Sukta 32

32.1

9 kavasha ailushah, indrah, jagati, 6-9 trishtup

प्र सु ग्मन्ता॑ धियसा॒नस्य॑ स॒क्षणि॑ व॒रेभि॑र्व॒राँ अ॒भि षु प्र॒सीद॑तः ।
अ॒स्माक॒मिन्द्र॑ उ॒भयं॑ जुजोषति॒ यत्सो॒म्यस्यान्ध॑सो॒ बुबो॑धति ॥१॥

Pra su gmanta dhiyasanasya sakshani varebhirvaram abhi shu prasidatah
Asmakamindra ubhayam jujoshati yatsomyasyandhaso bubodhati

32.2

वी॑न्द्र यासि दि॒व्यानि॑ रोच॒ना वि पार्थि॑वानि॒ रज॑सा पुरुष्टुत ।
ये त्वा॒ वह॑न्ति॒ मुहु॑रध्व॒राँ उप॒ ते सु व॑न्वन्तु वग्व॒नाँ अ॑रा॒धस॑ः ॥२॥

Vindra yasi divyani rochana vi parthivani rajasa purushtuta
Ye tva vahanti muhuradhvaram upa te su vanvantu vagvanam aradhasah

32.3

तदिन्मे॑ छन्त्स॒द्वपु॑षो॒ वपु॑ष्टरं पु॒त्रो यज्जानं॑ पि॒त्रोर॒धीय॑ति ।
जा॒या पतिं॑ वहति व॒ग्नुना॑ सु॒मत्पुं॒स इद्भ॒द्रो व॑ह॒तुः परि॑ष्कृतः ॥३॥

Tadinme chhantsadvapusho vapushtaram putro yajjanam pitroradhiyati
Jaya patim vahati vagnuna sumatpunsa idbhadro vahatuh parishkritah

32.4

तदित्स॒धस्थ॑म॒भि चारु॑ दीधय॒ गावो॒ यच्छास॑न्वह॒तुं न धे॒नव॑ः ।
मा॒ता यन्मन्तु॑र्यू॒थस्य॑ पू॒र्व्याऽभि वा॒णस्य॑ स॒प्तधा॑तु॒रिज्जन॑ः ॥४॥

Taditsadhasthamabhi charu didhaya gavo yachchhasanvahatum na dhenavah
Mata yanmanturyuthasya purvyabhi vanasya saptadhaturijjanah

32.5

प्र वोऽच्छा॑ रिरिचे देव॒युष्प॒दमेको॑ रु॒द्रेभि॑र्याति तु॒र्वणि॑ः ।
ज॒रा वा॒ येष्व॒मृते॑षु दा॒वने॒ परि॑ व॒ ऊमे॑भ्यः सिञ्चता॒ मधु॑ ॥५॥

Pra vochchha ririche devayushpadameko rudrebhiryati turvanih
Jara va yeshvamriteshu davane pari va umebhyah sinchata madhu

32.6

नि॒धी॒यमा॑न॒मप॑गूळ्हम॒प्सु प्र मे॑ दे॒वानां॑ व्रत॒पा उ॑वाच ।
इन्द्रो॑ वि॒द्वाँ अनु॒ हि त्वा॑ च॒चक्ष॒ तेना॒हम॑ग्ने॒ अनु॑शिष्ट॒ आगा॑म् ॥६॥

Nidhiyamanamapagulhamapsu pra me devanam vratapa uvacha
Indro vidvam anu hi tva chachaksha tenahamagne anushishta agam

32.7

अक्षे॑त्रवित्क्षेत्र॒विदं॒ ह्यप्रा॒ट् स प्रैति॑ क्षेत्र॒विदानु॑शिष्टः ।
ए॒तद्वै भ॒द्रम॑नु॒शास॑नस्यो॒त स्रु॒तिं वि॑न्दत्यञ्ज॒सीना॑म् ॥७॥

Akshetravitkshetravidam hyaprat sa praiti kshetravidanushishtah
Etadvai bhadramanushasanasyota srutim vindatyanjasinam

32.8

अ॒द्येदु॒ प्राणी॒दम॑मन्नि॒माहाऽपी॑वृतो अधयन्मा॒तुरूध॑ः ।
एमे॑नमाप जरि॒मा युवा॑न॒महे॑ळ॒न्वसु॑ः सु॒मना॑ बभूव ॥८॥

Adyedu pranidamamannimahapivrito adhayanmaturudhah
Emenamapa jarima yuvanamahelanvasuh sumana babhuva

32.9

ए॒तानि॑ भ॒द्रा क॑लश क्रियाम॒ कुरु॑श्रवण॒ दद॑तो म॒घानि॑ ।
दा॒न इद्वो॑ मघवान॒ः सो अ॑स्त्व॒यं च॒ सोमो॑ हृ॒दि यं बिभ॑र्मि ॥९॥

Etani bhadra kalasha kriyama kurushravana dadato maghani
Dana idvo maghavanah so astvayam cha somo hridi yam bibharmi