Sukta 50

50.1

7 vaikuntha indrah, indrah, jagatih, 3, 4 abhisarini, 5 trishtup

प्र वो॑ म॒हे मन्द॑माना॒यान्ध॒सोऽर्चा॑ वि॒श्वान॑राय विश्वा॒भुवे॑ ।
इन्द्र॑स्य॒ यस्य॒ सुम॑खं॒ सहो॒ महि॒ श्रवो॑ नृ॒म्णं च॒ रोद॑सी सप॒र्यत॑ः ॥१॥

Pra vo mahe mandamanayandhasorcha vishvanaraya vishvabhuve
Indrasya yasya sumakham saho mahi shravo nrimnam cha rodasi saparyatah

50.2

सो चि॒न्नु सख्या॒ नर्य॑ इ॒नः स्तु॒तश्च॒र्कृत्य॒ इन्द्रो॒ माव॑ते॒ नरे॑ ।
विश्वा॑सु धू॒र्षु वा॑ज॒कृत्ये॑षु सत्पते वृ॒त्रे वा॒प्स्व१भि शू॑र मन्दसे ॥२॥

So chinnu sakhya narya inah stutashcharkritya indro mavate nare
Vishvasu dhurshu vajakrityeshu satpate vritre vapsva1bhi shura mandase

50.3

के ते नर॑ इन्द्र॒ ये त॑ इ॒षे ये ते॑ सु॒म्नं स॑ध॒न्य१मिय॑क्षान् ।
के ते॒ वाजा॑यासु॒र्या॑य हिन्विरे॒ के अ॒प्सु स्वासू॒र्वरा॑सु॒ पौंस्ये॑ ॥३॥

Ke te nara indra ye ta ishe ye te sumnam sadhanya1miyakshan
Ke te vajayasuryaya hinvire ke apsu svasurvarasu paunsye

50.4

भुव॒स्त्वमि॑न्द्र॒ ब्रह्म॑णा म॒हान्भुवो॒ विश्वे॑षु॒ सव॑नेषु य॒ज्ञिय॑ः ।
भुवो॒ नॄँश्च्यौ॒त्नो विश्व॑स्मि॒न्भरे॒ ज्येष्ठ॑श्च॒ मन्त्रो॑ विश्वचर्षणे ॥४॥

Bhuvastvamindra brahmana mahanbhuvo vishveshu savaneshu yagyiyah
Bhuvo nrinshchyautno vishvasminbhare jyeshthashcha mantro vishvacharshane

50.5

अवा॒ नु कं॒ ज्याया॑न्य॒ज्ञव॑नसो म॒हीं त॒ ओमा॑त्रां कृ॒ष्टयो॑ विदुः ।
असो॒ नु क॑म॒जरो॒ वर्धा॑श्च॒ विश्वेदे॒ता सव॑ना तूतु॒मा कृ॑षे ॥५॥

Ava nu kam jyayanyagyavanaso mahim ta omatram krishtayo viduh
Aso nu kamajaro vardhashcha vishvedeta savana tutuma krishe

50.6

ए॒ता विश्वा॒ सव॑ना तूतु॒मा कृ॑षे स्व॒यं सू॑नो सहसो॒ यानि॑ दधि॒षे ।
वरा॑य ते॒ पात्रं॒ धर्म॑णे॒ तना॑ य॒ज्ञो मन्त्रो॒ ब्रह्मोद्य॑तं॒ वच॑ः ॥६॥

Eta vishva savana tutuma krishe svayam suno sahaso yani dadhishe
Varaya te patram dharmane tana yagyo mantro brahmodyatam vachah

50.7

ये ते॑ विप्र ब्रह्म॒कृत॑ः सु॒ते सचा॒ वसू॑नां च॒ वसु॑नश्च दा॒वने॑ ।
प्र ते सु॒म्नस्य॒ मन॑सा प॒था भु॑व॒न्मदे॑ सु॒तस्य॑ सो॒म्यस्यान्ध॑सः ॥७॥

Ye te vipra brahmakritah sute sacha vasunam cha vasunashcha davane
Pra te sumnasya manasa patha bhuvanmade sutasya somyasyandhasah