Sukta 52

52.1

6 sauchikognih, vishvedevah, trishtup

विश्वे॑ देवाः शा॒स्तन॑ मा॒ यथे॒ह होता॑ वृ॒तो म॒नवै॒ यन्नि॒षद्य॑ ।
प्र मे॑ ब्रूत भाग॒धेयं॒ यथा॑ वो॒ येन॑ प॒था ह॒व्यमा वो॒ वहा॑नि ॥१॥

Vishve devah shastana ma yatheha hota vrito manavai yannishadya
Pra me bruta bhagadheyam yatha vo yena patha havyama vo vahani

अ॒हं होता॒ न्य॑सीदं॒ यजी॑या॒न्विश्वे॑ दे॒वा म॒रुतो॑ मा जुनन्ति ।
अह॑रहरश्वि॒नाध्व॑र्यवं वां ब्र॒ह्मा स॒मिद्भ॑वति॒ साहु॑तिर्वाम् ॥२॥

Aham hota nyasidam yajiyanvishve deva maruto ma junanti
Aharaharashvinadhvaryavam vam brahma samidbhavati sahutirvam

अ॒यं यो होता॒ किरु॒ स य॒मस्य॒ कमप्यू॑हे॒ यत्स॑म॒ञ्जन्ति॑ दे॒वाः ।
अह॑रहर्जायते मा॒सिमा॒स्यथा॑ दे॒वा द॑धिरे हव्य॒वाह॑म् ॥३॥

Ayam yo hota kiru sa yamasya kamapyuhe yatsamanjanti devah
Aharaharjayate masimasyatha deva dadhire havyavaham

मां दे॒वा द॑धिरे हव्य॒वाह॒मप॑म्लुक्तं ब॒हु कृ॒च्छ्रा चर॑न्तम् ।
अ॒ग्निर्वि॒द्वान्य॒ज्ञं न॑ः कल्पयाति॒ पञ्च॑यामं त्रि॒वृतं॑ स॒प्तत॑न्तुम् ॥४॥

Mam deva dadhire havyavahamapamluktam bahu krichchhra charantam
Agnirvidvanyagyam nah kalpayati panchayamam trivritam saptatantum

आ वो॑ यक्ष्यमृत॒त्वं सु॒वीरं॒ यथा॑ वो देवा॒ वरि॑व॒ः करा॑णि ।
आ बा॒ह्वोर्वज्र॒मिन्द्र॑स्य धेया॒मथे॒मा विश्वा॒ः पृत॑ना जयाति ॥५॥

A vo yakshyamritatvam suviram yatha vo deva varivah karani
A bahvorvajramindrasya dheyamathema vishvah pritana jayati

त्रीणि॑ श॒ता त्री स॒हस्रा॑ण्य॒ग्निं त्रिं॒शच्च॑ दे॒वा नव॑ चासपर्यन् ।
औक्ष॑न्घृ॒तैरस्तृ॑णन्ब॒र्हिर॑स्मा॒ आदिद्धोता॑रं॒ न्य॑सादयन्त ॥६॥

Trini shata tri sahasranyagnim trinshachcha deva nava chasaparyan
Aukshanghritairastrinanbarhirasma adiddhotaram nyasadayanta