সূক্ত 40

40.1

১৪ কাক্ষীবতী ঘোষা। অশ্বিনৌ। জগতী।

রথং যান্তং কুহ কো হ বাং নরা প্রতি দ্যুমন্তং সুবিতায় ভূষতি ।
প্রাতর্যাবাণং বিভ্বং বিশেবিশে বস্তোর্বস্তোর্বহমানং ধিয়া শমি ॥১॥

40.2

কুহ স্বিদ্দোষা কুহ বস্তোরশ্বিনা কুহাভিপিত্বং করতঃ কুহোষতুঃ ।
কো বাং শয়ুত্রা বিধবেব দেবরং মর্যং ন যোষা কৃণুতে সধস্থ আ ॥২॥

40.3

প্রাতর্জরেথে জরণেব কাপয়া বস্তোর্বস্তোর্যজতা গচ্ছথো গৃহম্ ।
কস্য ধ্বস্রা ভবথঃ কস্য বা নরা রাজপুত্রেব সবনাব গচ্ছথঃ ॥৩॥

40.4

যুবাং মৃগেব বারণা মৃগণ্যবো দোষা বস্তোর্হবিষা নি হ্বয়ামহে ।
যুবং হোত্রামৃতুথা জুহ্বতে নরেষং জনায় বহথঃ শুভস্পতী ॥৪॥

40.5

যুবাং হ ঘোষা পর্যশ্বিনা যতী রাজ্ঞ ঊচে দুহিতা পৃচ্ছে বাং নরা ।
ভূতং মে অহ্ন উত ভূতমক্তবেঽশ্বাবতে রথিনে শক্তমর্বতে ॥৫॥

40.6

যুবং কবী ষ্ঠঃ পর্যশ্বিনা রথং বিশো ন কুত্সো জরিতুর্নশায়থঃ ।
যুবোর্হ মক্ষা পর্যশ্বিনা মধ্বাসা ভরত নিষ্কৃতং ন যোষণা ॥৬॥

40.7

যুবং হ ভুজ্যুং যুবমশ্বিনা বশং যুবং শিঞ্জারমুশনামুপারথুঃ ।
যুবো ররাবা পরি সখ্যমাসতে যুবোরহমবসা সুম্নমা চকে ॥৭॥

40.8

যুবং হ কৃশং যুবমশ্বিনা শয়ুং যুবং বিধন্তং বিধবামুরুষ্যথঃ ।
যুবং সনিভ্যঃ স্তনয়ন্তমশ্বিনাঽপ ব্রজমূর্ণুথঃ সপ্তাস্যম্ ॥৮॥

40.9

জনিষ্ট যোষা পতয়ত্কনীনকো বি চারুহন্বীরুধো দংসনা অনু ।
আস্মৈ রীয়ন্তে নিবনেব সিন্ধবোঽস্মা অহ্নে ভবতি তত্পতিত্বনম্ ॥৯॥

40.10

জীবং রুদন্তি বি ময়ন্তে অধ্বরে দীর্ঘামনু প্রসিতিং দীধিয়ুর্নরঃ ।
বামং পিতৃভ্যো য ইদং সমেরিরে ময়ঃ পতিভ্যো জনয়ঃ পরিষ্বজে ॥১০॥

40.11

ন তস্য বিদ্ম তদু ষু প্র বোচত যুবা হ যদ্যুবত্যাঃ ক্ষেতি যোনিষু ।
প্রিয়োস্রিয়স্য বৃষভস্য রেতিনো গৃহং গমেমাশ্বিনা তদুশ্মসি ॥১১॥

40.12

আ বামগন্ত্সুমতির্বাজিনীবসূ ন্যশ্বিনা হৃত্সু কামা অয়ংসত ।
অভূতং গোপা মিথুনা শুভস্পতী প্রিয়া অর্যম্ণো দুর্যাঁ অশীমহি ॥১২॥

40.13

তা মন্দসানা মনুষো দুরোণ আ ধত্তং রয়িং সহবীরং বচস্যবে ।
কৃতং তীর্থং সুপ্রপাণং শুভস্পতী স্থাণুং পথেষ্ঠামপ দুর্মতিং হতম্ ॥১৩॥

40.14

ক্ব স্বিদদ্য কতমাস্বশ্বিনা বিক্ষু দস্রা মাদয়েতে শুভস্পতী ।
ক ঈং নি যেমে কতমস্য জগ্মতুর্বিপ্রস্য বা যজমানস্য বা গৃহম্ ॥১৪॥