Sukta 40

40.1

14 kakshivati ghosha, ashvinau, jagati

रथं॒ यान्तं॒ कुह॒ को ह॑ वां नरा॒ प्रति॑ द्यु॒मन्तं॑ सुवि॒ताय॑ भूषति ।
प्रा॒त॒र्यावा॑णं वि॒भ्वं॑ वि॒शेवि॑शे॒ वस्तो॑र्वस्तो॒र्वह॑मानं धि॒या शमि॑ ॥१॥

Ratham yantam kuha ko ha vam nara prati dyumantam suvitaya bhushati
Prataryavanam vibhvam vishevishe vastorvastorvahamanam dhiya shami

40.2

कुह॑ स्विद्दो॒षा कुह॒ वस्तो॑र॒श्विना॒ कुहा॑भिपि॒त्वं क॑रत॒ः कुहो॑षतुः ।
को वां॑ शयु॒त्रा वि॒धवे॑व दे॒वरं॒ मर्यं॒ न योषा॑ कृणुते स॒धस्थ॒ आ ॥२॥

Kuha sviddosha kuha vastorashvina kuhabhipitvam karatah kuhoshatuh
Ko vam shayutra vidhaveva devaram maryam na yosha krinute sadhastha a

40.3

प्रा॒तर्ज॑रेथे जर॒णेव॒ काप॑या॒ वस्तो॑र्वस्तोर्यज॒ता ग॑च्छथो गृ॒हम् ।
कस्य॑ ध्व॒स्रा भ॑वथ॒ः कस्य॑ वा नरा राजपु॒त्रेव॒ सव॒नाव॑ गच्छथः ॥३॥

Pratarjarethe jaraneva kapaya vastorvastoryajata gachchhatho griham
Kasya dhvasra bhavathah kasya va nara rajaputreva savanava gachchhathah

40.4

यु॒वां मृ॒गेव॑ वार॒णा मृ॑ग॒ण्यवो॑ दो॒षा वस्तो॑र्ह॒विषा॒ नि ह्व॑यामहे ।
यु॒वं होत्रा॑मृतु॒था जुह्व॑ते न॒रेषं॒ जना॑य वहथः शुभस्पती ॥४॥

Yuvam mrigeva varana mriganyavo dosha vastorhavisha ni hvayamahe
Yuvam hotramritutha juhvate naresham janaya vahathah shubhaspati

40.5

यु॒वां ह॒ घोषा॒ पर्य॑श्विना य॒ती राज्ञ॑ ऊचे दुहि॒ता पृ॒च्छे वां॑ नरा ।
भू॒तं मे॒ अह्न॑ उ॒त भू॑तम॒क्तवेऽश्वा॑वते र॒थिने॑ शक्त॒मर्व॑ते ॥५॥

Yuvam ha ghosha paryashvina yati ragya uche duhita prichchhe vam nara
Bhutam me ahna uta bhutamaktaveshvavate rathine shaktamarvate

40.6

यु॒वं क॒वी ष्ठ॒ः पर्य॑श्विना॒ रथं॒ विशो॒ न कुत्सो॑ जरि॒तुर्न॑शायथः ।
यु॒वोर्ह॒ मक्षा॒ पर्य॑श्विना॒ मध्वा॒सा भ॑रत निष्कृ॒तं न योष॑णा ॥६॥

Yuvam kavi shthah paryashvina ratham visho na kutso jariturnashayathah
Yuvorha maksha paryashvina madhvasa bharata nishkritam na yoshana

40.7

यु॒वं ह॑ भु॒ज्युं यु॒वम॑श्विना॒ वशं॑ यु॒वं शि॒ञ्जार॑मु॒शना॒मुपा॑रथुः ।
यु॒वो ररा॑वा॒ परि॑ स॒ख्यमा॑सते यु॒वोर॒हमव॑सा सु॒म्नमा च॑के ॥७॥

Yuvam ha bhujyum yuvamashvina vasham yuvam shinjaramushanamuparathuh
Yuvo rarava pari sakhyamasate yuvorahamavasa sumnama chake

40.8

यु॒वं ह॑ कृ॒शं यु॒वम॑श्विना श॒युं यु॒वं वि॒धन्तं॑ वि॒धवा॑मुरुष्यथः ।
यु॒वं स॒निभ्य॑ः स्त॒नय॑न्तमश्वि॒नाऽप॑ व्र॒जमू॑र्णुथः स॒प्तास्य॑म् ॥८॥

Yuvam ha krisham yuvamashvina shayum yuvam vidhantam vidhavamurushyathah
Yuvam sanibhyah stanayantamashvinapa vrajamurnuthah saptasyam

40.9

जनि॑ष्ट॒ योषा॑ प॒तय॑त्कनीन॒को वि चारु॑हन्वी॒रुधो॑ दं॒सना॒ अनु॑ ।
आस्मै॑ रीयन्ते निव॒नेव॒ सिन्ध॑वो॒ऽस्मा अह्ने॑ भवति॒ तत्प॑तित्व॒नम् ॥९॥

Janishta yosha patayatkaninako vi charuhanvirudho dansana anu
Asmai riyante nivaneva sindhavosma ahne bhavati tatpatitvanam

40.10

जी॒वं रु॑दन्ति॒ वि म॑यन्ते अध्व॒रे दी॒र्घामनु॒ प्रसि॑तिं दीधियु॒र्नर॑ः ।
वा॒मं पि॒तृभ्यो॒ य इ॒दं स॑मेरि॒रे मय॒ः पति॑भ्यो॒ जन॑यः परि॒ष्वजे॑ ॥१०॥

Jivam rudanti vi mayante adhvare dirghamanu prasitim didhiyurnarah
Vamam pitribhyo ya idam samerire mayah patibhyo janayah parishvaje

40.11

न तस्य॑ विद्म॒ तदु॒ षु प्र वो॑चत॒ युवा॑ ह॒ यद्यु॑व॒त्याः क्षेति॒ योनि॑षु ।
प्रि॒योस्रि॑यस्य वृष॒भस्य॑ रे॒तिनो॑ गृ॒हं ग॑मेमाश्विना॒ तदु॑श्मसि ॥११॥

Na tasya vidma tadu shu pra vochata yuva ha yadyuvatyah ksheti yonishu
Priyosriyasya vrishabhasya retino griham gamemashvina tadushmasi

40.12

आ वा॑मगन्त्सुम॒तिर्वा॑जिनीवसू॒ न्य॑श्विना हृ॒त्सु कामा॑ अयंसत ।
अभू॑तं गो॒पा मि॑थु॒ना शु॑भस्पती प्रि॒या अ॑र्य॒म्णो दुर्याँ॑ अशीमहि ॥१२॥

A vamagantsumatirvajinivasu nyashvina hritsu kama ayansata
Abhutam gopa mithuna shubhaspati priya aryamno duryam ashimahi

40.13

ता म॑न्दसा॒ना मनु॑षो दुरो॒ण आ ध॒त्तं र॒यिं स॒हवी॑रं वच॒स्यवे॑ ।
कृ॒तं ती॒र्थं सु॑प्रपा॒णं शु॑भस्पती स्था॒णुं प॑थे॒ष्ठामप॑ दुर्म॒तिं ह॑तम् ॥१३॥

Ta mandasana manusho durona a dhattam rayim sahaviram vachasyave
Kritam tirtham suprapanam shubhaspati sthanum patheshthamapa durmatim hatam

40.14

क्व॑ स्विद॒द्य क॑त॒मास्व॒श्विना॑ वि॒क्षु द॒स्रा मा॑दयेते शु॒भस्पती॑ ।
क ईं॒ नि ये॑मे कत॒मस्य॑ जग्मतु॒र्विप्र॑स्य वा॒ यज॑मानस्य वा गृ॒हम् ॥१४॥

Kva svidadya katamasvashvina vikshu dasra madayete shubhaspati
Ka im ni yeme katamasya jagmaturviprasya va yajamanasya va griham