সূক্ত 44

44.1

১১ কৃষ্ণ আঙ্গিরসঃ। ইন্দ্রঃ। জগতী,১-৩,১০-১১ ত্রিষ্টুপ্।

আ যাত্বিন্দ্রঃ স্বপতির্মদায় যো ধর্মণা তূতুজানস্তুবিষ্মান্ ।
প্রত্বক্ষাণো অতি বিশ্বা সহাংস্যপারেণ মহতা বৃষ্ণ্যেন ॥১॥

সুষ্ঠামা রথঃ সুয়মা হরী তে মিম্যক্ষ বজ্রো নৃপতে গভস্তৌ ।
শীভং রাজন্ত্সুপথা যাহ্যর্বাঙ্বর্ধাম তে পপুষো বৃষ্ণ্যানি ॥২॥

এন্দ্রবাহো নৃপতিং বজ্রবাহুমুগ্রমুগ্রাসস্তবিষাস এনম্ ।
প্রত্বক্ষসং বৃষভং সত্যশুষ্মমেমস্মত্রা সধমাদো বহন্তু ॥৩॥

এবা পতিং দ্রোণসাচং সচেতসমূর্জঃ স্কম্ভং ধরুণ আ বৃষায়সে ।
ওজঃ কৃষ্ব সং গৃভায় ত্বে অপ্যসো যথা কেনিপানামিনো বৃধে ॥৪॥

গমন্নস্মে বসূন্যা হি শংসিষং স্বাশিষং ভরমা যাহি সোমিনঃ ।
ত্বমীশিষে সাস্মিন্না সত্সি বর্হিষ্যনাধৃষ্যা তব পাত্রাণি ধর্মণা ॥৫॥

পৃথক্প্রায়ন্প্রথমা দেবহূতয়োঽকৃণ্বত শ্রবস্যানি দুষ্টরা ।
ন যে শেকুর্যজ্ঞিয়াং নাবমারুহমীর্মৈব তে ন্যবিশন্ত কেপয়ঃ ॥৬॥

এবৈবাপাগপরে সন্তু দূঢ্যোঽশ্বা যেষাং দুর্যুজ আয়ুয়ুজ্রে ।
ইত্থা যে প্রাগুপরে সন্তি দাবনে পুরূণি যত্র বয়ুনানি ভোজনা ॥৭॥

গিরীঁরজ্রান্রেজমানাঁ অধারয়দ্দ্যৌঃ ক্রন্দদন্তরিক্ষাণি কোপয়ৎ ।
সমীচীনে ধিষণে বি ষ্কভায়তি বৃষ্ণঃ পীত্বা মদ উক্থানি শংসতি ॥৮॥

ইমং বিভর্মি সুকৃতং তে অঙ্কুশং যেনারুজাসি মঘবঞ্ছফারুজঃ ।
অস্মিন্ত্সু তে সবনে অস্ত্বোক্যং সুত ইষ্টৌ মঘবন্বোধ্যাভগঃ ॥৯॥

গোভিষ্টরেমামতিং দুরেবাং যবেন ক্ষুধং পুরুহূত বিশ্বাম্ ।
বয়ং রাজভিঃ প্রথমা ধনান্যস্মাকেন বৃজনেনা জয়েম ॥১০॥

বৃহস্পতির্নঃ পরি পাতু পশ্চাদুতোত্তরস্মাদধরাদঘায়োঃ ।
ইন্দ্রঃ পুরস্তাদুত মধ্যতো নঃ সখা সখিভ্যো বরিবঃ কৃণোতু ॥১১॥