সূক্ত 41

41.1

৩ সুহস্ত্যো ঘৌষেয়ঃ। অশ্বিনৌ। জগতী।

সমানমু ত্যং পুরুহূতমুক্থ্যং১ রথং ত্রিচক্রং সবনা গনিগ্মতম্ ।
পরিজ্মানং বিদথ্যং সুবৃক্তিভির্বয়ং ব্যুষ্টা উষসো হবামহে ॥১॥

41.2

প্রাতর্যুজং নাসত্যাধি তিষ্ঠথঃ প্রাতর্যাবাণং মধুবাহনং রথম্ ।
বিশো যেন গচ্ছথো যজ্বরীর্নরা কীরেশ্চিদ্যজ্ঞং হোতৃমন্তমশ্বিনা ॥২॥

41.3

অধ্বর্যুং বা মধুপাণিং সুহস্ত্যমগ্নিধং বা ধৃতদক্ষং দমূনসম্ ।
বিপ্রস্য বা যত্সবনানি গচ্ছথোঽত আ যাতং মধুপেয়মশ্বিনা ॥৩॥