Sukta 36

36.1

14 lusho dhanakah, vishvedevah, jagati, 13-14 trishtup

उ॒षासा॒नक्ता॑ बृह॒ती सु॒पेश॑सा॒ द्यावा॒क्षामा॒ वरु॑णो मि॒त्रो अ॑र्य॒मा ।
इन्द्रं॑ हुवे म॒रुत॒ः पर्व॑ताँ अ॒प आ॑दि॒त्यान्द्यावा॑पृथि॒वी अ॒पः स्व॑ः ॥१॥

Ushasanakta brihati supeshasa dyavakshama varuno mitro aryama
Indram huve marutah parvatam apa adityandyavaprithivi apah svah

36.2

द्यौश्च॑ नः पृथि॒वी च॒ प्रचे॑तस ऋ॒ताव॑री रक्षता॒मंह॑सो रि॒षः ।
मा दु॑र्वि॒दत्रा॒ निॠ॑तिर्न ईशत॒ तद्दे॒वाना॒मवो॑ अ॒द्या वृ॑णीमहे ॥२॥

Dyaushcha nah prithivi cha prachetasa ritavari rakshatamanhaso rishah
Ma durvidatra niritirna ishata taddevanamavo adya vrinimahe

36.3

विश्व॑स्मान्नो॒ अदि॑तिः पा॒त्वंह॑सो मा॒ता मि॒त्रस्य॒ वरु॑णस्य रे॒वत॑ः ।
स्व॑र्व॒ज्ज्योति॑रवृ॒कं न॑शीमहि॒ तद्दे॒वाना॒मवो॑ अ॒द्या वृ॑णीमहे ॥३॥

Vishvasmanno aditih patvanhaso mata mitrasya varunasya revatah
Svarvajjyotiravrikam nashimahi taddevanamavo adya vrinimahe

36.4

ग्रावा॒ वद॒न्नप॒ रक्षां॑सि सेधतु दु॒ष्ष्वप्न्यं॒ निॠ॑तिं॒ विश्व॑म॒त्रिण॑म् ।
आ॒दि॒त्यं शर्म॑ म॒रुता॑मशीमहि॒ तद्दे॒वाना॒मवो॑ अ॒द्या वृ॑णीमहे ॥४॥

Grava vadannapa rakshansi sedhatu dushshvapnyam niritim vishvamatrinam
Adityam sharma marutamashimahi taddevanamavo adya vrinimahe

36.5

एन्द्रो॑ ब॒र्हिः सीद॑तु॒ पिन्व॑ता॒मिळा॒ बृह॒स्पति॒ः साम॑भिॠ॒क्वो अ॑र्चतु ।
सु॒प्र॒के॒तं जी॒वसे॒ मन्म॑ धीमहि॒ तद्दे॒वाना॒मवो॑ अ॒द्या वृ॑णीमहे ॥५॥

Endro barhih sidatu pinvatamila brihaspatih samabhirikvo archatu
Supraketam jivase manma dhimahi taddevanamavo adya vrinimahe

36.6

दि॒वि॒स्पृशं॑ य॒ज्ञम॒स्माक॑मश्विना जी॒राध्व॑रं कृणुतं सु॒म्नमि॒ष्टये॑ ।
प्रा॒चीन॑रश्मि॒माहु॑तं घृ॒तेन॒ तद्दे॒वाना॒मवो॑ अ॒द्या वृ॑णीमहे ॥६॥

Divisprisham yagyamasmakamashvina jiradhvaram krinutam sumnamishtaye
Prachinarashmimahutam ghritena taddevanamavo adya vrinimahe

36.7

उप॑ ह्वये सु॒हवं॒ मारु॑तं ग॒णं पा॑व॒कमृ॒ष्वं स॒ख्याय॑ श॒म्भुव॑म् ।
रा॒यस्पोषं॑ सौश्रव॒साय॑ धीमहि॒ तद्दे॒वाना॒मवो॑ अ॒द्या वृ॑णीमहे ॥७॥

Upa hvaye suhavam marutam ganam pavakamrishvam sakhyaya shambhuvam
Rayasposham saushravasaya dhimahi taddevanamavo adya vrinimahe

36.8

अ॒पां पेरुं॑ जी॒वध॑न्यं भरामहे देवा॒व्यं॑ सु॒हव॑मध्वर॒श्रिय॑म् ।
सु॒र॒श्मिं सोम॑मिन्द्रि॒यं य॑मीमहि॒ तद्दे॒वाना॒मवो॑ अ॒द्या वृ॑णीमहे ॥८॥

Apam perum jivadhanyam bharamahe devavyam suhavamadhvarashriyam
Surashmim somamindriyam yamimahi taddevanamavo adya vrinimahe

36.9

स॒नेम॒ तत्सु॑स॒निता॑ स॒नित्व॑भिर्व॒यं जी॒वा जी॒वपु॑त्रा॒ अना॑गसः ।
ब्र॒ह्म॒द्विषो॒ विष्व॒गेनो॑ भरेरत॒ तद्दे॒वाना॒मवो॑ अ॒द्या वृ॑णीमहे ॥९॥

Sanema tatsusanita sanitvabhirvayam jiva jivaputra anagasah
Brahmadvisho vishvageno bharerata taddevanamavo adya vrinimahe

36.10

ये स्था मनो॑र्य॒ज्ञिया॒स्ते शृ॑णोतन॒ यद्वो॑ देवा॒ ईम॑हे॒ तद्द॑दातन ।
जैत्रं॒ क्रतुं॑ रयि॒मद्वी॒रव॒द्यश॒स्तद्दे॒वाना॒मवो॑ अ॒द्या वृ॑णीमहे ॥१०॥

Ye stha manoryagyiyaste shrinotana yadvo deva imahe taddadatana
Jaitram kratum rayimadviravadyashastaddevanamavo adya vrinimahe

36.11

म॒हद॒द्य म॑ह॒तामा वृ॑णीम॒हेऽवो॑ दे॒वानां॑ बृह॒ताम॑न॒र्वणा॑म् ।
यथा॒ वसु॑ वी॒रजा॑तं॒ नशा॑महै॒ तद्दे॒वाना॒मवो॑ अ॒द्या वृ॑णीमहे ॥११॥

Mahadadya mahatama vrinimahevo devanam brihatamanarvanam
Yatha vasu virajatam nashamahai taddevanamavo adya vrinimahe

36.12

म॒हो अ॒ग्नेः स॑मिधा॒नस्य॒ शर्म॒ण्यना॑गा मि॒त्रे वरु॑णे स्व॒स्तये॑ ।
श्रेष्ठे॑ स्याम सवि॒तुः सवी॑मनि॒ तद्दे॒वाना॒मवो॑ अ॒द्या वृ॑णीमहे ॥१२॥

Maho agneh samidhanasya sharmanyanaga mitre varune svastaye
Shreshthe syama savituh savimani taddevanamavo adya vrinimahe

36.13

ये स॑वि॒तुः स॒त्यस॑वस्य॒ विश्वे॑ मि॒त्रस्य॑ व्र॒ते वरु॑णस्य दे॒वाः ।
ते सौभ॑गं वी॒रव॒द्गोम॒दप्नो॒ दधा॑तन॒ द्रवि॑णं चि॒त्रम॒स्मे ॥१३॥

Ye savituh satyasavasya vishve mitrasya vrate varunasya devah
Te saubhagam viravadgomadapno dadhatana dravinam chitramasme

36.14

स॒वि॒ता प॒श्चाता॑त्सवि॒ता पु॒रस्ता॑त्सवि॒तोत्त॒रात्ता॑त्सवि॒ताध॒रात्ता॑त् ।
स॒वि॒ता न॑ः सुवतु स॒र्वता॑तिं सवि॒ता नो॑ रासतां दी॒र्घमायु॑ः ॥१४॥

Savita pashchatatsavita purastatsavitottarattatsavitadharattat
Savita nah suvatu sarvatatim savita no rasatam dirghamayuh