সূক্ত 42

42.1

১১ কৃষ্ণ আঙ্গিরসঃ। ইন্দ্রঃ। ত্রিষ্টুপ্।

অস্তেব সু প্রতরং লায়মস্যন্ভূষন্নিব প্র ভরা স্তোমমস্মৈ ।
বাচা বিপ্রাস্তরত বাচমর্যো নি রাময় জরিতঃ সোম ইন্দ্রম্ ॥১॥

42.2

দোহেন গামুপ শিক্ষা সখায়ং প্র বোধয় জরিতর্জারমিন্দ্রম্ ।
কোশং ন পূর্ণং বসুনা ন্যৃষ্টমা চ্যাবয় মঘদেয়ায় শূরম্ ॥২॥

42.3

কিমঙ্গ ত্বা মঘবন্ভোজমাহুঃ শিশীহি মা শিশয়ং ত্বা শৃণোমি ।
অপ্নস্বতী মম ধীরস্তু শক্র বসুবিদং ভগমিন্দ্রা ভরা নঃ ॥৩॥

42.4

ত্বাং জনা মমসত্যেষ্বিন্দ্র সংতস্থানা বি হ্বয়ন্তে সমীকে ।
অত্রা যুজং কৃণুতে যো হবিষ্মান্নাসুন্বতা সখ্যং বষ্টি শূরঃ ॥৪॥

42.5

ধনং ন স্যন্দ্রং বহুলং যো অস্মৈ তীব্রান্ত্সোমাঁ আসুনোতি প্রয়স্বান্ ।
তস্মৈ শত্রূন্ত্সুতুকান্প্রাতরহ্নো নি স্বষ্ট্রান্যুবতি হন্তি বৃত্রম্ ॥৫॥

42.6

যস্মিন্বয়ং দধিমা শংসমিন্দ্রে যঃ শিশ্রায় মঘবা কামমস্মে ।
আরাচ্চিত্সন্ভয়তামস্য শত্রুর্ন্যস্মৈ দ্যুম্না জন্যা নমন্তাম্ ॥৬॥

42.7

আরাচ্ছত্রুমপ বাধস্ব দূরমুগ্রো যঃ শম্বঃ পুরুহূত তেন ।
অস্মে ধেহি যবমদ্গোমদিন্দ্র কৃধী ধিয়ং জরিত্রে বাজরত্নাম্ ॥৭॥

42.8

প্র যমন্তর্বৃষসবাসো অগ্মন্তীব্রাঃ সোমা বহুলান্তাস ইন্দ্রম্ ।
নাহ দামানং মঘবা নি যংসন্নি সুন্বতে বহতি ভূরি বামম্ ॥৮॥

42.9

উত প্রহামতিদীব্যা জয়াতি কৃতং যচ্ছ্বঘ্নী বিচিনোতি কালে ।
যো দেবকামো ন ধনা রুণদ্ধি সমিত্তং রায়া সৃজতি স্বধাবান্ ॥৯॥

42.10

গোভিষ্টরেমামতিং দুরেবাং যবেন ক্ষুধং পুরুহূত বিশ্বাম্ ।
বয়ং রাজভিঃ প্রথমা ধনান্যস্মাকেন বৃজনেনা জয়েম ॥১০॥

42.11

বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরিবঃ কৃণোতু ॥১১॥