Sukta 28

28.1

(12) 1 indrasnusha vasukrapatni rishika, 2, 6, 8, 10, 12 indra rishih, 3, 4, 5, 7, 9, 11 aindro vasukrah rishih, 2, 6, 8, 10, 12 aindro vasukro devata, 1, 3, 4, 5, 7, 9, 11 indro devata, trishtup

विश्वो॒ ह्य१न्यो अ॒रिरा॑ज॒गाम॒ ममेदह॒ श्वशु॑रो॒ ना ज॑गाम ।
ज॒क्षी॒याद्धा॒ना उ॒त सोमं॑ पपीया॒त्स्वा॑शित॒ः पुन॒रस्तं॑ जगायात् ॥१॥

Vishvo hya1nyo arirajagama mamedaha shvashuro na jagama
Jakshiyaddhana uta somam papiyatsvashitah punarastam jagayat

28.2

स रोरु॑वद्वृष॒भस्ति॒ग्मशृ॑ङ्गो॒ वर्ष्म॑न्तस्थौ॒ वरि॑म॒न्ना पृ॑थि॒व्याः ।
विश्वे॑ष्वेनं वृ॒जने॑षु पामि॒ यो मे॑ कु॒क्षी सु॒तसो॑मः पृ॒णाति॑ ॥२॥

Sa roruvadvrishabhastigmashringo varshmantasthau varimanna prithivyah
Vishveshvenam vrijaneshu pami yo me kukshi sutasomah prinati

28.3

अद्रि॑णा ते म॒न्दिन॑ इन्द्र॒ तूया॑न्त्सु॒न्वन्ति॒ सोमा॒न्पिब॑सि॒ त्वमे॑षाम् ।
पच॑न्ति ते वृष॒भाँ अत्सि॒ तेषां॑ पृ॒क्षेण॒ यन्म॑घवन्हू॒यमा॑नः ॥३॥

Adrina te mandina indra tuyantsunvanti somanpibasi tvamesham
Pachanti te vrishabham atsi tesham prikshena yanmaghavanhuyamanah

28.4

इ॒दं सु मे॑ जरित॒रा चि॑किद्धि प्रती॒पं शापं॑ न॒द्यो॑ वहन्ति ।
लो॒पा॒शः सिं॒हं प्र॒त्यञ्च॑मत्साः क्रो॒ष्टा व॑रा॒हं निर॑तक्त॒ कक्षा॑त् ॥४॥

Idam su me jaritara chikiddhi pratipam shapam nadyo vahanti
Lopashah sinham pratyanchamatsah kroshta varaham niratakta kakshat

28.5

क॒था त॑ ए॒तद॒हमा चि॑केतं॒ गृत्स॑स्य॒ पाक॑स्त॒वसो॑ मनी॒षाम् ।
त्वं नो॑ वि॒द्वाँ ऋ॑तु॒था वि वो॑चो॒ यमर्धं॑ ते मघवन्क्षे॒म्या धूः ॥५॥

Katha ta etadahama chiketam gritsasya pakastavaso manisham
Tvam no vidvam ritutha vi vocho yamardham te maghavankshemya dhuh

28.6

ए॒वा हि मां त॒वसं॑ व॒र्धय॑न्ति दि॒वश्चि॑न्मे बृह॒त उत्त॑रा॒ धूः ।
पु॒रू स॒हस्रा॒ नि शि॑शामि सा॒कम॑श॒त्रुं हि मा॒ जनि॑ता ज॒जान॑ ॥६॥

Eva hi mam tavasam vardhayanti divashchinme brihata uttara dhuh
Puru sahasra ni shishami sakamashatrum hi ma janita jajana

28.7

ए॒वा हि मां त॒वसं॑ ज॒ज्ञुरु॒ग्रं कर्म॑न्कर्म॒न्वृष॑णमिन्द्र दे॒वाः ।
वधीं॑ वृ॒त्रं वज्रे॑ण मन्दसा॒नोऽप॑ व्र॒जं म॑हि॒ना दा॒शुषे॑ वम् ॥७॥

Eva hi mam tavasam jagyurugram karmankarmanvrishanamindra devah
Vadhim vritram vajrena mandasanopa vrajam mahina dashushe vam

28.8

दे॒वास॑ आयन्पर॒शूँर॑बिभ्र॒न्वना॑ वृ॒श्चन्तो॑ अ॒भि वि॒ड्भिरा॑यन् ।
नि सु॒द्र्वं१ दध॑तो व॒क्षणा॑सु॒ यत्रा॒ कृपी॑ट॒मनु॒ तद्द॑हन्ति ॥८॥

Devasa ayanparashunrabibhranvana vrishchanto abhi vidbhirayan
Ni sudrvan1 dadhato vakshanasu yatra kripitamanu taddahanti

28.9

श॒शः क्षु॒रं प्र॒त्यञ्चं॑ जगा॒राऽद्रिं॑ लो॒गेन॒ व्य॑भेदमा॒रात् ।
बृ॒हन्तं॑ चिदृह॒ते र॑न्धयानि॒ वय॑द्व॒त्सो वृ॑ष॒भं शूशु॑वानः ॥९॥

Shashah kshuram pratyancham jagaradrim logena vyabhedamarat
Brihantam chidrihate randhayani vayadvatso vrishabham shushuvanah

28.10

सु॒प॒र्ण इ॒त्था न॒खमा सि॑षा॒याव॑रुद्धः परि॒पदं॒ न सिं॒हः ।
नि॒रु॒द्धश्चि॑न्महि॒षस्त॒र्ष्यावा॑न्गो॒धा तस्मा॑ अ॒यथं॑ कर्षदे॒तत् ॥१०॥

Suparna ittha nakhama sishayavaruddhah paripadam na sinhah
Niruddhashchinmahishastarshyavangodha tasma ayatham karshadetat

28.11

तेभ्यो॑ गो॒धा अ॒यथं॑ कर्षदे॒तद्ये ब्र॒ह्मण॑ः प्रति॒पीय॒न्त्यन्नै॑ः ।
सि॒म उ॒क्ष्णो॑ऽवसृ॒ष्टाँ अ॑दन्ति स्व॒यं बला॑नि त॒न्व॑ः शृणा॒नाः ॥११॥

Tebhyo godha ayatham karshadetadye brahmanah pratipiyantyannaih
Sima ukshnovasrishtam adanti svayam balani tanvah shrinanah

28.12

ए॒ते शमी॑भिः सु॒शमी॑ अभूव॒न्ये हि॑न्वि॒रे त॒न्व१ः सोम॑ उ॒क्थैः ।
नृ॒वद्वद॒न्नुप॑ नो माहि॒ वाजा॑न्दि॒वि श्रवो॑ दधिषे॒ नाम॑ वी॒रः ॥१२॥

Ete shamibhih sushami abhuvanye hinvire tanva1h soma ukthaih
Nrivadvadannupa no mahi vajandivi shravo dadhishe nama virah