Sukta 37

37.1

12 sauryobhitapah, suryah, jagati, 10 trishtup

नमो॑ मि॒त्रस्य॒ वरु॑णस्य॒ चक्ष॑से म॒हो दे॒वाय॒ तदृ॒तं स॑पर्यत ।
दू॒रे॒दृशे॑ दे॒वजा॑ताय के॒तवे॑ दि॒वस्पु॒त्राय॒ सूर्या॑य शंसत ॥१॥

Namo mitrasya varunasya chakshase maho devaya tadritam saparyata
Duredrishe devajataya ketave divasputraya suryaya shansata

सा मा॑ स॒त्योक्ति॒ः परि॑ पातु वि॒श्वतो॒ द्यावा॑ च॒ यत्र॑ त॒तन॒न्नहा॑नि च ।
विश्व॑म॒न्यन्नि वि॑शते॒ यदेज॑ति वि॒श्वाहापो॑ वि॒श्वाहोदे॑ति॒ सूर्य॑ः ॥२॥

Sa ma satyoktih pari patu vishvato dyava cha yatra tatanannahani cha
Vishvamanyanni vishate yadejati vishvahapo vishvahodeti suryah

न ते॒ अदे॑वः प्र॒दिवो॒ नि वा॑सते॒ यदे॑त॒शेभि॑ः पत॒रै र॑थ॒र्यसि॑ ।
प्रा॒चीन॑म॒न्यदनु॑ वर्तते॒ रज॒ उद॒न्येन॒ ज्योति॑षा यासि सूर्य ॥३॥

Na te adevah pradivo ni vasate yadetashebhih patarai ratharyasi
Prachinamanyadanu vartate raja udanyena jyotisha yasi surya

येन॑ सूर्य॒ ज्योति॑षा॒ बाध॑से॒ तमो॒ जग॑च्च॒ विश्व॑मुदि॒यर्षि॑ भा॒नुना॑ ।
तेना॒स्मद्विश्वा॒मनि॑रा॒मना॑हुति॒मपामी॑वा॒मप॑ दु॒ष्ष्वप्न्यं॑ सुव ॥४॥

Yena surya jyotisha badhase tamo jagachcha vishvamudiyarshi bhanuna
Tenasmadvishvamaniramanahutimapamivamapa dushshvapnyam suva

विश्व॑स्य॒ हि प्रेषि॑तो॒ रक्ष॑सि व्र॒तमहे॑ळयन्नु॒च्चर॑सि स्व॒धा अनु॑ ।
यद॒द्य त्वा॑ सूर्योप॒ब्रवा॑महै॒ तं नो॑ दे॒वा अनु॑ मंसीरत॒ क्रतु॑म् ॥५॥

Vishvasya hi preshito rakshasi vratamahelayannuchcharasi svadha anu
Yadadya tva suryopabravamahai tam no deva anu mansirata kratum

तं नो॒ द्यावा॑पृथि॒वी तन्न॒ आप॒ इन्द्र॑ः शृण्वन्तु म॒रुतो॒ हवं॒ वच॑ः ।
मा शूने॑ भूम॒ सूर्य॑स्य सं॒दृशि॑ भ॒द्रं जीव॑न्तो जर॒णाम॑शीमहि ॥६॥

Tam no dyavaprithivi tanna apa indrah shrinvantu maruto havam vachah
Ma shune bhuma suryasya sandrishi bhadram jivanto jaranamashimahi

वि॒श्वाहा॑ त्वा सु॒मन॑सः सु॒चक्ष॑सः प्र॒जाव॑न्तो अनमी॒वा अना॑गसः ।
उ॒द्यन्तं॑ त्वा मित्रमहो दि॒वेदि॑वे॒ ज्योग्जी॒वाः प्रति॑ पश्येम सूर्य ॥७॥

Vishvaha tva sumanasah suchakshasah prajavanto anamiva anagasah
Udyantam tva mitramaho divedive jyogjivah prati pashyema surya

महि॒ ज्योति॒र्बिभ्र॑तं त्वा विचक्षण॒ भास्व॑न्तं॒ चक्षु॑षेचक्षुषे॒ मय॑ः ।
आ॒रोह॑न्तं बृह॒तः पाज॑स॒स्परि॑ व॒यं जी॒वाः प्रति॑ पश्येम सूर्य ॥८॥

Mahi jyotirbibhratam tva vichakshana bhasvantam chakshushechakshushe mayah
Arohantam brihatah pajasaspari vayam jivah prati pashyema surya

यस्य॑ ते॒ विश्वा॒ भुव॑नानि के॒तुना॒ प्र चेर॑ते॒ नि च॑ वि॒शन्ते॑ अ॒क्तुभि॑ः ।
अ॒ना॒गा॒स्त्वेन॑ हरिकेश सू॒र्याऽह्ना॑ह्ना नो॒ वस्य॑सावस्य॒सोदि॑हि ॥९॥

Yasya te vishva bhuvanani ketuna pra cherate ni cha vishante aktubhih
Anagastvena harikesha suryahnahna no vasyasavasyasodihi

शं नो॑ भव॒ चक्ष॑सा॒ शं नो॒ अह्ना॒ शं भा॒नुना॒ शं हि॒मा शं घृ॒णेन॑ ।
यथा॒ शमध्व॒ञ्छमस॑द्दुरो॒णे तत्सू॑र्य॒ द्रवि॑णं धेहि चि॒त्रम् ॥१०॥

Sham no bhava chakshasa sham no ahna sham bhanuna sham hima sham ghrinena
Yatha shamadhvanchhamasaddurone tatsurya dravinam dhehi chitram

अ॒स्माकं॑ देवा उ॒भया॑य॒ जन्म॑ने॒ शर्म॑ यच्छत द्वि॒पदे॒ चतु॑ष्पदे ।
अ॒दत्पिब॑दू॒र्जय॑मान॒माशि॑तं॒ तद॒स्मे शं योर॑र॒पो द॑धातन ॥११॥

Asmakam deva ubhayaya janmane sharma yachchhata dvipade chatushpade
Adatpibadurjayamanamashitam tadasme sham yorarapo dadhatana

यद्वो॑ देवाश्चकृ॒म जि॒ह्वया॑ गु॒रु मन॑सो वा॒ प्रयु॑ती देव॒हेळ॑नम् ।
अरा॑वा॒ यो नो॑ अ॒भि दु॑च्छुना॒यते॒ तस्मि॒न्तदेनो॑ वसवो॒ नि धे॑तन ॥१२॥

Yadvo devashchakrima jihvaya guru manaso va prayuti devahelanam
Arava yo no abhi duchchhunayate tasmintadeno vasavo ni dhetana