Sukta 30

30.1

15 kavasha ailushah, apah, apam na pat va, trishtup

प्र दे॑व॒त्रा ब्रह्म॑णे गा॒तुरे॑त्व॒पो अच्छा॒ मन॑सो॒ न प्रयु॑क्ति ।
म॒हीं मि॒त्रस्य॒ वरु॑णस्य धा॒सिं पृ॑थु॒ज्रय॑से रीरधा सुवृ॒क्तिम् ॥१॥

Pra devatra brahmane gaturetvapo achchha manaso na prayukti
Mahim mitrasya varunasya dhasim prithujrayase riradha suvriktim

अध्व॑र्यवो ह॒विष्म॑न्तो॒ हि भू॒ताऽच्छा॒प इ॑तोश॒तीरु॑शन्तः ।
अव॒ याश्चष्टे॑ अरु॒णः सु॑प॒र्णस्तमास्य॑ध्वमू॒र्मिम॒द्या सु॑हस्ताः ॥२॥

Adhvaryavo havishmanto hi bhutachchhapa itoshatirushantah
Ava yashchashte arunah suparnastamasyadhvamurmimadya suhastah

अध्व॑र्यवो॒ऽप इ॑ता समु॒द्रम॒पां नपा॑तं ह॒विषा॑ यजध्वम् ।
स वो॑ दददू॒र्मिम॒द्या सुपू॑तं॒ तस्मै॒ सोमं॒ मधु॑मन्तं सुनोत ॥३॥

Adhvaryavopa ita samudramapam napatam havisha yajadhvam
Sa vo dadadurmimadya suputam tasmai somam madhumantam sunota

यो अ॑नि॒ध्मो दीद॑यद॒प्स्व१न्तर्यं विप्रा॑स॒ ईळ॑ते अध्व॒रेषु॑ ।
अपां॑ नपा॒न्मधु॑मतीर॒पो दा॒ याभि॒रिन्द्रो॑ वावृ॒धे वी॒र्या॑य ॥४॥

Yo anidhmo didayadapsva1ntaryam viprasa ilate adhvareshu
Apam napanmadhumatirapo da yabhirindro vavridhe viryaya

याभि॒ः सोमो॒ मोद॑ते॒ हर्ष॑ते च कल्या॒णीभि॑र्युव॒तिभि॒र्न मर्य॑ः ।
ता अ॑ध्वर्यो अ॒पो अच्छा॒ परे॑हि॒ यदा॑सि॒ञ्चा ओष॑धीभिः पुनीतात् ॥५॥

Yabhih somo modate harshate cha kalyanibhiryuvatibhirna maryah
Ta adhvaryo apo achchha parehi yadasincha oshadhibhih punitat

ए॒वेद्यूने॑ युव॒तयो॑ नमन्त॒ यदी॑मु॒शन्नु॑श॒तीरेत्यच्छ॑ ।
सं जा॑नते॒ मन॑सा॒ सं चि॑कित्रेऽध्व॒र्यवो॑ धि॒षणाप॑श्च दे॒वीः ॥६॥

Evedyune yuvatayo namanta yadimushannushatiretyachchha
Sam janate manasa sam chikitredhvaryavo dhishanapashcha devih

यो वो॑ वृ॒ताभ्यो॒ अकृ॑णोदु लो॒कं यो वो॑ म॒ह्या अ॒भिश॑स्ते॒रमु॑ञ्चत् ।
तस्मा॒ इन्द्रा॑य॒ मधु॑मन्तमू॒र्मिं दे॑व॒माद॑नं॒ प्र हि॑णोतनापः ॥७॥

Yo vo vritabhyo akrinodu lokam yo vo mahya abhishasteramunchat
Tasma indraya madhumantamurmim devamadanam pra hinotanapah

प्रास्मै॑ हिनोत॒ मधु॑मन्तमू॒र्मिं गर्भो॒ यो व॑ः सिन्धवो॒ मध्व॒ उत्स॑ः ।
घृ॒तपृ॑ष्ठ॒मीड्य॑मध्व॒रेष्वाऽऽपो॑ रेवतीः शृणु॒ता हवं॑ मे ॥८॥

Prasmai hinota madhumantamurmim garbho yo vah sindhavo madhva utsah
Ghritaprishthamidyamadhvareshvapo revatih shrinuta havam me

तं सि॑न्धवो मत्स॒रमि॑न्द्र॒पान॑मू॒र्मिं प्र हे॑त॒ य उ॒भे इय॑र्ति ।
म॒द॒च्युत॑मौशा॒नं न॑भो॒जां परि॑ त्रि॒तन्तुं॑ वि॒चर॑न्त॒मुत्स॑म् ॥९॥

Tam sindhavo matsaramindrapanamurmim pra heta ya ubhe iyarti
Madachyutamaushanam nabhojam pari tritantum vicharantamutsam

आ॒वर्वृ॑तती॒रध॒ नु द्वि॒धारा॑ गोषु॒युधो॒ न नि॑य॒वं चर॑न्तीः ।
ऋषे॒ जनि॑त्री॒र्भुव॑नस्य॒ पत्नी॑र॒पो व॑न्दस्व स॒वृध॒ः सयो॑नीः ॥१०॥

Avarvritatiradha nu dvidhara goshuyudho na niyavam charantih
Rishe janitrirbhuvanasya patnirapo vandasva savridhah sayonih

हि॒नोता॑ नो अध्व॒रं दे॑वय॒ज्या हि॒नोत॒ ब्रह्म॑ स॒नये॒ धना॑नाम् ।
ऋ॒तस्य॒ योगे॒ वि ष्य॑ध्व॒मूध॑ः श्रुष्टी॒वरी॑र्भूतना॒स्मभ्य॑मापः ॥११॥

Hinota no adhvaram devayajya hinota brahma sanaye dhananam
Ritasya yoge vi shyadhvamudhah shrushtivarirbhutanasmabhyamapah

आपो॑ रेवती॒ः क्षय॑था॒ हि वस्व॒ः क्रतुं॑ च भ॒द्रं बि॑भृ॒थामृतं॑ च ।
रा॒यश्च॒ स्थ स्व॑प॒त्यस्य॒ पत्नी॒ः सर॑स्वती॒ तद्गृ॑ण॒ते वयो॑ धात् ॥१२॥

Apo revatih kshayatha hi vasvah kratum cha bhadram bibhrithamritam cha
Rayashcha stha svapatyasya patnih sarasvati tadgrinate vayo dhat

प्रति॒ यदापो॒ अदृ॑श्रमाय॒तीर्घृ॒तं पयां॑सि॒ बिभ्र॑ती॒र्मधू॑नि ।
अ॒ध्व॒र्युभि॒र्मन॑सा संविदा॒ना इन्द्रा॑य॒ सोमं॒ सुषु॑तं॒ भर॑न्तीः ॥१३॥

Prati yadapo adrishramayatirghritam payansi bibhratirmadhuni
Adhvaryubhirmanasa sanvidana indraya somam sushutam bharantih

एमा अ॑ग्मन्रे॒वती॑र्जी॒वध॑न्या॒ अध्व॑र्यवः सा॒दय॑ता सखायः ।
नि ब॒र्हिषि॑ धत्तन सोम्यासो॒ऽपां नप्त्रा॑ संविदा॒नास॑ एनाः ॥१४॥

Ema agmanrevatirjivadhanya adhvaryavah sadayata sakhayah
Ni barhishi dhattana somyasopam naptra sanvidanasa enah

आग्म॒न्नाप॑ उश॒तीर्ब॒र्हिरेदं न्य॑ध्व॒रे अ॑सदन्देव॒यन्ती॑ः ।
अध्व॑र्यवः सुनु॒तेन्द्रा॑य॒ सोम॒मभू॑दु वः सु॒शका॑ देवय॒ज्या ॥१५॥

Agmannapa ushatirbarhiredam nyadhvare asadandevayantih
Adhvaryavah sunutendraya somamabhudu vah sushaka devayajya