Sukta 27

27.1

24 aindro vasukrah, indrah, trishtup

अस॒त्सु मे॑ जरित॒ः साभि॑वे॒गो यत्सु॑न्व॒ते यज॑मानाय॒ शिक्ष॑म् ।
अना॑शीर्दाम॒हम॑स्मि प्रह॒न्ता स॑त्य॒ध्वृतं॑ वृजिना॒यन्त॑मा॒भुम् ॥१॥

Asatsu me jaritah sabhivego yatsunvate yajamanaya shiksham
Anashirdamahamasmi prahanta satyadhvritam vrijinayantamabhum

27.2

यदीद॒हं यु॒धये॑ सं॒नया॒न्यदे॑वयून्त॒न्वा॒३ शूशु॑जानान् ।
अ॒मा ते॒ तुम्रं॑ वृष॒भं प॑चानि ती॒व्रं सु॒तं प॑ञ्चद॒शं नि षि॑ञ्चम् ॥२॥

Yadidaham yudhaye sannayanyadevayuntanva3 shushujanan
Ama te tumram vrishabham pachani tivram sutam panchadasham ni shincham

27.3

नाहं तं वे॑द॒ य इति॒ ब्रवी॒त्यदे॑वयून्त्स॒मर॑णे जघ॒न्वान् ।
य॒दावाख्य॑त्स॒मर॑ण॒मृघा॑व॒दादिद्ध॑ मे वृष॒भा प्र ब्रु॑वन्ति ॥३॥

Naham tam veda ya iti bravityadevayuntsamarane jaghanvan
Yadavakhyatsamaranamrighavadadiddha me vrishabha pra bruvanti

27.4

यदज्ञा॑तेषु वृ॒जने॒ष्वासं॒ विश्वे॑ स॒तो म॒घवा॑नो म आसन् ।
जि॒नामि॒ वेत्क्षेम॒ आ सन्त॑मा॒भुं प्र तं क्षि॑णां॒ पर्व॑ते पाद॒गृह्य॑ ॥४॥

Yadagyateshu vrijaneshvasam vishve sato maghavano ma asan
Jinami vetkshema a santamabhum pra tam kshinam parvate padagrihya

27.5

न वा उ॒ मां वृ॒जने॑ वारयन्ते॒ न पर्व॑तासो॒ यद॒हं म॑न॒स्ये ।
मम॑ स्व॒नात्कृ॑धु॒कर्णो॑ भयात ए॒वेदनु॒ द्यून्कि॒रण॒ः समे॑जात् ॥५॥

Na va u mam vrijane varayante na parvataso yadaham manasye
Mama svanatkridhukarno bhayata evedanu dyunkiranah samejat

27.6

दर्श॒न्न्वत्र॑ शृत॒पाँ अ॑नि॒न्द्रान्बा॑हु॒क्षद॒ः शर॑वे॒ पत्य॑मानान् ।
घृषुं॑ वा॒ ये नि॑नि॒दुः सखा॑य॒मध्यू॒ न्वे॑षु प॒वयो॑ ववृत्युः ॥६॥

Darshannvatra shritapam anindranbahukshadah sharave patyamanan
Ghrishum va ye niniduh sakhayamadhyu nveshu pavayo vavrityuh

27.7

अभू॒र्वौक्षी॒र्व्यु१ आयु॑रान॒ड्दर्ष॒न्नु पूर्वो॒ अप॑रो॒ नु द॑र्षत् ।
द्वे प॒वस्ते॒ परि॒ तं न भू॑तो॒ यो अ॒स्य पा॒रे रज॑सो वि॒वेष॑ ॥७॥

Abhurvaukshirvyu1 ayuranaddarshannu purvo aparo nu darshat
Dve pavaste pari tam na bhuto yo asya pare rajaso vivesha

27.8

गावो॒ यवं॒ प्रयु॑ता अ॒र्यो अ॑क्ष॒न्ता अ॑पश्यं स॒हगो॑पा॒श्चर॑न्तीः ।
हवा॒ इद॒र्यो अ॒भित॒ः समा॑य॒न्किय॑दासु॒ स्वप॑तिश्छन्दयाते ॥८॥

Gavo yavam prayuta aryo akshanta apashyam sahagopashcharantih
Hava idaryo abhitah samayankiyadasu svapatishchhandayate

27.9

सं यद्वयं॑ यव॒सादो॒ जना॑नाम॒हं य॒वाद॑ उ॒र्वज्रे॑ अ॒न्तः ।
अत्रा॑ यु॒क्तो॑ऽवसा॒तार॑मिच्छा॒दथो॒ अयु॑क्तं युनजद्वव॒न्वान् ॥९॥

Sam yadvayam yavasado jananamaham yavada urvajre antah
Atra yuktovasataramichchhadatho ayuktam yunajadvavanvan

27.10

अत्रेदु॑ मे मंससे स॒त्यमु॒क्तं द्वि॒पाच्च॒ यच्चतु॑ष्पात्संसृ॒जानि॑ ।
स्त्री॒भिर्यो अत्र॒ वृष॑णं पृत॒न्यादयु॑द्धो अस्य॒ वि भ॑जानि॒ वेद॑ः ॥१०॥

Atredu me mansase satyamuktam dvipachcha yachchatushpatsansrijani
Stribhiryo atra vrishanam pritanyadayuddho asya vi bhajani vedah

27.11

यस्या॑न॒क्षा दु॑हि॒ता जात्वास॒ कस्तां वि॒द्वाँ अ॒भि म॑न्याते अ॒न्धाम् ।
क॒त॒रो मे॒निं प्रति॒ तं मु॑चाते॒ य ईं॒ वहा॑ते॒ य ईं॑ वा वरे॒यात् ॥११॥

Yasyanaksha duhita jatvasa kastam vidvam abhi manyate andham
Kataro menim prati tam muchate ya im vahate ya im va vareyat

27.12

किय॑ती॒ योषा॑ मर्य॒तो व॑धू॒योः परि॑प्रीता॒ पन्य॑सा॒ वार्ये॑ण ।
भ॒द्रा व॒धूर्भ॑वति॒ यत्सु॒पेशा॑ः स्व॒यं सा मि॒त्रं व॑नुते॒ जने॑ चित् ॥१२॥

Kiyati yosha maryato vadhuyoh pariprita panyasa varyena
Bhadra vadhurbhavati yatsupeshah svayam sa mitram vanute jane chit

27.13

प॒त्तो ज॑गार प्र॒त्यञ्च॑मत्ति शी॒र्ष्णा शिर॒ः प्रति॑ दधौ॒ वरू॑थम् ।
आसी॑न ऊ॒र्ध्वामु॒पसि॑ क्षिणाति॒ न्य॑ङ्ङुत्ता॒नामन्वे॑ति॒ भूमि॑म् ॥१३॥

Patto jagara pratyanchamatti shirshna shirah prati dadhau varutham
Asina urdhvamupasi kshinati nyannguttanamanveti bhumim

27.14

बृ॒हन्न॑च्छा॒यो अ॑पला॒शो अर्वा॑ त॒स्थौ मा॒ता विषि॑तो अत्ति॒ गर्भ॑ः ।
अ॒न्यस्या॑ व॒त्सं रि॑ह॒ती मि॑माय॒ कया॑ भु॒वा नि द॑धे धे॒नुरूध॑ः ॥१४॥

Brihannachchhayo apalasho arva tasthau mata vishito atti garbhah
Anyasya vatsam rihati mimaya kaya bhuva ni dadhe dhenurudhah

27.15

स॒प्त वी॒रासो॑ अध॒रादुदा॑यन्न॒ष्टोत्त॒रात्ता॒त्सम॑जग्मिर॒न्ते ।
नव॑ प॒श्चाता॑त्स्थिवि॒मन्त॑ आय॒न्दश॒ प्राक्सानु॒ वि ति॑र॒न्त्यश्न॑ः ॥१५॥

Sapta viraso adharadudayannashtottarattatsamajagmirante
Nava pashchatatsthivimanta ayandasha praksanu vi tirantyashnah

27.16

द॒शा॒नामेकं॑ कपि॒लं स॑मा॒नं तं हि॑न्वन्ति॒ क्रत॑वे॒ पार्या॑य ।
गर्भं॑ मा॒ता सुधि॑तं व॒क्षणा॒स्ववे॑नन्तं तु॒षय॑न्ती बिभर्ति ॥१६॥

Dashanamekam kapilam samanam tam hinvanti kratave paryaya
Garbham mata sudhitam vakshanasvavenantam tushayanti bibharti

27.17

पीवा॑नं मे॒षम॑पचन्त वी॒रा न्यु॑प्ता अ॒क्षा अनु॑ दी॒व आ॑सन् ।
द्वा धनुं॑ बृह॒तीम॒प्स्व१न्तः प॒वित्र॑वन्ता चरतः पु॒नन्ता॑ ॥१७॥

Pivanam meshamapachanta vira nyupta aksha anu diva asan
Dva dhanum brihatimapsva1ntah pavitravanta charatah punanta

27.18

वि क्रो॑श॒नासो॒ विष्व॑ञ्च आय॒न्पचा॑ति॒ नेमो॑ न॒हि पक्ष॑द॒र्धः ।
अ॒यं मे॑ दे॒वः स॑वि॒ता तदा॑ह॒ द्र्व॑न्न॒ इद्व॑नवत्स॒र्पिर॑न्नः ॥१८॥

Vi kroshanaso vishvancha ayanpachati nemo nahi pakshadardhah
Ayam me devah savita tadaha drvanna idvanavatsarpirannah

27.19

अप॑श्यं॒ ग्रामं॒ वह॑मानमा॒राद॑च॒क्रया॑ स्व॒धया॒ वर्त॑मानम् ।
सिष॑क्त्य॒र्यः प्र यु॒गा जना॑नां स॒द्यः शि॒श्ना प्र॑मिना॒नो नवी॑यान् ॥१९॥

Apashyam gramam vahamanamaradachakraya svadhaya vartamanam
Sishaktyaryah pra yuga jananam sadyah shishna praminano naviyan

27.20

ए॒तौ मे॒ गावौ॑ प्रम॒रस्य॑ यु॒क्तौ मो षु प्र से॑धी॒र्मुहु॒रिन्म॑मन्धि ।
आप॑श्चिदस्य॒ वि न॑श॒न्त्यर्थं॒ सूर॑श्च म॒र्क उप॑रो बभू॒वान् ॥२०॥

Etau me gavau pramarasya yuktau mo shu pra sedhirmuhurinmamandhi
Apashchidasya vi nashantyartham surashcha marka uparo babhuvan

27.21

अ॒यं यो वज्र॑ः पुरु॒धा विवृ॑त्तो॒ऽवः सूर्य॑स्य बृह॒तः पुरी॑षात् ।
श्रव॒ इदे॒ना प॒रो अ॒न्यद॑स्ति॒ तद॑व्य॒थी ज॑रि॒माण॑स्तरन्ति ॥२१॥

Ayam yo vajrah purudha vivrittovah suryasya brihatah purishat
Shrava idena paro anyadasti tadavyathi jarimanastaranti

27.22

वृ॒क्षेवृ॑क्षे॒ निय॑ता मीमय॒द्गौस्ततो॒ वय॒ः प्र प॑तान्पूरु॒षाद॑ः ।
अथे॒दं विश्वं॒ भुव॑नं भयात॒ इन्द्रा॑य सु॒न्वदृष॑ये च॒ शिक्ष॑त् ॥२२॥

Vrikshevrikshe niyata mimayadgaustato vayah pra patanpurushadah
Athedam vishvam bhuvanam bhayata indraya sunvadrishaye cha shikshat

27.23

दे॒वानां॒ माने॑ प्रथ॒मा अ॑तिष्ठन्कृ॒न्तत्रा॑देषा॒मुप॑रा॒ उदा॑यन् ।
त्रय॑स्तपन्ति पृथि॒वीम॑नू॒पा द्वा बृबू॑कं वहत॒ः पुरी॑षम् ॥२३॥

Devanam mane prathama atishthankrintatradeshamupara udayan
Trayastapanti prithivimanupa dva bribukam vahatah purisham

27.24

सा ते॑ जी॒वातु॑रु॒त तस्य॑ विद्धि॒ मा स्मै॑ता॒दृगप॑ गूहः सम॒र्ये ।
आ॒विः स्व॑ः कृणु॒ते गूह॑ते बु॒सं स पा॒दुर॑स्य नि॒र्णिजो॒ न मु॑च्यते ॥२४॥

Sa te jivaturuta tasya viddhi ma smaitadrigapa guhah samarye
Avih svah krinute guhate busam sa padurasya nirnijo na muchyate