সূক্ত 32

32.1

৯ কবষ ঐলূষঃ। ইন্দ্রঃ। জগতী, ৬-৯ ত্রিষ্টুপ্ ।

প্র সু গ্মন্তা ধিয়সানস্য সক্ষণি বরেভির্বরাঁ অভি ষু প্রসীদতঃ ।
অস্মাকমিন্দ্র উভয়ং জুজোষতি যত্সোম্যস্যান্ধসো বুবোধতি ॥১॥

32.2

বীন্দ্র যাসি দিব্যানি রোচনা বি পার্থিবানি রজসা পুরুষ্টুত ।
যে ত্বা বহন্তি মুহুরধ্বরাঁ উপ তে সু বন্বন্তু বগ্বনাঁ অরাধসঃ ॥২॥

32.3

তদিন্মে ছন্ত্সদ্বপুষো বপুষ্টরং পুত্রো যজ্জানং পিত্রোরধীয়তি ।
জায়া পতিং বহতি বগ্নুনা সুমত্পুংস ইদ্ভদ্রো বহতুঃ পরিষ্কৃতঃ ॥৩॥

32.4

তদিত্সধস্থমভি চারু দীধয় গাবো যচ্ছাসন্বহতুং ন ধেনবঃ ।
মাতা যন্মন্তুর্যূথস্য পূর্ব্যাঽভি বাণস্য সপ্তধাতুরিজ্জনঃ ॥৪॥

32.5

প্র বোঽচ্ছা রিরিচে দেবয়ুষ্পদমেকো রুদ্রেভির্যাতি তুর্বণিঃ ।
জরা বা যেষ্বমৃতেষু দাবনে পরি ব ঊমেভ্যঃ সিঞ্চতা মধু ॥৫॥

32.6

নিধীয়মানমপগূল্হমপ্সু প্র মে দেবানাং ব্রতপা উবাচ ।
ইন্দ্রো বিদ্বাঁ অনু হি ত্বা চচক্ষ তেনাহমগ্নে অনুশিষ্ট আগাম্ ॥৬॥

32.7

অক্ষেত্রবিত্ক্ষেত্রবিদং হ্যপ্রাট্ স প্রৈতি ক্ষেত্রবিদানুশিষ্টঃ ।
এতদ্বৈ ভদ্রমনুশাসনস্যোত স্রুতিং বিন্দত্যঞ্জসীনাম্ ॥৭॥

32.8

অদ্যেদু প্রাণীদমমন্নিমাহাঽপীবৃতো অধয়ন্মাতুরূধঃ ।
এমেনমাপ জরিমা যুবানমহেলন্বসুঃ সুমনা বভূব ॥৮॥

32.9

এতানি ভদ্রা কলশ ক্রিয়াম কুরুশ্রবণ দদতো মঘানি ।
দান ইদ্বো মঘবানঃ সো অস্ত্বয়ং চ সোমো হৃদি যং বিভর্মি ॥৯॥