Sukta 29

29.1

8 aindro vasukrah, indrah, trishtup

वने॒ न वा॒ यो न्य॑धायि चा॒कञ्छुचि॑र्वां॒ स्तोमो॑ भुरणावजीगः ।
यस्येदिन्द्र॑ः पुरु॒दिने॑षु॒ होता॑ नृ॒णां नर्यो॒ नृत॑मः क्ष॒पावा॑न् ॥१॥

Vane na va yo nyadhayi chakanchhuchirvam stomo bhuranavajigah
Yasyedindrah purudineshu hota nrinam naryo nritamah kshapavan

प्र ते॑ अ॒स्या उ॒षस॒ः प्राप॑रस्या नृ॒तौ स्या॑म॒ नृत॑मस्य नृ॒णाम् ।
अनु॑ त्रि॒शोक॑ः श॒तमाव॑ह॒न्नॄन्कुत्से॑न॒ रथो॒ यो अस॑त्सस॒वान् ॥२॥

Pra te asya ushasah praparasya nritau syama nritamasya nrinam
Anu trishokah shatamavahannrinkutsena ratho yo asatsasavan

कस्ते॒ मद॑ इन्द्र॒ रन्त्यो॑ भू॒द्दुरो॒ गिरो॑ अ॒भ्यु१ग्रो वि धा॑व ।
कद्वाहो॑ अ॒र्वागुप॑ मा मनी॒षा आ त्वा॑ शक्यामुप॒मं राधो॒ अन्नै॑ः ॥३॥

Kaste mada indra rantyo bhudduro giro abhyu1gro vi dhava
Kadvaho arvagupa ma manisha a tva shakyamupamam radho annaih

कदु॑ द्यु॒म्नमि॑न्द्र॒ त्वाव॑तो॒ नॄन्कया॑ धि॒या क॑रस॒य कन्न॒ आग॑न् ।
मि॒त्रो न स॒त्य उ॑रुगाय भृ॒त्या अन्ने॑ समस्य॒ यदस॑न्मनी॒षाः ॥४॥

Kadu dyumnamindra tvavato nrinkaya dhiya karasaya kanna agan
Mitro na satya urugaya bhritya anne samasya yadasanmanishah

प्रेर॑य॒ सूरो॒ अर्थं॒ न पा॒रं ये अ॑स्य॒ कामं॑ जनि॒धा इ॑व॒ ग्मन् ।
गिर॑श्च॒ ये ते॑ तुविजात पू॒र्वीर्नर॑ इन्द्र प्रति॒शिक्ष॒न्त्यन्नै॑ः ॥५॥

Preraya suro artham na param ye asya kamam janidha iva gman
Girashcha ye te tuvijata purvirnara indra pratishikshantyannaih

मात्रे॒ नु ते॒ सुमि॑ते इन्द्र पू॒र्वी द्यौर्म॒ज्मना॑ पृथि॒वी काव्ये॑न ।
वरा॑य ते घृ॒तव॑न्तः सु॒तास॒ः स्वाद्म॑न्भवन्तु पी॒तये॒ मधू॑नि ॥६॥

Matre nu te sumite indra purvi dyaurmajmana prithivi kavyena
Varaya te ghritavantah sutasah svadmanbhavantu pitaye madhuni

आ मध्वो॑ अस्मा असिच॒न्नम॑त्र॒मिन्द्रा॑य पू॒र्णं स हि स॒त्यरा॑धाः ।
स वा॑वृधे॒ वरि॑म॒न्ना पृ॑थि॒व्या अ॒भि क्रत्वा॒ नर्य॒ः पौंस्यै॑श्च ॥७॥

A madhvo asma asichannamatramindraya purnam sa hi satyaradhah
Sa vavridhe varimanna prithivya abhi kratva naryah paunsyaishcha

व्या॑न॒ळिन्द्र॒ः पृत॑ना॒ः स्वोजा॒ आस्मै॑ यतन्ते स॒ख्याय॑ पू॒र्वीः ।
आ स्मा॒ रथं॒ न पृत॑नासु तिष्ठ॒ यं भ॒द्रया॑ सुम॒त्या चो॒दया॑से ॥८॥

Vyanalindrah pritanah svoja asmai yatante sakhyaya purvih
A sma ratham na pritanasu tishtha yam bhadraya sumatya chodayase