Sukta 42

42.1

11 krishna angirasah, indrah, trishtup

अस्ते॑व॒ सु प्र॑त॒रं लाय॒मस्य॒न्भूष॑न्निव॒ प्र भ॑रा॒ स्तोम॑मस्मै ।
वा॒चा वि॑प्रास्तरत॒ वाच॑म॒र्यो नि रा॑मय जरित॒ः सोम॒ इन्द्र॑म् ॥१॥

Asteva su prataram layamasyanbhushanniva pra bhara stomamasmai
Vacha viprastarata vachamaryo ni ramaya jaritah soma indram

42.2

दोहे॑न॒ गामुप॑ शिक्षा॒ सखा॑यं॒ प्र बो॑धय जरितर्जा॒रमिन्द्र॑म् ।
कोशं॒ न पू॒र्णं वसु॑ना॒ न्यृ॑ष्ट॒मा च्या॑वय मघ॒देया॑य॒ शूर॑म् ॥२॥

Dohena gamupa shiksha sakhayam pra bodhaya jaritarjaramindram
Kosham na purnam vasuna nyrishtama chyavaya maghadeyaya shuram

42.3

किम॒ङ्ग त्वा॑ मघवन्भो॒जमा॑हुः शिशी॒हि मा॑ शिश॒यं त्वा॑ शृणोमि ।
अप्न॑स्वती॒ मम॒ धीर॑स्तु शक्र वसु॒विदं॒ भग॑मि॒न्द्रा भ॑रा नः ॥३॥

Kimanga tva maghavanbhojamahuh shishihi ma shishayam tva shrinomi
Apnasvati mama dhirastu shakra vasuvidam bhagamindra bhara nah

42.4

त्वां जना॑ ममस॒त्येष्वि॑न्द्र संतस्था॒ना वि ह्व॑यन्ते समी॒के ।
अत्रा॒ युजं॑ कृणुते॒ यो ह॒विष्मा॒न्नासु॑न्वता स॒ख्यं व॑ष्टि॒ शूर॑ः ॥४॥

Tvam jana mamasatyeshvindra santasthana vi hvayante samike
Atra yujam krinute yo havishmannasunvata sakhyam vashti shurah

42.5

धनं॒ न स्य॒न्द्रं ब॑हु॒लं यो अ॑स्मै ती॒व्रान्त्सोमाँ॑ आसु॒नोति॒ प्रय॑स्वान् ।
तस्मै॒ शत्रू॑न्त्सु॒तुका॑न्प्रा॒तरह्नो॒ नि स्वष्ट्रा॑न्यु॒वति॒ हन्ति॑ वृ॒त्रम् ॥५॥

Dhanam na syandram bahulam yo asmai tivrantsomam asunoti prayasvan
Tasmai shatruntsutukanpratarahno ni svashtranyuvati hanti vritram

42.6

यस्मि॑न्व॒यं द॑धि॒मा शंस॒मिन्द्रे॒ यः शि॒श्राय॑ म॒घवा॒ काम॑म॒स्मे ।
आ॒राच्चि॒त्सन्भ॑यतामस्य॒ शत्रु॒र्न्य॑स्मै द्यु॒म्ना जन्या॑ नमन्ताम् ॥६॥

Yasminvayam dadhima shansamindre yah shishraya maghava kamamasme
Arachchitsanbhayatamasya shatrurnyasmai dyumna janya namantam

42.7

आ॒राच्छत्रु॒मप॑ बाधस्व दू॒रमु॒ग्रो यः शम्ब॑ः पुरुहूत॒ तेन॑ ।
अ॒स्मे धे॑हि॒ यव॑म॒द्गोम॑दिन्द्र कृ॒धी धियं॑ जरि॒त्रे वाज॑रत्नाम् ॥७॥

Arachchhatrumapa badhasva duramugro yah shambah puruhuta tena
Asme dhehi yavamadgomadindra kridhi dhiyam jaritre vajaratnam

42.8

प्र यम॒न्तर्वृ॑षस॒वासो॒ अग्म॑न्ती॒व्राः सोमा॑ बहु॒लान्ता॑स॒ इन्द्र॑म् ।
नाह॑ दा॒मानं॑ म॒घवा॒ नि यं॑स॒न्नि सु॑न्व॒ते व॑हति॒ भूरि॑ वा॒मम् ॥८॥

Pra yamantarvrishasavaso agmantivrah soma bahulantasa indram
Naha damanam maghava ni yansanni sunvate vahati bhuri vamam

42.9

उ॒त प्र॒हाम॑ति॒दीव्या॑ जयाति कृ॒तं यच्छ्व॒घ्नी वि॑चि॒नोति॑ का॒ले ।
यो दे॒वका॑मो॒ न धना॑ रुणद्धि॒ समित्तं रा॒या सृ॑जति स्व॒धावा॑न् ॥९॥

Uta prahamatidivya jayati kritam yachchhvaghni vichinoti kale
Yo devakamo na dhana runaddhi samittam raya srijati svadhavan

42.10

गोभि॑ष्टरे॒माम॑तिं दु॒रेवां॒ यवे॑न॒ क्षुधं॑ पुरुहूत॒ विश्वा॑म् ।
व॒यं राज॑भिः प्रथ॒मा धना॑न्य॒स्माके॑न वृ॒जने॑ना जयेम ॥१०॥

Gobhishtaremamatim durevam yavena kshudham puruhuta vishvam
Vayam rajabhih prathama dhananyasmakena vrijanena jayema

42.11

बृह॒स्पति॑र्न॒ः परि॑ पातु प॒श्चादु॒तोत्त॑रस्मा॒दध॑रादघा॒योः ।
इन्द्र॑ः पु॒रस्ता॑दु॒त म॑ध्य॒तो न॒ः सखा॒ सखि॑भ्यो॒ वरि॑वः कृणोतु ॥११॥

Brihaspatirnah pari patu pashchadutottarasmadadharadaghayoh
Indrah purastaduta madhyato nah sakha sakhibhyo varivah krinotu