Sukta 38

38.1

5 mushkavanindrah, indrah, jagati

अ॒स्मिन्न॑ इन्द्र पृत्सु॒तौ यश॑स्वति॒ शिमी॑वति॒ क्रन्द॑सि॒ प्राव॑ सा॒तये॑ ।
यत्र॒ गोषा॑ता धृषि॒तेषु॑ खा॒दिषु॒ विष्व॒क्पत॑न्ति दि॒द्यवो॑ नृ॒षाह्ये॑ ॥१॥

Asminna indra pritsutau yashasvati shimivati krandasi prava sataye
Yatra goshata dhrishiteshu khadishu vishvakpatanti didyavo nrishahye

38.2

स न॑ः क्षु॒मन्तं॒ सद॑ने॒ व्यू॑र्णुहि॒ गोअ॑र्णसं र॒यिमि॑न्द्र श्र॒वाय्य॑म् ।
स्याम॑ ते॒ जय॑तः शक्र मे॒दिनो॒ यथा॑ व॒यमु॒श्मसि॒ तद्व॑सो कृधि ॥२॥

Sa nah kshumantam sadane vyurnuhi goarnasam rayimindra shravayyam
Syama te jayatah shakra medino yatha vayamushmasi tadvaso kridhi

38.3

यो नो॒ दास॒ आर्यो॑ वा पुरुष्टु॒ताऽदे॑व इन्द्र यु॒धये॒ चिके॑तति ।
अ॒स्माभि॑ष्टे सु॒षहा॑ः सन्तु॒ शत्र॑व॒स्त्वया॑ व॒यं तान्व॑नुयाम संग॒मे ॥३॥

Yo no dasa aryo va purushtutadeva indra yudhaye chiketati
Asmabhishte sushahah santu shatravastvaya vayam tanvanuyama sangame

38.4

यो द॒भ्रेभि॒र्हव्यो॒ यश्च॒ भूरि॑भि॒र्यो अ॒भीके॑ वरिवो॒विन्नृ॒षाह्ये॑ ।
तं वि॑खा॒दे सस्नि॑म॒द्य श्रु॒तं नर॑म॒र्वाञ्च॒मिन्द्र॒मव॑से करामहे ॥४॥

Yo dabhrebhirhavyo yashcha bhuribhiryo abhike varivovinnrishahye
Tam vikhade sasnimadya shrutam naramarvanchamindramavase karamahe

38.5

स्व॒वृजं॒ हि त्वाम॒हमि॑न्द्र शु॒श्रवा॑नानु॒दं वृ॑षभ रध्र॒चोद॑नम् ।
प्र मु॑ञ्चस्व॒ परि॒ कुत्सा॑दि॒हा ग॑हि॒ किमु॒ त्वावा॑न्मु॒ष्कयो॑र्ब॒द्ध आ॑सते ॥५॥

Svavrijam hi tvamahamindra shushravananudam vrishabha radhrachodanam
Pra munchasva pari kutsadiha gahi kimu tvavanmushkayorbaddha asate