Sukta 51

51.1

(9) 1, 3, 5, 7, 9devah, 2, 4, 6, 8, sauchikognih, 2, , 4, 6, 8 devah 1, 3, 5, 7, 9, agnih, trishtup

म॒हत्तदुल्बं॒ स्थवि॑रं॒ तदा॑सी॒द्येनावि॑ष्टितः प्रवि॒वेशि॑था॒पः ।
विश्वा॑ अपश्यद्बहु॒धा ते॑ अग्ने॒ जात॑वेदस्त॒न्वो॑ दे॒व एक॑ः ॥१॥

Mahattadulbam sthaviram tadasidyenavishtitah praviveshithapah
Vishva apashyadbahudha te agne jatavedastanvo deva ekah

को मा॑ ददर्श कत॒मः स दे॒वो यो मे॑ त॒न्वो॑ बहु॒धा प॒र्यप॑श्यत् ।
क्वाह॑ मित्रावरुणा क्षियन्त्य॒ग्नेर्विश्वा॑ः स॒मिधो॑ देव॒यानी॑ः ॥२॥

Ko ma dadarsha katamah sa devo yo me tanvo bahudha paryapashyat
Kvaha mitravaruna kshiyantyagnervishvah samidho devayanih

ऐच्छा॑म त्वा बहु॒धा जा॑तवेद॒ः प्रवि॑ष्टमग्ने अ॒प्स्वोष॑धीषु ।
तं त्वा॑ य॒मो अ॑चिकेच्चित्रभानो दशान्तरु॒ष्याद॑ति॒रोच॑मानम् ॥३॥

Aichchhama tva bahudha jatavedah pravishtamagne apsvoshadhishu
Tam tva yamo achikechchitrabhano dashantarushyadatirochamanam

हो॒त्राद॒हं व॑रुण॒ बिभ्य॑दायं॒ नेदे॒व मा॑ यु॒नज॒न्नत्र॑ दे॒वाः ।
तस्य॑ मे त॒न्वो॑ बहु॒धा निवि॑ष्टा ए॒तमर्थं॒ न चि॑केता॒हम॒ग्निः ॥४॥

Hotradaham varuna bibhyadayam nedeva ma yunajannatra devah
Tasya me tanvo bahudha nivishta etamartham na chiketahamagnih

एहि॒ मनु॑र्देव॒युर्य॒ज्ञका॑मोऽरं॒कृत्या॒ तम॑सि क्षेष्यग्ने ।
सु॒गान्प॒थः कृ॑णुहि देव॒याना॒न्वह॑ ह॒व्यानि॑ सुमन॒स्यमा॑नः ॥५॥

Ehi manurdevayuryagyakamorankritya tamasi ksheshyagne
Suganpathah krinuhi devayananvaha havyani sumanasyamanah

अ॒ग्नेः पूर्वे॒ भ्रात॑रो॒ अर्थ॑मे॒तं र॒थीवाध्वा॑न॒मन्वाव॑रीवुः ।
तस्मा॑द्भि॒या व॑रुण दू॒रमा॑यं गौ॒रो न क्षे॒प्नोर॑विजे॒ ज्याया॑ः ॥६॥

Agneh purve bhrataro arthametam rathivadhvanamanvavarivuh
Tasmadbhiya varuna duramayam gauro na kshepnoravije jyayah

कु॒र्मस्त॒ आयु॑र॒जरं॒ यद॑ग्ने॒ यथा॑ यु॒क्तो जा॑तवेदो॒ न रिष्या॑ः ।
अथा॑ वहासि सुमन॒स्यमा॑नो भा॒गं दे॒वेभ्यो॑ ह॒विष॑ः सुजात ॥७॥

Kurmasta ayurajaram yadagne yatha yukto jatavedo na rishyah
Atha vahasi sumanasyamano bhagam devebhyo havishah sujata

प्र॒या॒जान्मे॑ अनुया॒जाँश्च॒ केव॑ला॒नूर्ज॑स्वन्तं ह॒विषो॑ दत्त भा॒गम् ।
घृ॒तं चा॒पां पुरु॑षं॒ चौष॑धीनाम॒ग्नेश्च॑ दी॒र्घमायु॑रस्तु देवाः ॥८॥

Prayajanme anuyajanshcha kevalanurjasvantam havisho datta bhagam
Ghritam chapam purusham chaushadhinamagneshcha dirghamayurastu devah

तव॑ प्रया॒जा अ॑नुया॒जाश्च॒ केव॑ल॒ ऊर्ज॑स्वन्तो ह॒विष॑ः सन्तु भा॒गाः ।
तवा॑ग्ने य॒ज्ञो॒३ऽयम॑स्तु॒ सर्व॒स्तुभ्यं॑ नमन्तां प्र॒दिश॒श्चत॑स्रः ॥९॥

Tava prayaja anuyajashcha kevala urjasvanto havishah santu bhagah
Tavagne yagyo3yamastu sarvastubhyam namantam pradishashchatasrah