সূক্ত 51

51.1

(৯) ১,৩,৫,৭,৯দেবাঃ, ২,৪,৬,৮, সৌচীকোঽগ্নিঃ। ২,,৪,৬,৮ দেবাঃ ১,৩,৫,৭,৯, অগ্নিঃ।ত্রিষ্টুপ্।

মহত্তদুল্বং স্থবিরং তদাসীদ্যেনাবিষ্টিতঃ প্রবিবেশিথাপঃ ।
বিশ্বা অপশ্যদ্বহুধা তে অগ্নে জাতবেদস্তন্বো দেব একঃ ॥১॥

কো মা দদর্শ কতমঃ স দেবো যো মে তন্বো বহুধা পর্যপশ্যৎ ।
ক্বাহ মিত্রাবরুণা ক্ষিয়ন্ত্যগ্নের্বিশ্বাঃ সমিধো দেবয়ানীঃ ॥২॥

ঐচ্ছাম ত্বা বহুধা জাতবেদঃ প্রবিষ্টমগ্নে অপ্স্বোষধীষু ।
তং ত্বা যমো অচিকেচ্চিত্রভানো দশান্তরুষ্যাদতিরোচমানম্ ॥৩॥

হোত্রাদহং বরুণ বিভ্যদায়ং নেদেব মা যুনজন্নত্র দেবাঃ ।
তস্য মে তন্বো বহুধা নিবিষ্টা এতমর্থং ন চিকেতাহমগ্নিঃ ॥৪॥

এহি মনুর্দেবয়ুর্যজ্ঞকামোঽরংকৃত্যা তমসি ক্ষেষ্যগ্নে ।
সুগান্পথঃ কৃণুহি দেবয়ানান্বহ হব্যানি সুমনস্যমানঃ ॥৫॥

অগ্নেঃ পূর্বে ভ্রাতরো অর্থমেতং রথীবাধ্বানমন্বাবরীবুঃ ।
তস্মাদ্ভিয়া বরুণ দূরমায়ং গৌরো ন ক্ষেপ্নোরবিজে জ্যায়াঃ ॥৬॥

কুর্মস্ত আয়ুরজরং যদগ্নে যথা যুক্তো জাতবেদো ন রিষ্যাঃ ।
অথা বহাসি সুমনস্যমানো ভাগং দেবেভ্যো হবিষঃ সুজাত ॥৭॥

প্রয়াজান্মে অনুয়াজাঁশ্চ কেবলানূর্জস্বন্তং হবিষো দত্ত ভাগম্ ।
ঘৃতং চাপাং পুরুষং চৌষধীনামগ্নেশ্চ দীর্ঘমায়ুরস্তু দেবাঃ ॥৮॥

তব প্রয়াজা অনুয়াজাশ্চ কেবল ঊর্জস্বন্তো হবিষঃ সন্তু ভাগাঃ ।
তবাগ্নে যজ্ঞো৩ঽয়মস্তু সর্বস্তুভ্যং নমন্তাং প্রদিশশ্চতস্রঃ ॥৯॥