বেদেতা সবনা তূতুমা কৃষে ॥৫॥

এতা বিশ্বা সবনা তূতুমা কৃষে স্বয়ং সূনো সহসো যানি দধিষে ।
বরায় তে পাত্রং ধর্মণে তনা যজ্ঞো মন্ত্রো ব্রহ্মোদ্যতং বচঃ ॥৬॥

যে তে বিপ্র ব্রহ্মকৃতঃ সুতে সচা বসূনাং চ বসুনশ্চ দাবনে ।
প্র তে সুম্নস্য মনসা পথা ভুবন্মদে সুতস্য সোম্যস্যান্ধসঃ ॥৭॥