সূক্ত 37

37.1

১২ সৌর্যোঽভিতপাঃ। সূর্যঃ। জগতী, ১০ ত্রিষ্টুপ্।

নমো মিত্রস্য বরুণস্য চক্ষসে মহো দেবায় তদৃতং সপর্যত ।
দূরেদৃশে দেবজাতায় কেতবে দিবস্পুত্রায় সূর্যায় শংসত ॥১॥

37.2

সা মা সত্যোক্তিঃ পরি পাতু বিশ্বতো দ্যাবা চ যত্র ততনন্নহানি চ ।
বিশ্বমন্যন্নি বিশতে যদেজতি বিশ্বাহাপো বিশ্বাহোদেতি সূর্যঃ ॥২॥

37.3

ন তে অদেবঃ প্রদিবো নি বাসতে যদেতশেভিঃ পতরৈ রথর্যসি ।
প্রাচীনমন্যদনু বর্ততে রজ উদন্যেন জ্যোতিষা যাসি সূর্য ॥৩॥

37.4

যেন সূর্য জ্যোতিষা বাধসে তমো জগচ্চ বিশ্বমুদিয়র্ষি ভানুনা ।
তেনাস্মদ্বিশ্বামনিরামনাহুতিমপামীবামপ দুষ্ষ্বপ্ন্যং সুব ॥৪॥

37.5

বিশ্বস্য হি প্রেষিতো রক্ষসি ব্রতমহেলয়ন্নুচ্চরসি স্বধা অনু ।
যদদ্য ত্বা সূর্যোপব্রবামহৈ তং নো দেবা অনু মংসীরত ক্রতুম্ ॥৫॥

37.6

তং নো দ্যাবাপৃথিবী তন্ন আপ ইন্দ্রঃ শৃণ্বন্তু মরুতো হবং বচঃ ।
মা শূনে ভূম সূর্যস্য সংদৃশি ভদ্রং জীবন্তো জরণামশীমহি ॥৬॥

37.7

বিশ্বাহা ত্বা সুমনসঃ সুচক্ষসঃ প্রজাবন্তো অনমীবা অনাগসঃ ।
উদ্যন্তং ত্বা মিত্রমহো দিবেদিবে জ্যোগ্জীবাঃ প্রতি পশ্যেম সূর্য ॥৭॥

37.8

মহি জ্যোতির্বিভ্রতং ত্বা বিচক্ষণ ভাস্বন্তং চক্ষুষেচক্ষুষে ময়ঃ ।
আরোহন্তং বৃহতঃ পাজসস্পরি বয়ং জীবাঃ প্রতি পশ্যেম সূর্য ॥৮॥

37.9

যস্য তে বিশ্বা ভুবনানি কেতুনা প্র চেরতে নি চ বিশন্তে অক্তুভিঃ ।
অনাগাস্ত্বেন হরিকেশ সূর্যাঽহ্নাহ্না নো বস্যসাবস্যসোদিহি ॥৯॥

37.10

শং নো ভব চক্ষসা শং নো অহ্না শং ভানুনা শং হিমা শং ঘৃণেন ।
যথা শমধ্বঞ্ছমসদ্দুরোণে তত্সূর্য দ্রবিণং ধেহি চিত্রম্ ॥১০॥

37.11

অস্মাকং দেবা উভয়ায় জন্মনে শর্ম যচ্ছত দ্বিপদে চতুষ্পদে ।
অদত্পিবদূর্জয়মানমাশিতং তদস্মে শং যোররপো দধাতন ॥১১॥

37.12

যদ্বো দেবাশ্চকৃম জিহ্বয়া গুরু মনসো বা প্রয়ুতী দেবহেলনম্ ।
অরাবা যো নো অভি দুচ্ছুনায়তে তস্মিন্তদেনো বসবো নি ধেতন ॥১২॥