সূক্ত 31

31.1

১১ কবষ ঐলূষঃ।বিশ্বে দেবাঃ। ত্রিষ্টুপ্।

আ নো দেবানামুপ বেতু শংসো বিশ্বেভিস্তুরৈরবসে যজত্রঃ ।
তেভির্বয়ং সুষখায়ো ভবেম তরন্তো বিশ্বা দুরিতা স্যাম ॥১॥

31.2

পরি চিন্মর্তো দ্রবিণং মমন্যাদৃতস্য পথা নমসা বিবাসেৎ ।
উত স্বেন ক্রতুনা সং বদেত শ্রেয়াংসং দক্ষং মনসা জগৃভ্যাৎ ॥২॥

31.3

অধায়ি ধীতিরসসৃগ্রমংশাস্তীর্থে ন দস্মমুপ যন্ত্যূমাঃ ।
অভ্যানশ্ম সুবিতস্য শূষং নবেদসো অমৃতানামভূম ॥৩॥

31.4

নিত্যশ্চাকন্যাত্স্বপতির্দমূনা যস্মা উ দেবঃ সবিতা জজান ।
ভগো বা গোভিরর্যমেমনজ্যাত্সো অস্মৈ চারুশ্ছদয়দুত স্যাৎ ॥৪॥

31.5

ইয়ং সা ভূয়া উষসামিব ক্ষা যদ্ধ ক্ষুমন্তঃ শবসা সমায়ন্ ।
অস্য স্তুতিং জরিতুর্ভিক্ষমাণা আ নঃ শগ্মাস উপ যন্তু বাজাঃ ॥৫॥

31.6

অস্যেদেষা সুমতিঃ পপ্রথানাঽভবত্পূর্ব্যা ভূমনা গৌঃ ।
অস্য সনীলা অসুরস্য যোনৌ সমান আ ভরণে বিভ্রমাণাঃ ॥৬॥

31.7

কিং স্বিদ্বনং ক উ স বৃক্ষ আস যতো দ্যাবাপৃথিবী নিষ্টতক্ষুঃ ।
সংতস্থানে অজরে ইতঊতী অহানি পূর্বীরুষসো জরন্ত ॥৭॥

31.8

নৈতাবদেনা পরো অন্যদস্ত্যুক্ষা স দ্যাবাপৃথিবী বিভর্তি ।
ত্বচং পবিত্রং কৃণুত স্বধাবান্যদীং সূর্যং ন হরিতো বহন্তি ॥৮॥

31.9

স্তেগো ন ক্ষামত্যেতি পৃথ্বীং মিহং ন বাতো বি হ বাতি ভূম ।
মিত্রো যত্র বরুণো অজ্যমানোঽগ্নির্বনে ন ব্যসৃষ্ট শোকম্ ॥৯॥

31.10

স্তরীর্যত্সূত সদ্যো অজ্যমানা ব্যথিরব্যথীঃ কৃণুত স্বগোপা ।
পুত্রো যত্পূর্বঃ পিত্রোর্জনিষ্ট শম্যাং গৌর্জগার যদ্ধ পৃচ্ছান্ ॥১০॥

31.11

উত কণ্বং নৃষদঃ পুত্রমাহুরুত শ্যাবো ধনমাদত্ত বাজী ।
প্র কৃষ্ণায় রুশদপিন্বতোধৠতমত্র নকিরস্মা অপীপেৎ ॥১১॥