সূক্ত 43

43.1

১১ কৃষ্ণ আঙ্গিরসঃ। ইন্দ্রঃ। জগতী,১০-১১ ত্রিষ্টুপ্।

অচ্ছা ম ইন্দ্রং মতয়ঃ স্বর্বিদঃ সধ্রীচীর্বিশ্বা উশতীরনূষত ।
পরি ষ্বজন্তে জনয়ো যথা পতিং মর্যং ন শুন্ধ্যুং মঘবানমূতয়ে ॥১॥

43.2

ন ঘা ত্বদ্রিগপ বেতি মে মনস্ত্বে ইত্কামং পুরুহূত শিশ্রয় ।
রাজেব দস্ম নি ষদোঽধি বর্হিষ্যস্মিন্ত্সু সোমেঽবপানমস্তু তে ॥২॥

43.3

বিষূবৃদিন্দ্রো অমতেরুত ক্ষুধঃ স ইদ্রায়ো মঘবা বস্ব ঈশতে ।
তস্যেদিমে প্রবণে সপ্ত সিন্ধবো বয়ো বর্ধন্তি বৃষভস্য শুষ্মিণঃ ॥৩॥

43.4

বয়ো ন বৃক্ষং সুপলাশমাসদন্ত্সোমাস ইন্দ্রং মন্দিনশ্চমূষদঃ ।
প্রৈষামনীকং শবসা দবিদ্যুতদ্বিদত্স্ব১র্মনবে জ্যোতিরার্যম্ ॥৪॥

43.5

কৃতং ন শ্বঘ্নী বি চিনোতি দেবনে সংবর্গং যন্মঘবা সূর্যং জয়ৎ ।
ন তত্তে অন্যো অনু বীর্যং শকন্ন পুরাণো মঘবন্নোত নূতনঃ ॥৫॥

43.6

বিশংবিশং মঘবা পর্যশায়ত জনানাং ধেনা অবচাকশদ্বৃষা ।
যস্যাহ শক্রঃ সবনেষু রণ্যতি স তীব্রৈঃ সোমৈঃ সহতে পৃতন্যতঃ ॥৬॥

43.7

আপো ন সিন্ধুমভি যত্সমক্ষরন্ত্সোমাস ইন্দ্রং কুল্যা ইব হ্রদম্ ।
বর্ধন্তি বিপ্রা মহো অস্য সাদনে যবং ন বৃষ্টির্দিব্যেন দানুনা ॥৭॥

43.8

বৃষা ন ক্রুদ্ধঃ পতয়দ্রজঃস্বা যো অর্যপত্নীরকৃণোদিমা অপঃ ।
স সুন্বতে মঘবা জীরদানবেঽবিন্দজ্জ্যোতির্মনবে হবিষ্মতে ॥৮॥

43.9

উজ্জায়তাং পরশুর্জ্যোতিষা সহ ভূয়া ঋতস্য সুদুঘা পুরাণবৎ ।
বি রোচতামরুষো ভানুনা শুচিঃ স্ব১র্ণ শুক্রং শুশুচীত সত্পতিঃ ॥৯॥

43.10

গোভিষ্টরেমামতিং দুরেবাং যবেন ক্ষুধং পুরুহূত বিশ্বাম্ ।
বয়ং রাজভিঃ প্রথমা ধনান্যস্মাকেন বৃজনেনা জয়েম ॥১০॥

43.11

বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরিবঃ কৃণোতু ॥১১॥