সূক্ত 27

27.1

২৪ ঐন্দ্রো বসুক্রঃ। ইন্দ্রঃ।ত্রিষ্টুপ্।

অসত্সু মে জরিতঃ সাভিবেগো যত্সুন্বতে যজমানায় শিক্ষম্ ।
অনাশীর্দামহমস্মি প্রহন্তা সত্যধ্বৃতং বৃজিনায়ন্তমাভুম্ ॥১॥

27.2

যদীদহং যুধয়ে সংনয়ান্যদেবয়ূন্তন্বা৩ শূশুজানান্ ।
অমা তে তুম্রং বৃষভং পচানি তীব্রং সুতং পঞ্চদশং নি ষিঞ্চম্ ॥২॥

27.3

নাহং তং বেদ য ইতি ব্রবীত্যদেবয়ূন্ত্সমরণে জঘন্বান্ ।
যদাবাখ্যত্সমরণমৃঘাবদাদিদ্ধ মে বৃষভা প্র ব্রুবন্তি ॥৩॥

27.4

যদজ্ঞাতেষু বৃজনেষ্বাসং বিশ্বে সতো মঘবানো ম আসন্ ।
জিনামি বেত্ক্ষেম আ সন্তমাভুং প্র তং ক্ষিণাং পর্বতে পাদগৃহ্য ॥৪॥

27.5

ন বা উ মাং বৃজনে বারয়ন্তে ন পর্বতাসো যদহং মনস্যে ।
মম স্বনাত্কৃধুকর্ণো ভয়াত এবেদনু দ্যূন্কিরণঃ সমেজাৎ ॥৫॥

27.6

দর্শন্ন্বত্র শৃতপাঁ অনিন্দ্রান্বাহুক্ষদঃ শরবে পত্যমানান্ ।
ঘৃষুং বা যে নিনিদুঃ সখায়মধ্যূ ন্বেষু পবয়ো ববৃত্যুঃ ॥৬॥

27.7

অভূর্বৌক্ষীর্ব্যু১ আয়ুরানড্দর্ষন্নু পূর্বো অপরো নু দর্ষৎ ।
দ্বে পবস্তে পরি তং ন ভূতো যো অস্য পারে রজসো বিবেষ ॥৭॥

27.8

গাবো যবং প্রয়ুতা অর্যো অক্ষন্তা অপশ্যং সহগোপাশ্চরন্তীঃ ।
হবা ইদর্যো অভিতঃ সমায়ন্কিয়দাসু স্বপতিশ্ছন্দয়াতে ॥৮॥

27.9

সং যদ্বয়ং যবসাদো জনানামহং যবাদ উর্বজ্রে অন্তঃ ।
অত্রা যুক্তোঽবসাতারমিচ্ছাদথো অয়ুক্তং যুনজদ্ববন্বান্ ॥৯॥

27.10

অত্রেদু মে মংসসে সত্যমুক্তং দ্বিপাচ্চ যচ্চতুষ্পাত্সংসৃজানি ।
স্ত্রীভির্যো অত্র বৃষণং পৃতন্যাদয়ুদ্ধো অস্য বি ভজানি বেদঃ ॥১০॥

27.11

যস্যানক্ষা দুহিতা জাত্বাস কস্তাং বিদ্বাঁ অভি মন্যাতে অন্ধাম্ ।
কতরো মেনিং প্রতি তং মুচাতে য ঈং বহাতে য ঈং বা বরেয়াৎ ॥১১॥

27.12

কিয়তী যোষা মর্যতো বধূয়োঃ পরিপ্রীতা পন্যসা বার্যেণ ।
ভদ্রা বধূর্ভবতি যত্সুপেশাঃ স্বয়ং সা মিত্রং বনুতে জনে চিৎ ॥১২॥

27.13

পত্তো জগার প্রত্যঞ্চমত্তি শীর্ষ্ণা শিরঃ প্রতি দধৌ বরূথম্ ।
আসীন ঊর্ধ্বামুপসি ক্ষিণাতি ন্যঙ্ঙুত্তানামন্বেতি ভূমিম্ ॥১৩॥

27.14

বৃহন্নচ্ছায়ো অপলাশো অর্বা তস্থৌ মাতা বিষিতো অত্তি গর্ভঃ ।
অন্যস্যা বত্সং রিহতী মিমায় কয়া ভুবা নি দধে ধেনুরূধঃ ॥১৪॥

27.15

সপ্ত বীরাসো অধরাদুদায়ন্নষ্টোত্তরাত্তাত্সমজগ্মিরন্তে ।
নব পশ্চাতাত্স্থিবিমন্ত আয়ন্দশ প্রাক্সানু বি তিরন্ত্যশ্নঃ ॥১৫॥

27.16

দশানামেকং কপিলং সমানং তং হিন্বন্তি ক্রতবে পার্যায় ।
গর্ভং মাতা সুধিতং বক্ষণাস্ববেনন্তং তুষয়ন্তী বিভর্তি ॥১৬॥

27.17

পীবানং মেষমপচন্ত বীরা ন্যুপ্তা অক্ষা অনু দীব আসন্ ।
দ্বা ধনুং বৃহতীমপ্স্ব১ন্তঃ পবিত্রবন্তা চরতঃ পুনন্তা ॥১৭॥

27.18

বি ক্রোশনাসো বিষ্বঞ্চ আয়ন্পচাতি নেমো নহি পক্ষদর্ধঃ ।
অয়ং মে দেবঃ সবিতা তদাহ দ্র্বন্ন ইদ্বনবত্সর্পিরন্নঃ ॥১৮॥

27.19

অপশ্যং গ্রামং বহমানমারাদচক্রয়া স্বধয়া বর্তমানম্ ।
সিষক্ত্যর্যঃ প্র যুগা জনানাং সদ্যঃ শিশ্না প্রমিনানো নবীয়ান্ ॥১৯॥

27.20

এতৌ মে গাবৌ প্রমরস্য যুক্তৌ মো ষু প্র সেধীর্মুহুরিন্মমন্ধি ।
আপশ্চিদস্য বি নশন্ত্যর্থং সূরশ্চ মর্ক উপরো বভূবান্ ॥২০॥

27.21

অয়ং যো বজ্রঃ পুরুধা বিবৃত্তোঽবঃ সূর্যস্য বৃহতঃ পুরীষাৎ ।
শ্রব ইদেনা পরো অন্যদস্তি তদব্যথী জরিমাণস্তরন্তি ॥২১॥

27.22

বৃক্ষেবৃক্ষে নিয়তা মীময়দ্গৌস্ততো বয়ঃ প্র পতান্পূরুষাদঃ ।
অথেদং বিশ্বং ভুবনং ভয়াত ইন্দ্রায় সুন্বদৃষয়ে চ শিক্ষৎ ॥২২॥

27.23

দেবানাং মানে প্রথমা অতিষ্ঠন্কৃন্তত্রাদেষামুপরা উদায়ন্ ।
ত্রয়স্তপন্তি পৃথিবীমনূপা দ্বা বৃবূকং বহতঃ পুরীষম্ ॥২৩॥

27.24

সা তে জীবাতুরুত তস্য বিদ্ধি মা স্মৈতাদৃগপ গূহঃ সমর্যে ।
আবিঃ স্বঃ কৃণুতে গূহতে বুসং স পাদুরস্য নির্ণিজো ন মুচ্যতে ॥২৪॥